​ប្រែ​សម្រួលៈ​វាសនា​(​បាងកក​ប៉ុស្តិ៍​)៖ តុលាការ​ធម្មនុញ្ញ​ថៃ​កាលពី​ថ្ងៃ​ពុធ​ទី​១០​វិច្ឆិកា​បាន​សំរេច​ថា អំពើ​របស់​មេដឹកនាំ​បា​តុ​កម្ម​៣​នាក់​នៅ​កន្លែង​ជួបជុំ​មួយ​នៅ​សកល​វិទ្យាល័យ​ធម្មា​សាត​កាលពី​ខែ​សីហា​​ឆ្នាំ​មុន​ជា​ការប៉ុនប៉ង​ផ្តួលរំលំ​របប​រាជានិយម​អាស្រ័យ​ធម្មនុញ្ញ​។​

​ការសំរេច​នេះ​ពាក់ព័ន្ធ​នឹង​ការចោទប្រកាន់​របស់​មេ​ធា​វី​ម្នាក់​ដែល​បាន​ដាក់​បណ្តឹង​ទៅ​តុលាការ​អោយ​ពិចារណា​ថា​តើ​អំពើ​របស់​មេធាវី​សិទ្ធិមនុស្ស អា​ណុន ណា​ម​ផា​, លោក​ផា​នូ​ពង់ ចា​តណុ​ក និង​នាង ផា​នូ​សា​យ៉ា ស៊ី​ធី​ជី​រ៉ា​វ៉ាត​តា​ណា​គុល វា​រំលោភ​ម​ត្រា​ទី​៤៩​នៃ​រដ្ឋធម្មនុញ្ញ​ដែរ​ឬ​អត់​។​

​វគ្គ​ច្បាប់​នេះ​ហាម​ប្រជាជន​ប្រើ​សិទ្ធិ​និង​សេរីភាព​របស់​គេ​ដើម្បី​ផ្តួលរំលំ​របប​ប្រជាធិបតេយ្យ​ដែល​មាន​ព្រះមហាក្សត្រ​ជា​ប្រមុខរដ្ឋ​។​

​ភាគច្រើន​នៃ​ចៅក្រម​របស់​តុលាការ​បាន​សំរេច​ថា អំពើ​របស់​អ្នក​ទាំង​៣​បាន​លាក់បាំង​ចេតនា​ក្នុង​ការប្រើ​សិទ្ធ​និង​សេរីភាព​របស់​គេ​ដើម្បី​បំផ្លាញ​ហើយ​ផ្តួលរំលំ​របប​ប្រជាធិបតេយ្យ​ដែល​មាន​ស្តេច​ជាប្រ​​មុខ​រដ្ឋ​។​ចៅក្រម​បាន​បញ្ជា​អោយ​អ្នក​ទាំង​៣​និង​អ្នកគាំទ្រ​របស់គេ​បញ្ឈប់​សកម្មភាព​និង​អំពើ​នេះ​។​

​សូម​រំលឹក​ថា នៅ​ការជួបជុំ​នៅ​បរិវេណ​សកល​វិទ្យាល័យ​ធម្មា​សាត​កាលពី​ថ្ងៃ​១០​សីហា​ឆ្នាំ​មុន នាង ផា​នូ​សា​យ៉ា បាន​អាន​ការទាមទារ​១០​ចំណុច​រួម​មាន​ការកែ​ទំរង់​របបរាជានិយម​។​ហេតុការណ៍​នេះ​បាន​​ធ្វើអោយ​មនុស្ស​ជាច្រើន​ស្រឡាំងកាំង​និង​ពួកគេ​ចាប់ផ្តើម​ចោទ​ពួក​ប្រឆាំង​តវ៉ា​ថា ទៅ​ហួស​ខ្សែបន្ទាត់​ក្រហម​។​

​ថ្លែង​ក្រោយ​តុលាការ​ចេញ​សេចក្តីសំរេច នាង ផា​នូ​សាយ៉ា​បានបង្ហាញ​ការខ​ក​ចិត្ត​និង​ថា​«​វា​មិន​អាច​ទទួលយកបាន​»​។​

​នាង​បាន​និយាយថា​«​ការទាមទារ​១០​ចំណុច​មិន​មាន​បំណង​ផ្តួលរំលំ​អី​ទេ តែ​កែ​ទំរង់​របបរាជានិយម​អោយ​ល្អ​ប្រសើរ​ឡើង​ប៉ុណ្ណោះ​។​ការស្នើ​សុំ​កែប្រែ​ច្បាប់​វគ្គ​ទី​១១(​ច្បាប់​ប្រឆាំង​ការប្រមាថ​ស្តេច​)​ក៏​មិន​​ជា​ការប៉ុនប៉ង​ផ្តួលរំលំ​របប​រាជានិយម​អាស្រ័យ​ធម្មនុញ្ញ​ដែរ​។​យើង​នៅតែ​ទទូច​អោយ​យើង​អាច​បន្ត​ជំរុញ​ការទាមទារ​១០​ចំណុច​នេះ​»​។​

​ចំណែក​លោក​អា​ណុន និង​លោក ផា​នូ​ពង់​មិន​បាន​បង្ហាញខ្លួន​នៅ​តុលាការ​ដើម្បី​ស្តាប់​សាលក្រម​ទេ ដោយសារ​ឥឡូវ​ពួកគេ​កំពុង​នៅក្នុង​គុក​ក្រោយ​ប្រឈម​ការចោទប្រកាន់​ជាច្រើន រួម​ទាំង​ការប្រមាថ​​ស្តេច​។​

​នាង ផា​នូ​សាយ៉ា​បាន​និយាយថា នាង​បារម្ភ​ខ្លាចក្រែង​ការសំរេច​របស់​តុលាការ​វា​នឹង​ប៉ះពាល់​ការបញ្ជូន​ញត្តិ​មួយ​ទៅ​សភា​ដើម្បី​សុំ​ការកែប្រែ​វគ្គ​ច្បាប់​ទី​១១២​។​ក្រុម​ប្រឆាំង​តវ៉ា​នឹងសិក្សា​សេចក្តីលម្អិត​នៃ​​សាលក្រម​នេះ​មុន​ប្រកាស​ចំណាត់ការ​បន្ទាប់​។​

​ក្នុងពេលេ​ជាមួយ​គ្នា​ដើម​បណ្តឹង​លោកណាត​ថា​ផន បាន​និយាយថា សាលក្រម​នេះ​នឹង​បើកផ្លូវ​សំរាប់​បណ្តឹង​ព្រហ្មទណ្ឌ​បន្ថែមទៀត​លើ​ពួក​អ្នក​ប្រឆាំង​តវ៉ា​។​ទោះជា​យ៉ាងណា ពួក​អ្នកសង្កេតការណ៍​កត់​​សំគាល់ថា ប្រសិនបើ​អ្នក​ទាំង​៣​ប្រឈម​បណ្តឹង​ព្រហ្មទណ្ឌ​ពី​បទ​ប៉ុនប៉ង​ផ្តួលរំលំ​របប​រាជានិយម​អាស្រ័យ​ធម្មនុញ្ញ គេ​ត្រូវ​មាន​ភស្តុតាង​រឹងមាំ​៕

​តុលាការ​ធម្មនុញ្ញ​កាលពី​ថ្ងៃ​ពុធ​បាន​សំរេច​ថា​អំពើ​របស់​មេដឹកនាំ​បាតុកម្ម​៣​នាក់ ក្នុង​ការជួបជុំ​ទាមទារ​កាលពី​ឆ្នាំមុន​ជា​ការប៉ុនប៉ង​ផ្តួលរំលំ​របប​រាជានិយម​អាស្រ័យ​ធម្មនុញ្ញ តែ​នាង​ផា​នូ​សា​យ៉ា​​ដែល​ជា​ចុង​ចម្លើយ​ម្នាក់​បាន​និយាយថា​«​ខ្ញុំ​គ្រាន់តែ​សុំ​អោយ​កែ​ទំរង់​ដើម្បីអោយ​ស្ថាប័ន​ព្រះមហាក្សត្រ​បាន​ល្អ​ប្រសើរ​ឡើង​»