ប្រែ​សម្រួលៈ​វាសនា​/​ឌុយ​បៃ​៖ កងទ័ពអាកាស​អាម៉េរិក​បាន​និយាយ​កាលពី​ថ្ងៃអាទិត្យ​ទី​៣១​តុលា​ថា​ខ្លួន​បាន​បញ្ជូន​យន្តហោះ​ទម្លាក់​គ្រាប់បែក​យុទ្ធសាស្ត្រ​B-1B​ទៅ​ហោះ​រំលង​តំបន់​មជ្ឈិម​បូព៌ា​ជាមួយ​យន្តហោះ​របស់​សម្ពន្ធមិត្ត​រួម​មាន​យន្តហោះ​អ៊ីស្រាអែល​ចំពេល​មាន​ភាព​តានតឹង​ជា​បន្ត​ជាមួយ​អ៊ីរ៉ង់ ខណៈ​ដែល​កិច្ច​ពិភាក្សា​អំពី​កិច្ចព្រមព្រៀង​នុយគ្លេអ៊ែរ​របស់​អ៊ីរ៉ង់​ជាមួយ​មហាអំណាច​​ពិភពលោក​នៅ​ជាប់គាំង​។​

B-1B Lancer​បាន​ហោះ​កាលពី​ថ្ងៃ​សៅ​រ៍លើ​ច្រក​សមុទ្រហ័​រមូស ដែលជា​ផ្លូវទឹក​តូចចង្អៀត​របស់​ឈូង​សមុទ្រ​ពែ​ក្ស កន្លែង​ដែល​ជំនួញ​ប្រេង​របស់​ពិភពលោក​ប្រមាណ​២០​ភាគរយ​ឆ្លងកាត់​​ទីនេះ​។​វា​ក៏​ហោះ​លើ​សមុទ្រ​ក្រហម ច្រក​សមុទ្រ​បាប អែល ម៉ាន់​ដេប និង​ព្រែកជីក​ស៊ុយអេ​របស់អេ​ហ្ស៊ី​ប​ផងដែរ​។​

​ច្រក​សមុទ្រហ័​រមូស បាន​ធ្លាប់​ជា​កន្លែង​វាយប្រហារ​លើ​នាវា​ដឹកជញ្ជូន​នៅ​ប៉ុន្មាន​ឆ្នាំ​មក​នេះ​ដែល​គេ​បន្ទោស​លើ​អ៊ីរ៉ង់ ហើយ​សមុទ្រ​ក្រហម​ក៏​បាន​ជួប​ការវាយប្រហារ​ស្រដៀង​គ្នា ចំ​ពេល​សង្គ្រាម​រវាង​​អ៊ីរ៉ង់​និង​អ៊ីស្រាអែល​កំពុង​លេចចេញ​ស្រមោល​ស្ទង់ៗ​។​

​សាធារណរដ្ឋ​អ៊ីស្លាម​(​អ៊ីរ៉ង់​)​បាន​បដិសេធ​ថា​មិន​បាន​ពាក់ព័ន្ធ​នឹង​ការវាយប្រហារ​ទាំងនេះ​ទេ តែ​ខ្លួន​សន្យា​សងសឹក​ការវាយប្រហារ​របស់​អ៊ីស្រាអែល​បន្តបន្ទាប់​ដែល​ផ្តោ​លើ​កម្មវិធី​នុយគ្លេអ៊ែរ​របស់​​ខ្លួន​។​

​សូមបញ្ជាក់​ថា យន្តហោះ​ប្រយុទ្ធ​របស់​បា​រ៉ែ​ន អេ​ហ្ស៊ី​ប អ៊ីស្រាអែល​និង​អារ៉ាប់​សា​អូឌីត​បាន​ចូលរួម​ហោះ​ជាមួយ​យន្តហោះ​ទម្លាក់​គ្រាប់​អាម៉េរិក​កាលពី​ថ្ងៃ​សៅរ៍​

​ការហោះ​រំលង​នេះ​កើតឡើង​បន្ទាប់​ពី​ការហោះ​សម្ញែង​កម្លាំង​ដាក់​អ៊ីរ៉ង់​ស្រដៀង​គ្នា​ដោយ​យន្តហោះ​ទម្លាក់​គ្រាប់បែក​B-52 ដែល​អាច​ផ្ទុក​គ្រាប់បែក​នុយគ្លេអ៊ែរ​ក្នុងអំឡុង​រដ្ឋការ​ត្រាំ ។​លោក​ត្រាំ​​នៅ​ឆ្នាំ​២០១៨​បាន​ដកខ្លួន​ជា​ឯ​តោ​ភាគី​ចេញ​ពី​កិច្ចព្រមព្រៀង​នុយគ្លេអ៊ែរ​ឆ្នាំ​២០១៥​រវាង​អ៊ី​រង់​និង​មហាអំណាច​ពិភពលោក​។​ក្រោម​កិច្ច​ព្រមព្រៀង​នេះ​អ៊ីរ៉ង់​សុខចិត្ត​កាត់បន្ថយ​ការ​ចម្រាញ់​សារ​​ធាតុ​អ៊ុយ​រ៉ា​ញ៉ូម​យ៉ាងគំហ៊ុក ជា​ថ្នូរ​នឹង​ការដក​ទណ្ឌកម្មសេដ្ឋកិច្ច​។​

​តែ​ចាប់​តាំងពី​ពេល​អាម៉េរិក​ដកខ្លួន​នោះមក អ៊ីរ៉ង់​បាន​បោះបង់​ចោល​រាក់​កំហិត​មាន​ក្នុង​កិច្ចព្រមព្រៀង​និង​កាត់បន្ថយ​លទ្ធភាព​របស់​អធិការកិច្ចអ​ន្ត​រ​ជាតិ​លើ​កម្មវិធី​នុយគ្លេអ៊ែរ​របស់ខ្លួន​។​នៅ​​ពេល​អ៊ីរ៉ង​នៅតែ​និយាយ​ថា កម្មវិធី​របស់​ខ្លួន​ក្នុង​គោលបំណង​សន្តិភាព ផ្នែក​ចារកម្ម​អាម៉េរិក ក្រុមអធិការកិច្ច​លោកខាងលិច​និង​ប្រទេស​ដទៃ​ទៀត​និយាយថា រដ្ឋាភិបាល​ក្រុងតេអេ​រ៉ង់​បាន​មាន​​កម្មវិធី​សព្វាវុធ​នុយគ្លេអ៊ែរ​មួយ​រហូតដល់​ចុងឆ្នាំ​២០០៣​។​

​អ៊ីស្រាអែល​ព្រួយបារម្ភ​ជាងគេ ដោយ​អះអាង​ថា អ៊ីរ៉ង់​នឹង​មាន​លទ្ធភាព​ផលិត​គ្រាប់បែកនុយគ្លេអ៊ែរ​មួយ​ក្នុងពេល​ឆាប់ៗ​និង​បាន​ព្រមាន​វាយប្រហារ​ជា​ការបង្ការ​ទុកជាមុន​។​

​តាមពិត រដ្ឋាភិបាល​អាម៉េរិក​ក្រោម​ប្រធានាធិបតី​អាម៉េរិក​លោកចូ បៃ​ដិន មាន​បំណង​ចូលរួម​ក្នុង​កិច្ចព្រមព្រៀង​នុយគ្លេអ៊ែរ​នេះ​ឡើងវិញ តែ​កិច្ចពិភាក្សា​នៅ​ក្រុង​វី​យែន​បាន​ជាប់គាំង​នៅ​​ពេល​ជន​ប្រកាន់​តឹង​ម្នាក់​ចូល​កាន់តំណែង​ជា​ប្រធានាធិបតី​អ៊ីរ៉ង់​។​ការបញ្ជូន​យន្តហោះ​B1-B​ជា​ការបញ្ជូនសារ​ច្បាស់ៗ​មួយ​ទៅ​អ៊ីរ៉ង់​និង​ជា​ការធានា​ដល់​សម្ពន្ធមិត្ត​ក្នុង​តំបន់​៕