ដោយ​: បូកគោ​/​កំ​ពតៈ សមត្ថកិច្ច​នៃ​ស្នងការដ្ឋាន​នគរបាល​ខេត្តកំពត​នា​រសៀល​ថ្ងៃទី​៣១ ខែតុលា ឆ្នាំ​២០២១ បាន​បញ្ជូនទៅ​សាលាដំបូង​ជនសង្ស័យ​ម្នាក់​ក្នុងចំណោម​បក្ខពួក​បីនាក់​ដែល​រួមគ្នា​ប្លន់ និង​រំលោភ​សេពសន្ថវៈ​លើ​កុមារី​ពីរ​នាក់​ជា​បងប្អូន​បង្កើត​ប្រព្រឹត្តឡើង​នៅ​ស្រុក​អង្គរជ័យ​។​

​លោក​វរសេនីយ៍ទោ​ឈឹម ឈាង នាយការិយាល័យ​នគរបាល​ព្រហ្មទណ្ឌ​កម្រិតធ្ងន់​បាន​ប្រាប់​ឱ្យដឹងថា ជនសង្ស័យ​ខាងលើ ឈ្មោះ​ផាត ចិន្តា អាយុ ៣៤​ឆ្នាំ មាន​ទីលំនៅ​ភូមិ​ថ្មី ឃុំ​ព្រែក​ក្រឹស ស្រុក​កំពង់ត្រាច ខេត្តកំពត​។ លោកនាយ​ការិយាល័យ​បាន​រៀបរាប់ថា​កាលពី​រំលងអធ្រាត្រ​ឈានចូល​ថ្ងៃទី​១៨ ខែតុលា ឆ្នាំ​២០២១ មាន​ករណី​ប្លន់ និង​រំលោភ​សេពសន្ថវៈ​លើ​ក្មេងស្រី​ជា​អី​តិ​ជន​នៃ​គ្រួសារ​មួយ​ស្ថិតនៅ​ភូមិ​ប្រ​ភ្នំ ឃុំ​ប្រ​ភ្នំ ស្រុក​អង្គរជ័យ ខណៈដែល​ក្នុងផ្ទះ​មានតែ​ជនរងគ្រោះ​ពីរ​នាក់ ពោលគឺ​ម្តាយ​ទៅរក​ស៊ី​នៅ​ខេត្តកំពង់ស្ពឺ ឯ​ឪពុក​ទៅ​ដេក​នៅ​រោង​ចិញ្ចឹម​ទា​។ ក្រោយ​ហេតុការណ៍​ការកើតឡើង គ្រួសារ​រងគ្រោះ​បាន​ប្តឹង​ចូល​សមត្ថកិច្ច​ដោយ​បញ្ជាក់ថា​នា​វេលា​ម៉ោង​ប្រហែល​២​រំលងអធ្រាត្រ​ឈា​ចូល​ថ្ងៃទី​១៨ ខែសីហា មាន​ជន​មិន​ស្គាល់មុខ​បីនាក់​បានគាស់​បង្អួច​ស​ម្រុ​ក​ចូល ហើយ​ប្លន់ ព្រមទាំង​ចាប់រំលោភ​កុមារី​ពីរ​នាក់​បងប្អូន​បង្កើត​ដែលមាន​អាយុ​១៣​ឆ្នាំ និង​១៧​ឆ្នាំ​រហូត​បានសម្រេច​។ ជាមួយ​ហេតុការណ៍​នេះ គ្រួសារ​រងគ្រោះ​បាន​បាត់បង់​កងដៃ​ប្លា​ទីន ខ្សែក​ប្លា​ទីន ទូរ​សព្ទ​ដៃ​មួយ លុយ​បី​ម៉ឺន​រៀល និង​ម៉ាស៊ីន​កាត់​ស្មៅ​មួយគ្រឿង​។

លោក​វរសេនីយ៍​បាន​បន្តថា​តាមរយៈ​បណ្តឹង​នេះ លោក​ឧ​ត្ត​ម​សេនីយ៍​ទោ ម៉ៅ ច័ន្ទ​មធុ​រិ​ទ្ធ បាន​ណែនាំ​ដល់​កម្លាំង​ផែន​ការងារ​ព្រហ្មទណ្ឌ និង​កម្លាំង​ផែនការ​ងារ​ប្រឆាំង​ការជួញដូរ​មនុស្ស ព្រមទាំង​អធិការនគរបាល​ស្រុក​អង្គរជ័យ ស្រុក​ដងទង់ និង​ស្រុក​កំពង់ត្រាច សហការ​ជាមួយ​កម្លាំង​នាយកដ្ឋាន​ព្រហ្មទណ្ឌ​ដឹកនាំ​ដោយ​លោក​ឧ​ត្ត​ម​សេនីយ៍​ឯក ង៉េ​ង ជួ ក្រោម​កិច្ចសម្របសម្រួល​នីតិវិធី​ពី​ព្រះរាជអាជ្ញា​អម​សាលាដំបូង​ខេត្តកំពត​ចុះ​តាម​ដា​ស្រាវជ្រាវ​បន្ទាន់​។ ជា​លទ្ធផល នា​ល្ងាច​ថ្ងៃទី​២៩ ខែតុលា សមត្ថកិច្ច​បានកំណត់​មុខសញ្ញា និង​ឃាត់ខ្លួន​ឈ្មោះ ផាត ចិន្តា នៅ​ភូមិ​ថ្មី ឃុំ​ព្រែក​ក្រឹស ស្រុក​កំង់​ត្រាច​។ ជនសង្ស័យ​បាន​សារភាពថា ពួកគេ​មាន​គ្នា​បីនាក់​ពិតជា​បាន​ប្រព្រឹត្ត​ដូច​ការចោទប្រកាន់​មែន​៕​