​ប្រែ​សម្រួល : កញ្ញា​ដា​លី​ស ៖ កាលពី​ថ្ងៃ​អង្គារ​គណៈកម្មាធិការ​ព្រឹទ្ធសភា​ប្រេ​ស៊ីល​មួយ​បាន​ផ្តល់​អនុសាសន៍​ថា​លោក​ប្រធានាធិបតី ជែរ បូល​សូ​ណារ៉ូ​ត្រូវ​ប្រឈម​មុខ​នឹង​ការចោទប្រកាន់​​ពី​បទឧក្រិដ្ឋ​ជា​បន្តបន្ទាប់​សម្រាប់​សកម្មភាព​នានា​និង​ការមើលស្រាល​ជាច្រើន​ដែល​ទាក់ទង​នឹង​ចំនួន​អ្នក​ស្លាប់​ដោយសារកូ​វីដ​១៩ ខ្ពស់​បំផុត​ទី​ពីរ​លើ​ពិភពលោក​។​

​ការបោះឆ្នោត​ក្នុង​សំឡេង ៧ ទល់នឹង ៤ គឺជា​ការ​សង្ខេបនៃ​ការស៊ើបអង្កេត​របស់​គណៈ​កម្មា​ធិ​ការ​នេះ​រយៈពេល​ប្រាំមួយខែ​នៃ​ការដោះស្រាយ​ជំងឺ​រាតត្បាត​របស់​រដ្ឋាភិបាល​។​វា​បាន​ទទួលស្គាល់​ជា​​ផ្លូវការ​នូវ​របាយការណ៍​ដែល​អំពាវនាវ​ឱ្យ​រដ្ឋអាជ្ញា​កាត់ទោស​លោក​បូល​សូ​ណារ៉ូ​ពី​បទចោទប្រកាន់​ជាច្រើន​រាប់ចាប់​ពី​ការធ្វើពើជាមិន​ដឹង​និង​បទល្មើស​ញុះញង់​រហូតដល់​ការប្រើប្រាស់​ខុស​នូវ​មូលនិធិ​សាធារណៈ​និង​ឧក្រិដ្ឋកម្ម​ប្រឆាំង​មនុស្ស​ជាតិ ហើយ​ក្នុងការ​ធ្វើ​ដូច្នេះ​គឺ​អាច​ចាប់​គាត់​ឱ្យ​ទទួលខុសត្រូវ​ចំពោះ​ការស្លាប់​ដោយសារកូ​វីដ​១៩ ជាង​៦០០.០០០ នាក់​របស់​ប្រេ​ស៊ីល​។​

​ប្រធានាធិបតី​បាន​បដិសេធ​មិនបាន​ធ្វើ​ខុស​ទេ ហើយ​ការសម្រេចចិត្ត​ថា​តើ​ត្រូវ​ដាក់​ការចោទប្រកាន់​ភាគច្រើន​យ៉ាងណា​នោះ​គឺ​អាស្រ័យ​លើ​អគ្គ​រដ្ឋអាជ្ញា លោក អូ​គូ​ស្តូ អា​រ៉ាស់ដែល​តែងតាំង​​ដោយ​លោក​បូល​សូ​ណារ៉ូ ដែល​គេ​មើល​ឃើញ​យ៉ាង​ទូលំទូលាយ​ថា​ជា​អ្នកការពារ​រូបគាត់​។

​ការចោទប្រកាន់​ពី​បទ​ឧក្រិដ្ឋកម្ម​ប្រឆាំង​មនុស្ស​ជាតិ​នឹង​ត្រូវ​សម្រេច​បន្ត​ដោយ​តុលាការ​ឧក្រិដ្ឋកម្ម​អន្តរជាតិ​។​

​ព្រឹទ្ធ​សមាជិក​លោក អូ​ម៉ា អាស៊ី​ស ប្រធាន​នៃ​ការស៊ើបអង្កេត​នេះ​បាន​និយាយថា លោក​នឹង​ផ្តល់​អនុសាសន៍​នេះ​ទៅ​អគ្គ​រដ្ឋអាជ្ញា​នៅ​ព្រឹក​ថ្ងៃ​ពុធ​ទី​២៧​តុលា​។​ការិយាល័យ​របស់​លោក​អា​រ៉ាស់​​បាន​និយាយថា របាយការណ៍​នេះ​នឹង​ត្រូវ​បាន​ពិនិត្យ​យ៉ាង​យកចិត្តទុកដាក់​ភ្លាមៗ​នៅពេល​ដែល​ទទួលបាន​។​

​ដោយ​មិន​គិត​ថា​តើ​ការចោទប្រកាន់​ត្រូវបាន​ដាក់​ប្តឹង​ឬ​អត់​នោះ របាយការណ៍​នេះ​ត្រូវ​គេ​រំពឹងថា​នឹង​ជំរុញ​ឱ្យ​មាន​ការរិះគន់​ប្រធានាធិបតី​រូប​នេះ​ដែល​អត្រា​គាំទ្រ​របស់​គាត់​បាន​ធ្លាក់ចុះ​នៅ​​មុន​យុទ្ធនាការ​បោះឆ្នោត​ឡើង​វិញ​របស់​គាត់​ឆ្នាំ ២០២២ ដែល​មួយផ្នែកធំ​គឺ​ដោយសារតែ​ចំនួន​អ្នក​ស្លាប់​ដោយកូវី​ដ​១៩ ធំធេង​ពេក​នៅក្នុង​ប្រទេសប្រេ​ស៊ីល​។​

​ចាប់​តាំងពី​ការចាប់ផ្តើម​នៃ​ជំងឺ​រាតត្បាត​មក លោក​បូល​សូ​ណារ៉ូ​បាន​បំផ្លាញ​ការរឹត​បន្តឹងរបស់​មេដឹកនាំ​ក្នុង​តំបន់​លើ​សកម្មភាព​នានា​ដែល​មាន​គោលបំណង​បញ្ឈប់​ការរីក​រាលដាល​នៃ​មេ​​រោគ​កូរ៉ូណា ដោយ​និយាយថា សេដ្ឋកិច្ច​ចាំបាច់​ត្រូវ​បន្ត​បើក​ដំណើរការ ដូច្នេះ​អ្នកក្រ​នឹង​មិន​ទទួល​រង​នូវ​ការលំបាក​ធ្ងន់ធ្ងរ​ជាង​នេះ​។ ​គាត់​ក៏​បាន​កោតសរសើរ​ថ្នាំ​ប្រឆាំង​ជំងឺគ្រុនចាញ់​ជា​យូរ​ផង​ដែរ​បន្ទាប់​ពី​ការ​ធ្វើតេស្តិ៍​ទូលំទូលាយ​បង្ហាញថា​វា​មិន​មាន​ប្រសិទ្ធភាព​ប្រឆាំង​នឹង​កូវី​ដ​១៩ បាន​រៀបចំ​ការប្រមូលផ្តុំ​ហ្វូង​មនុស្ស​ដោយ​​មិន​ពាក់​ម៉ាស់ និង បាន​សាប​ព្រួស​ការសង្ស័យ​អំពី​វ៉ាក់សាំង​៕

​លោក​ប្រធានាធិបតី ជែរ បូល​សូ​ណារ៉ូ