​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ខណៈ​អង់គ្លេស​បន្ត​ប្រយុទ្ធប្រឆាំង​នឹង​វីរុស​កូរ៉ូណា ប្រទេស​នេះ​បាន​រាយការណ៍​ករណី​ឆ្លង​ជាង ៤០.០០០​នាក់​ចំពេល​មាន​ការកើនឡើង​នៃ​ករណី​​ចូលដេក​មន្ទីរពេទ្យ​។​

​របាយការណ៍​បាន​និយាយថា អត្រា​នៃ​ការ​សម្រាក​ព្យាបាល​នៅ​មន្ទីរពេទ្យ​បាន​ឡើង​ដល់​កម្រិត​ខ្ពស់​បំផុត​ចាប់តាំងពី​ខែ​មីនា​។ ចំ​ពេល​មាន​ករណី​ឆ្លង​កើនឡើង​ទីភ្នាក់ងារ​សន្តិសុខ​សុខភាព​​របស់​ចក្រភព​អង់គ្លេស (UKHSA)​បានប្រកាសថា មេរោគ​បំ​ប្លែងខ្លួន AY.4.2 ត្រូវបាន​កំណត់ថា​ជា “​មេរោគ​បំប្លែង​ខ្លួន​ដែល​កំពុង​ស្ថិត​ក្រោម​ការ​ស៊ើបអង្កេត​”​។​

​ទីភ្នាក់ងារ​សុខភាព​នេះ​បាន​និយាយថា មេរោគ​បំប្លែង​នេះ “​អាច​មាន​អត្រា​កំណើន​កើន​ឡើង​នៅក្នុង​ចក្រភព​អង់គ្លេស​ធៀប​ទៅនឹង​មេរោគ Delta”​។​

Delta គឺជា​ពូជ​មេរោគ​បំប្លែង​ខ្លួន​លេចធ្លោ​ជាង​គេ​នៅក្នុង​ចក្រភព​អង់គ្លេស តែ​ទោះ​យ៉ាងណា​ក៏ដោយ អ្នកវិទ្យាសាស្ត្រ​និយាយថា មេរោគ​បំ​ប្លែងខ្លួន AY.4.2​កំពុង​ឆ្លង​រាលដាល​យ៉ាង​​ឆាប់រហ័ស​។​

​កាលពី​សប្តាហ៍​មុន ប្រទេស​នេះ​បាន​កត់ត្រា​ករណី​ឆ្លង​ជំងឺ​កូវី​ដ​១៩ ចំនួន ៥០.០០០ ករណី ខណៈ​របាយការណ៍​បាន​អះអាងថា កុមារ​នៅ​សាលា​បាន​ទទួលរង​ផលប៉ះពាល់​កាន់តែខ្លាំង​ពី​មេរោគ​នេះ​។​

​រដ្ឋមន្ត្រី​សុខាភិបាល​អង់គ្លេស​លោក សាជី​ដ ចា​វីដ បាន​ព្រមាន​ថា ករណី​ឆ្លង​វីរុស​កូរ៉ូណា​អាច​ឡើងដល់ ១០០.០០០​នាក់​ក្នុង​មួយថ្ងៃ​។ ចក្រភព​អង់គ្លេស​ជា​ប្រទេស​មួយ​ក្នុងចំណោម​ប្រទេស​ដែល​ទទួល​រងគ្រោះ​ដោយ​ជំងឺ​រាតត្បាត​ដ៏​អាក្រក់​បំផុត ដោយ​មាន​អ្នក​ឆ្លង​ជាង ៨,៦ លាន​នាក់ និង​ស្លាប់​ជាង ១៦៣.៥១៥ នាក់​៕

​ករណី​ឆ្លង​វីរុស​កូរ៉ូ​ណានៅ​អង់គ្លេស​អាច​ឡើងដល់ ១០០.០០០ នាក់​ក្នុង​មួយថ្ងៃ ដោយសារ​មេរោគ​បំប្លែង​ខ្លួន​ថ្មី AY.4.2