​ដោយៈ ប​.​ខុន / ភ្នំពេញៈ របប​ខ្យល់មូសុង​ឦសាន បានចាប់ផ្តើម​រុញ​ចុះ មកជា​បន្តបន្ទាប់ តែ​ធាតុអាកាស​ត្រជាក់ នៅ​មិនទាន់​មកដល់​ទេ ដោយសារ​ខ្យល់​ក្តៅ (​សម្ពាធ​ទាប​) នៅមាន​ឥទ្ធិ ពល​ខ្លាំង ធ្វើឱ្យមាន​ភ្លៀង ធ្លាក់​រាយប៉ាយ បន្ត​ជាថ្មី ចាប់ពី​ព្រលប់​ថ្ងៃនេះ (១១​វិច្ឆិកា​) រហូតដល់​ដើម​សប្តាហ៍​ក្រោយ​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា ដឹង​នៅ​ថ្ងៃទី​១១ ខែវិច្ឆិកា ឆ្នាំ​២០២១​ថាៈ របប​ខ្យល់មូសុង ឦសាន បានចាប់ផ្តើម​ធ្លាក់​មកហើយ តែ​អាកាសធាតុ នៅ​មិនទាន់​ត្រជាក់​នៅ ឡើយ​ទេ ដោយសារ ខ្យល់​ក្តៅ (​សម្ពាធ​ទាប​) នៅមាន​ឥទ្ធិពល​ខ្លាំង រុញ​ទៅ​រុញ​មក នាំឱ្យមាន​ភ្លៀង ធ្លាក់​បន្ត​ច្រើន​ថ្ងៃ​ទៀត​។​

​អ្នកនាំពាក្យ ក្រសួង​ជំនាញ ខាងលើ បានបញ្ជាក់​ថាៈ អាកាសធាតុ​ឆ្នាំនេះ អាច​ត្រជាក់ មាន​រយៈពេល​ច្រើន​ថ្ងៃ ក្នុងពេល​ចុះ​ត្រជាក់​ម្តងៗ​។ ធាតុអាកាស​ត្រជាក់​នឹង​មកដល់​នៅ ពាក់កណ្តាល​ខែធ្នូ​។ នៅ​អំឡុងពេល​ត្រជាក់ សីតុណ្ហភាព ចុះ​មិន​ខុសពី​ឆ្នាំមុនៗ​ទេ តែ​រយៈពេល​ត្រជាក់ មាន​ច្រើន​ថ្ងៃ និង​សីតុណ្ហភាព កើន​ឡើងវិញ​តិចតួច ហើយក៏​ចុះ​ត្រជាក់ វិញ ជាថ្មីទៀត​។​

​លោក ចាន់ យុ​ត្ថា បាន​និយាយ​ឱ្យដឹងទៀតថាៈ ខ្យល់មូសុង​ឦសាន ដែល​បាន​បក់​ចុះ មក​ប៉ះ​ជាមួយនឹង​សម្ពាធ​ទាប រុញ​មកពី​សមុទ្រ​ប៉ាស៊ីហ្វិក បង្កឱ្យមាន​ភ្លៀង ធ្លាក់​រាយប៉ាយ​ជាថ្មី ចាប់ពី​ព្រលប់​ថ្ងៃនេះ (១១​វិច្ឆិកា​) រហូតដល់​ដើម​សប្តាហ៍​ក្រោយ ដោយ​អាច​នឹងមាន​ភ្លៀង ធ្លាក់​រុញ​ទៅដល់​តំបន់​ខ្ពង់រាប​ទៀតផង តែមាន​កម្រិត​មិន​ច្រើន ដូចជា​នៅ​តំបន់​ទំ​នា ប​ខាងត្បូង និង​បណ្តា​ខេត្ត នៅជាប់​ព្រំដែន កម្ពុជា​-​វៀតណាម នោះទេ​។​

​ក្រសួង​ធនធានទឹក និង​ឧតុនិយម កាលពី​ថ្ងៃទី​៩ ខែវិច្ឆិកា ឆ្នាំ​២០២១ បាន​ជូនដំណឹង ស្តីពី​ការ​ព្យាករ​ស្ថានភាព អាកាសធាតុ សម្រាប់​ពីថ្ងៃ​ទី​១០ ដល់ទី​១៦ ខែវិច្ឆិកា​ថាៈ ព្រះរាជាណាចក្រ​កម្ពុជា ទទួលរង​ឥទ្ធិពល​ទ្រនុង​សម្ពាធ​ខ្ពស់ ពី​ប្រទេស​ចិន ប្រសព្វ​នឹង​ជ្រលង សម្ពាធ​ទាប ប៉ាស៊ីហ្វិក បង្កឱ្យមាន​ភ្លៀង ធ្លាក់​រាយប៉ាយ ពី​តិច​ទៅ​ច្រើន ជាមួយ ផ្គរ រន្ទះ នៅ​តំបន់​ទំនាប​ភាគ​ខាងកើត និង​ភាគខាងត្បូង នៃ​ប្រទេស​។​

​ស្ថានភាព​បែប​ខាងលើនេះ នៅក្នុង​សេចក្តីជូនដំណឹង បានបញ្ជាក់​ថាៈ ធ្វើឱ្យ​បណ្តា​ខេត្ត នៅ​តំបន់​វាលទំនាប​កណ្តាល មាន​សីតុណ្ហភាព អប្បបរមា​ពី ២១ ទៅ ២៣ អង្សា​សេ និង សីតុណ្ហភាព អតិបរមា មាន​ពី ២៧ ទៅ ២៩ អង្សា​សេ អាចមាន​ភ្លៀង ផ្គរ រន្ទះ ក្នុង​កម្រិត​ពី ខ្សោយ​ទៅ​ច្រើន ជាពិសេស​នៅ​ខេត្តស្វាយរៀង ព្រៃវែង កណ្តាល តាកែវ កំពង់ធំ កំពង់ស្ពឺ កំពង់ឆ្នាំង និង​រាជធានី​ភ្នំពេញ ។​

​សម្រាប់​បណ្តា​ខេត្ត ជាប់​ជួរ​ភ្នំ​ដងរែក និង​ខ្ពង់រាប​ឦសាន មាន​សីតុណ្ហភាព អប្បបរមា​ពី ២០ ទៅ ២២ អង្សា​សេ សីតុណ្ហភាព អតិបរមា មាន​ពី ២៨ ទៅ ៣០ អង្សា​សេ អាចមាន​ភ្លៀង​ផ្គរ រន្ទះ ក្នុង​កម្រិត​ពី​ខ្សោយ ទៅ​បង្គួរ ជាពិសេស​នៅ​ខេត្តក្រចេះ ត្បូងឃ្មុំ និង កំពង់ចាម ។​

​សម្រាប់​តំបន់​មាត់សមុទ្រ មាន​សីតុណ្ហភាព អប្បបរមា​ពី ២១ ទៅ ២៣ អង្សា​សេ សីតុណ្ហភាព អតិបរមា មាន​ពី ២៨ ទៅ ៣០ អង្សា​សេ អាច​នឹងមាន​ភ្លៀង​ផ្គរ រន្ទះ ក្នុង​កម្រិត​ពី​ខ្សោយ ទៅ​បង្គួរ ៕/V​