ដោយៈ ជា សីហៈ​/​ភ្នំពេញៈ ក្រុម​សកម្មជន​បរិស្ថាន​និង​អភិរក្ស​កំពុងតែ​បំពេញ សកម្មភាព ជ្រើសរើស​ពូជ​អណ្តើក​ហ្លួង​យកមក​បំពាក់​ឧបករណ៍​តាមដាន​មុន នឹង​លែង​ទៅក្នុង​ទីជម្រក​ធម្មជាតិ​វិញ​។

​ក្រុមការងារ​គម្រោង​អភិរក្ស​អណ្តើក​ហ្លួង​នៃ​អង្គការ WCS ដោយមាន​ការអនុញ្ញាតិ ពី​រដ្ឋបាល​ជលផល​នៃ​ក្រសួងកសិកម្ម រុក្ខាប្រមាញ់ និង​នេសាទ​បានចាប់ផ្តើម ជ្រើសរើស អណ្តើក​ហ្លួង​ជំទង់​និង​ពេញវ័យ​ចំនួន​៥១​ក្បាល​ពី​ស្រះ​ចិញ្ចឹម​ស្ថិតក្នុង មជ្ឈមណ្ឌល​អភិរក្ស​ស​ត្វ​ល្មូ​ន​ខេត្តកោះកុង ដើម្បី​ធ្វើការ​វាស់​ទំហំ ថ្លឹង​ទម្ងន់ ភ្ជាប់​លេខ​កូដ​សម្គាល់​អត្តសញ្ញាណ និង​បំពាក់​ឧបករណ៍​តាមដាន​នៅលើ​ស្នូក មុនពេល​លែង​ពួកវា​ទៅក្នុង​ទីជម្រក​ធម្មជាតិ​វិញ​នៅ​ចុង​ឆ្នាំនេះ​។

​កិច្ចការ​ថែទាំ​អណ្តើក​ហ្លួង​នៅក្នុង​មជ្ឈមណ្ឌល និង​ការបំពាក់​ឧបករណ៍​តាមដាន ទទួលបាន​ការគាំទ្រ​ថវិកា​ពី​អង្គការ Mandai Nature, Allan & Patricia Koval Foundation, Turtle Survival Alliance និង​ម្ចាស់ជំនួយ​ផ្សេងៗ​ទៀត​។ ចំណែកឯ​ការងារ អភិរក្ស​នៅតាម​ទីវាល​គាំទ្រ​ថវិកា​ដោយ​សហភាព​អឺរ៉ុប​តាមរយៈ​គម្រោង​ដៃគូ​ប្រឆាំង​បទល្មើស​សត្វព្រៃ និង ដៃគូ​មួយចំនួនទៀត ៕​/PC