ដោយៈ ម៉េង​ឆៃ / ភ្នំពេញៈ ក្រសួង​សាធារណការ និង​ដឹកជញ្ជូន បានសម្រេច​ដាក់​កាមេរ៉ា​ចាប់​ល្បឿន​ឆ្លាត​វៃ​ចំនួន ១០​ទីតាំង និង​ភ្លើង​សញ្ញា​ចរាចរណ៍​បច្ចេកវិទ្យា​ទំនើប លើផ្លូវ​ជាតិ​លេខ​៣ ដើម្បី​ចូលរួម​កាត់បន្ថយ​គ្រោះថ្នាក់​ចរាចរណ៍​។

​ក្រសួង​សាធារណការ និង​ដឹក​ជ​ញ្ជួ​ន បានប្រកាសថា អ្នកបើក​យានយន្ត​គ្រប់​ប្រភេទ ត្រូវ​ពិនិត្យមើល​ល្បឿន នៅពេល​ចរាចរណ៍​លើផ្លូវ​ជាតិ​លេខ​៣ ក្រោយ​ធ្វើ​រួច​នេះ​។ កាំ​ម៉ា​រ៉ា​ចាប់​ល្បឿន​ឆ្លាត​វៃ ទាំង ១០ ទីតាំង ត្រូវបាន​ចាប់ផ្តើម​ដំឡើង​ចាប់ពី​ថ្ងៃទី​៤ ខែសីហា ឆ្នាំ​២០២១ និង​បានបញ្ចប់​នៅ​ថ្ងៃទី​៦ ខែវិច្ឆិកា ឆ្នាំ​២០២១ នៅលើ​កំណាត់​ផ្លូវជាតិ​លេខ​៣ ចោមចៅ​-​កំពត ដែលមាន​ប្រវែង​សរុប ១៣៥​គីឡូម៉ែត្រ​។ ក្នុងនោះ ពី​ចោមចៅ ដល់​បែក​គូស ជា​ផ្លូវ ៤​គន្លង មាន​ចំនួន ៤​ទីតាំង និង​កំណាត់​ផ្លូវ​ពី​បែក​គូស ទៅ​ទី​រួម​ខេត្តកំពត ជា​ផ្លូវ ២​គន្លង មាន​ចំនួន ៦​ទីតាំង​។ ចំណែក​ភ្លើង​សញ្ញា​ចរាចរណ៍​បច្ចេកវិទ្យា​ទំនើប ២​ទីតាំង ត្រូវបាន​ដំឡើង នៅត្រង់ចំណុច​វត្ត​ស្លែង និង​ផ្សារ​អង្គតាសោម ដែល​ភ្លើង​សញ្ញា​ចរាចរណ៍​ទាំងពីរ​ទីតាំង​បំពាក់​នូវ​ប្រព័ន្ធ Wireless សម្រាប់​ភ្ជាប់​ពី​បង្គោល​មួយ​ទៅ​បង្គោល​មួយ និង​ធ្វើ​ការបញ្ជា​ដំណើរការ​តាម​ទូរ​សព្ទ​ដៃ ព្រមទាំង​បំពាក់​នូវ​ប្រព័ន្ធ​សូ​ឡា​ប្រើប្រាស់​ពន្លឺព្រះអាទិត្យ សម្រាប់​ផ្គត់ផ្គង់​អគ្គិសនី​។​

​ក្រសួង​សាធារណការ  បាន​បញ្ជាក់ថា ការដាក់​កាមេរ៉ា​ចាប់​ល្បឿន​ឆ្លាត​វៃ និង​ភ្លើង​សញ្ញា​ចរាចរណ៍​បច្ចេកវិទ្យា​ទំនើប​ទាំងនេះ ក្នុង​គោលបំណង តាមដាន ការពារ​សុវត្ថិភាព និង​សម្រួលការ​ធ្វើដំណើរ​រប​ស់បង​ប្អូន​ប្រជាពលរដ្ឋ​លើផ្លូវ​ជាតិ​លេខ​៣​។ ក្នុងនោះ អគ្គស្នងការ​នគរបាល​ជាតិ នឹង​គ្រប់គ្រង​រាល់​សកម្មភាព និង​ប្រតិបត្តិការ​របស់​កាមេរ៉ា​ចាប់​ល្បឿន​ទាំង ១០​ទីតាំង ទាំង​ការគ្រប់គ្រង​ទិន្នន័យ និង​ការពិន័យ​បទល្មើស​ផងដែរ​។​

​អ្វីដែល​ពិសេស​នោះ គឺ​កាំ​ម៉ា​រ៉ា​ចាប់​ល្បឿន​ទាំងនេះ អាចឱ្យ​មន្ត្រី​ជំនាញ​ដឹង​នូវ​ល្បឿន​របស់​រថយន្ត ពណ៌ ប្រភេទ និង​ស្លាក​លេខ​រថយន្ត អ្នកបើកបរ​មិន​ពាក់​ខ្សែក្រវ៉ាត់​ការពារ និង​ប្រើ​ទូរ​សព្ទ​ពេល​បើកបរ​។ មុន​នឹងដាក់​ប្រើប្រាស់​ផ្លូវការ អាជ្ញាធរ​ពាក់ព័ន្ធ នឹង​ខិតខំ​អប់រំ​ផ្សព្វផ្សាយ ជូនដំណឹង​ដល់​បងប្អូន​ប្រជាពលរដ្ឋ​ឱ្យបាន​ដឹង​អំពី​ច្បាប់​ចរាចរណ៍ និង​ការដាក់​កាមេរ៉ា​ចាប់​ល្បឿន ហើយ​អាជ្ញាធរ​នឹង​បំពាក់​ផ្លាកសញ្ញា​ជូនដំណឹង​ដល់​អ្នកបើកបរ​យ៉ាងតិច ១​គីឡូម៉ែត្រ មុន​ដល់ទី​តាំង​កាំ​ម៉ា​រ៉ា​ចាប់​ល្បឿន​ទាំងនេះ​។​

​ក្រសួង​សាធារណការ និង​ដឹកជញ្ជូន បានប្រកាសថា កាំ​ម៉ា​រ៉ា​ចាប់​ល្បឿន​ឆ្លាត​វៃ ទាំង ១០​ទីតាំង នឹងដាក់​ឱ្យប្រើ​ប្រាស់​បណ្តោះ​អាសន្ន ក្នុងអំឡុង​ខែវិច្ឆិកា ឆ្នាំ​២០២១ បន្ទាប់ពី​ទទួលបាន​ការឯកភាព​ពីស​ម្តេច​ក្រឡាហោម ស ខេង ឧបនាយករដ្ឋមន្ត្រី និង​រដ្ឋមន្ត្រី​ក្រសួងមហាផ្ទៃ និង​ជា​ប្រធាន​គណៈកម្មាធិការ​ជាតិ​សុវត្ថិភាព​ច​រា​រណ៍​ផ្លូវគោក និង​លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន និង​ជា​អនុប្រធាន​អចិន្ត្រៃយ៍​គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវគោក​។ ចំណែក​ភ្លើងស្តុប​ចរាចរណ៍​ទាំងពីរ​ទីតាំង ត្រូវ​បានដាក់​ដំណើរការ​បណ្តោះអាសន្ន ចាប់ពី​ថ្ងៃទី​៩ ខែវិច្ឆិកា​តទៅ​។​

​ក្រសួង​សាធារណការ បាន​បញ្ជាក់ថា ល្បឿន​កំណត់​អតិបរមា នៅ​ទីប្រជុំជន គឺ ៤០​គីឡូម៉ែត្រ ក្នុង​មួយ​ម៉ោង និង​ក្រៅ​ទីប្រជុំជន គឺ​ល្បឿន ៨០ គី​ឡួ​ម៉ែត្រ ក្នុង​មួយ​ម៉ោង​។ ករណី​បំពាន​ល្បឿន ដែល​បានកំណត់ នោះ​អ្នកបើកបរ នឹងត្រូវ​ផាកពិន័យ ៤​ប្រភេទ គឺ​១-​លើស​ល្បឿន ចាប់ពី ១-១៩ គ​.​ម /​ម៉ោង ត្រូវ​ពិន័យ ១២​ម៉ឺន​រៀល ២-​លើស​ល្បឿន ចាប់ពី​២០-២៩​គ​.​ម​/​ម៉ោង ត្រូវ​ពិន័យ ១៥​ម៉ឺន​រៀល ៣-​លើស​ល្បឿន ចាប់ពី ៣០-៣៩ គ​.​ម /​ម៉ោង ត្រូវ​ពិន័យ ១៨​ម៉ឺន​រៀល និង​៤-​លើស​ល្បឿន​ចាប់ពី ៤០​គ​.​ម /​ម៉ោង​ឡើងទៅ ត្រូវ​ពិន័យ ៣០​ម៉ឺន​រៀល​។

​ដូច្នេះ​ដើម្បី​ជីវិត​អ្នក និង​អ្នកដទៃ កុំ​បើកបរ​លើស​ល្បឿន​កំណត់ ជាពិសេស​អ្នកធ្វើដំណើរ ទៅលេង​ខេត្ត​កែប ឬ​ខេត្តកំពត ត្រូវតែ​គោរ​ច្បាប់​ចរាចរណ៍ និង​បើកបរ​ក្នុង​ល្បឿន ដែល​ច្បាប់​បានកំណត់ នោះ​គឺ​នៅក្នុង​ទីប្រជុំជន មិនត្រូវ​លើស ៤០​គ​.​ម ក្នុង ១​ម៉ោង ហើយ​នៅក្រៅ​ទីប្រជុំជន ត្រូវ​បើកបរ ក្នុង​ល្បឿន មិន​លើសពី ៨០​គ​.​ម ក្នុង ១​ម៉ោង​។ បើ​មិន​ដូច្នេះ​ទេ អ្នក​អាច​បង្ក​គ្រោះថ្នាក់​ចរាចរណ៍ និង​ត្រូវ​រង​ការផាកពិន័យ​តាម​បទល្មើស​ល្បឿន ដែល​បានលើកឡើង បើសិនជា​ល្មើស​បើកបរ ក្នុង​ល្បឿន ហួសកំណត់​។​

​ម្យ៉ាងទៀត កាំ​ម៉ា​រ៉ា​សុវត្ថិភាព​ចាប់​ល្បឿន​បើកបរ គ្រាន់តែ​មួយផ្នែក ក្នុងការ​កាត់បន្ថយ​គ្រោះថ្នាក់​ចរាចរណ៍ ដែល​អាច​ទប់ស្កាត់​អ្នកបើកបរ មិន​ឲ្យ​បើកបរ​លឿន លើសពី ៨០​គ​.​ម ក្នុង ១​ម៉ោង​។ តែ​អ្វីដែល​សំខាន់ និង​ចាំបាច់​បំផុត អ្នកបើកបរ​យានយន្ត​គ្រប់​ប្រភេទ មិន​ថា ម៉ូតូ ឡាន​នោះទេ ត្រូវតែ​ចូលរួម​គោរព​ច្បាប់ និង​បើកបរ​ដោយ​ការប្រុងប្រយ័ត្ន​។ ក្នុងនោះ សំខាន់​ជាងគេ រថយន្ត​ធុន​ធំ ដឹកទំនិញ ឬ​រថយន្ត​កុងតឺន័រ ត្រូវតែ​កុំ​ផ្ទុក​លើស​ទម្ងន់ និង​កុំ​បើកបរ​លឿនៗ ល្មើស​ល្បឿន​កំណត់ ដែល​លឿន​បំផុត​ត្រឹមតែ ៨០​គ​.​ម ក្នុង ១​ម៉ោង​ប៉ុណ្ណោះ​។​

​ម្យ៉ាងទៀត ផ្លូវ​ស្អាត ទើបតែ​ធ្វើ​រួច​ថ្មី ពង្រីក​ធំ​ជាង​មុន អាច​ផ្លូវ​ល្អ អ្នកបើកបរ​បើក​លឿន ហើយ​ខ្វះ​ការប្រុងប្រយ័ត្ន ក៏​អាច​បង្ក​គ្រោះថ្នាក់​ដែរ​។ អ្នកស្រុក​ឆ្លងផ្លូវ ក៏​ត្រូវតែ​បង្កើន​ការប្រុងប្រយ័ត្ន ពិសេស​ម៉ូតូ កង់ និង​ថ្មើរជើង នៅពេល​ឆ្លងផ្លូវ​ចូល​ផ្ទះ ដាច់ខាត​ត្រូវតែ​ប្រុងប្រយ័ត្ន​ជាង​មុន ហើយ​មើល​ឆ្វេង​មើល​ស្តាំ ឲ្យ​ប្រាកដថា មិនមាន​ឡាន មិនមាន​ម៉ូតូ​មក​ទេ ចាំ​ឆ្លង​។ បើ​ក្មេងៗ សិស្សសាលា ក៏​រឹតតែ​តោង​ឲ្យ​ឪពុកម្តាយ អាណាព្យាបាល គ្រូបង្រៀន រួមទាំង​អាជ្ញាធរ​សមត្ថកិច្ច បង្កើន​ការប្រុងប្រយ័ត្ន​។ អាច​មនុស្ស​ចាស់ នាំ​ក្មេងៗ និង​សិស្សសាលា ឆ្លងផ្លូវ ដើម្បី​ជៀសវាង​គ្រោះថ្នាក់​ជាយថាហេតុ​។​

​សូម​ចូលរួម​ទាំងអស់គ្នា ទាំង​អ្នកបើកបរ ទាំង​អ្នកដំណើរ​តាមផ្លូវ និង​ទាំង​អ្នក​ឆ្លងផ្លូវ ត្រូវតែ​បង្កើន​ការប្រុងប្រយ័ត្ន ក្នុងពេលដែល​ផ្លូវ​ធ្វើ​ល្អ​ស្អាត ធំ​ជាង​មុន ដែល​អាច​នឹង​កើតមាន​គ្រោះថ្នាក់ បើសិនជា​ធ្វេសប្រហែស ឬ​ភ្លេចខ្លួន ជាន់​ហ្គ្រែ​នោះ មិន​ត្រឹមតែ​ត្រូវ​ប៉ូលិស​ហៅ​ឃាត់​ផាក ដោយសារតែ​លើស​ល្បឿន​កំណត់​ទេ តែ​ក៏​អាច​បង្ក​គ្រោះថ្នាក់​ជាយថាហេតុ​ផងដែរ​៕​សរន