​ដោយ​៖​រិ​ទ្ធិ​សែន​/​ពោធិ៍សាត់​៖ ដើម្បី​ឆ្លើយតប​នឹង​តម្រូវ​ការចាំបាច់​ជូន​ប្រជាពលរដ្ឋ ផ្លូវ​ក្នុង​ក្រុង​ពោធិ៍សាត់​ចំនួន​២​ខ្សែ ដែលជា​ផ្លូវ​អ​ធិ​ភាព​ក្នុងចំណោម​ផ្លូវ​ជាច្រើន​ទៀត នឹងត្រូវ​បើក​ការដ្ឋាន​ស្ថាបនា​សាងសង់ នៅ​ថ្ងៃទី​១០ ខែវិច្ឆិកា​ខាងមុខ​។ នេះ​បើ​យោងទៅតាម​កិច្ចប្រជុំ​ពិភាក្សា​ការងារ ជុំវិញ​កា​រព​ន្លឿ​ន​វឌ្ឍនភាព នៃ​គម្រោង​កែលម្អ​គ្រប់គ្រង​បរិស្ថាន​ជុំវិញ​បឹង​ទន្លេសាប ក្រុង​ពោធិ៍សាត់ ដែល​បាន​ធ្វើឡើង នា​ថ្ងៃទី​០២ ខែវិច្ឆិកា ឆ្នាំ​២០២១ នៅ​សាលប្រជុំ Video Conference ខេត្ត ក្រោម​អធិបតីភាព លោក ជាវ តា​យ អភិបាល​នៃ​គណៈ​អភិបាលខេត្ត​ពោធិ៍សាត់ ជាមួយ​អាជ្ញាធរ​ពាក់ព័ន្ធ និង​ក្រុមការងារ​អន្តរក្រសួង​មួយចំនួនទៀត​។​

​អភិបាលខេត្ត​ពោធិ៍សាត់​លោក ជាវ តា​យ បាន​ចាប់អារម្មណ៍​ខ្ពស់ និង​ដាក់​ផែនការមេ​ជា​បន្តបន្ទាប់ ទៅលើ​ការស្ថាបនា​សាងសង់ «​ផ្លូវ​ក្រាល​កៅស៊ូ DBST ផ្លូវ​លេខ​២០៩+១០៩ និង​ផ្លូវ​ប៉េ​តុង​ជុំវិញ​ផ្សារ​ថ្មី​ពោធិ៍សាត់ ផ្លូវ​លេខ​២០៥+២០៦+១០៣» ដែលជា​ផ្លូវ​អាទិភាព​មួយ ក្នុងចំណោម​ផ្លូវ​ជាច្រើន​ទៀត ដើម្បី​ឆ្លើយតប​ទៅនឹង​តម្រូវ​ការចាំបាច់ របស់​ប្រជាពលរដ្ឋ​ក្នុង​មូលដ្ឋាន ក៏ដូចជា​សិស្សានុសិស្ស និង​បងប្អូន​អាជីវក ក្រោយពី​បាន​ជីក​កាយកប់​ប្រព័ន្ធ​លូ​រំដោះ​ទឹកភ្លៀង (​ទឹកស្អុយ​) នោះ​រួចរាល់​។

​សូមបញ្ជាក់ថា ទាក់ទង​នឹង​គម្រោង​គ្រប់គ្រង​បរិស្ថាន​ជុំវិញ​បឹង​ទន្លេសាប គឺជា​កញ្ចប់​ថវិកា​កម្ចី​ហិរញ្ញប្បទាន​ពី​ធនាគារអភិវឌ្ឍន៍អាស៊ី (ADB) ចំនួន​៩,៩៣​លាន​ដុល្លារ អនុវត្ត​ដោយ​ក្រសួង​សាធារណការ និង​ដឹកជញ្ជូន តាមរយៈ​រាជរដ្ឋាភិបាល​កម្ពុជា ផ្តល់ជូន​ប្រជាពលរដ្ឋ ក្នុង​ក្រុង​ពោធិ៍សាត់ ខេត្តពោធិ៍សាត់ ដែល​ក្នុងនោះ​រួមមាន «​អាង​ប្រព្រឹត្ត​កម្ម​ទឹក​កខ្វក់​, ប្រព័ន្ធ​លូ​រំដោះ​ទឹកភ្លៀង​, ទំនប់​ការពារ​ទឹកជំនន់ , ទីលាន​ចាក់សម្រាម និង​ការធ្វើឱ្យ​ប្រសើរឡើង ផ្លូវ​កៅស៊ូ​ថ្មី​ក្នុង​ក្រុង​ពោធិ៍សាត់​»​។​

​បច្ចុប្បន្ននេះ ទីលាន​ទុកដាក់​សម្រាម សម្រេចបាន​នូវ​សមិទ្ធផល​រួម បាន​៨៥%​ហើយ ដែល​គ្រោង​ដាក់ឱ្យ​ប្រើប្រាស់ នៅ​ចុងខែ​កុម្ភៈ ឆ្នាំ​២០២២ ខាងមុខនេះ​។ ចំពោះ​អាង​ប្រព្រឹត្ត​កម្ម​ទឹក​កខ្វក់ ប្រព័ន្ធ​លូ​រំដោះ​ទឹកភ្លៀង និង​ផ្លូវ​ក្រាល​ស៊ូ DBST ព្រមទាំង​ផ្លូវ​ប៉េ​តុង​ជុំវិញ​ផ្សារ​ថ្មី​ពោធិ៍សាត់ គ្រោង​នឹង​បញ្ចប់​ការដ្ឋាន នៅ​ខែមីនា ឆ្នាំ​២០២២​ខាងមុខនេះ​ផងដែរ​។​

​បើទោះបី​គម្រោង​ទាំងអស់នេះ​កំពុងដំណើរការ និង​មានការ​កកស្ទះ​ខ្លះៗ​ក៏ពិតមែន ក្នុងនាម​រដ្ឋបាលខេត្ត លោក ជាវ តា​យ នៅតែ​ស្នើ​យ៉ាងទទូច ឱ្យជួយ​ព​ន្លឿ​ន​ការស្ថាបនា​សាងសង់​គម្រោង​ទាំងនោះ ឱ្យបាន​ឆាប់រហ័ស ដើម្បី​ជា​គុណប្រយោជន៍ ជូន​ដល់​បងប្អូន​ពុក​ម៉ែ​ប្រជាពលរដ្ឋ​បាន​ប្រើប្រាស់​៕​