​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ រុស្ស៊ី​បានបង្ហាញ​គំរូ​យន្តហោះ​ចម្បាំង​ជំនាន់​ទី​៥​ថ្មី​របស់​ខ្លួន​នៅ​ឯ​ពិព័រណ៍​អាកាសចរណ៍​ឌូ​បៃ​កាលពី​ថ្ងៃអាទិត្យ​ទី ១៤ វិច្ឆិកា​ខណៈ​កិច្ចព្រមព្រៀង​របស់​​អារ៉ាប់​រួម​អេ​មី​រ៉ា​ត​ក្នុង​ការទិញ​យន្តហោះ​ចម្បាំង F-35 របស់​អាម៉េរិក​មាន​វឌ្ឍនភាព​យឺតយ៉ាវ​។​

​វា​ជា​លើកទីមួយ​ហើយ​ដែល​យន្តហោះ Sukhoi Su-75 Checkmate ដែល​បាន​បង្ហាញខ្លួន​ដំបូង​កាលពី​ខែកក្កដា ត្រូវបាន​បង្ហាញ​នៅ​ខាង​ក្រៅ​ប្រទេស​រុស្ស៊ី​ហើយ​បើ​យោងតាម​ទីភ្នាក់ងារ​សារព័ត៌​​មាន​រដ្ឋ​រុស្ស៊ី គណៈប្រតិភូ​នៃ​ថ្នាក់ដឹកនាំ​កំពូល​របស់​អារ៉ាប់​រួម​អេ​មី​រ៉ា​ត​បាន​ចុះ​មក​មើល​ផ្ទាល់​។​

​វីដេអូ​ក្រាហ្វិក​កុំព្យូទ័រ​ជា​ភាសា​អង់គ្លេស​បាន​បង្ហាញ យន្តហោះ​ចម្បាំង​យុទ្ធសាស្ត្រ​ធុន​ស្រាល ដែល​មាន​សមត្ថភាព​បាញ់​មី​ស៊ីល​ពី​អាកាសទៅ​អាកាសចំនួន​ប្រាំ​គ្រាប់​ក្នុងពេល​ដំណាលគ្នា បាន​កម្ទេច​គោលដៅ​ច្រើន​ក្នុងពេល​តែមួយ​។​

​បទ​បង្ហាញ​របស់​រុស្ស៊ី​បានចាត់ទុក​យន្តហោះ Checkmate ដែល​ចុះ​ត្រួតពិនិត្យ​ផ្ទាល់​ដោយ​លោក វ្ល៉ា​ឌី​មៀរ ពូ​ទីន ក្នុងអំឡុង​ការដាក់​បង្ហាញ​កាលពី​ខែ​កក្កដា ថា​ជា​យន្តហោះ​ចម្បាំង​តម្លៃ​ធូរ​ថ្លៃ អាច​ហោះហើរ​ក្នុង​ល្បឿន​លឿន​ជាង​សំឡេង ១,៨ ដង​និង​ហោះ​បាន​ចម្ងាយ​ពី ២.៨០០-២.៩០០ គីឡូម៉ែត្រ​។​

​យន្តហោះ Checkmate ដែល​នឹង​ត្រូវ​ហោះហើរ​សាកល្បង​លើកដំបូង​នៅ​ឆ្នាំ ២០២៣ និង​ចាប់ផ្តើម​ផលិត​ជា​ផ្លូវការ​នៅ​ឆ្នាំ ២០២៦ មិនទាន់​មាន​ការបញ្ជា​ទិញ​នៅឡើយ​ទេ​។ យន្តហោះ Lockheed Martin F-35 បាន​ចូល​បម្រើការ​ក្នុង​ឆ្នាំ ២០១៥ ជាមួយ​កង​ម៉ា​រី​ន​អាម៉េរិក​។​

​លោក យូ​រី ស្ល៊ូ​សា ជា​ប្រធាន​ក្រុមហ៊ុន United Aircraft Corp ដែល​ជា​ផ្នែក​មួយ​នៃ​ក្រុមហ៊ុន​អាកាសចរណ៍​រដ្ឋ​និង​ការពារជាតិ Rostec បាន​និយាយថា​មាន “​ការ​ធ្វើ​ទំនាក់ទំនង​យ៉ាង​ជិតស្និទ្ធ​” ជាមួយ​កងទ័ពអាកាស​រុស្ស៊ី​។​

​អ្នកការទូត​លោក​ខាងលិច​មាន​មន្ទិលសង្ស័យ​អំពី​បណ្តា​រដ្ឋ​ឈូង​សមុទ្រ​ដែល​ជា​សម្ពន្ធមិត្ត​អាម៉េរិក​នឹង​ទិញ​ឧបករណ៍​ទំនើប​ដូចជា​យន្តហោះ Checkmate​ទោះបីជា​ការលក់​គ្រឿង​ឧបករណ៍​របស់​រុស្ស៊ី​​ទៅ​តំបន់​ឈូង​សមុទ្រ​ពែ​ក្ស​បាន​កើន​ឡើង​ក្នុង​ប៉ុន្មាន​ឆ្នាំ​ថ្មីៗ​នេះ​ក៏​ដោយ​។​

​អារ៉ាប់​រួម​អេ​មី​រ៉ា​ត​ក្នុង​ឆ្នាំ ២០១៧ បាន​ចុះហត្ថលេខា​លើ​កិច្ចព្រមព្រៀង​បឋម​មួយ​ដើម្បី​ទិញ​យន្តហោះ​ចម្បាំង Sukhoi Su-35 និង​ធ្វើការ​រួមគ្នា​ជាមួយ​រុស្ស៊ី​លើ​យន្តហោះ​ចម្បាំង​ជំនាន់​ក្រោយនេះ ប៉ុន្តែ​រហូត​មក​ទល់​ពេល​នេះ​វា​ហាក់ដូចជា​មិន​មាន​វឌ្ឍនភាព​ទេ​។​

​លោក ហ្សង់​លូប សា​ម៉ា​អាន ជា​អ្នកស្រាវជ្រាវ​ជាន់ខ្ពស់​នៅ​វិទ្យាស្ថាន​មជ្ឈិមបូព៌ា​នៃ​សាកលវិទ្យាល័យ​ជាតិ​សិង្ហ​បុរី​បាន​និយាយថា​”​អារ៉ាប់​រួម​អេ​មី​រ៉ា​ត​ចូលចិត្ត​គំនិត​នៃ​ការបណ្តុះ​ទំនាក់ទំនង​ជាមួយ​ឧស្សា​​ហ​កម្ម​ការពារ​ជាតិ​រុស្ស៊ី ប៉ុន្តែ​វា​ជា​វិធី​សំខាន់​មួយ​ដើម្បី​ផ្ញើ​សារ​ទៅ​កាន់​សហរដ្ឋ​អាម៉េរិក​”​។​

​ការលក់​យន្តហោះ​ចម្បាំង F-35 Lighting II របស់​ទីក្រុង​វ៉ាស៊ីនតោន​ចំនួន ៥០ គ្រឿង​ឱ្យ​ទៅ​អារ៉ាប់​រួម​អេ​មី​រ៉ា​ត មាន​សន្ទុះ​យឺតយ៉ាវ ចំ​ពេល​មាន​ការព្រួយបារម្ភ​អំពី​ទំនាក់ទំនង​របស់​ប្រទេស​នេះ​ជាមួយ​ចិន រួម​ទាំង​ប្រេ​វ៉ាឡង់​នៃ​បច្ចេកវិជ្ជា Huawei 5G នៅក្នុង​ប្រទេស​នេះ​។​

​អាម៉េរិក​បាន​យល់ព្រម​លក់​យន្តហោះ​នេះ​បន្ទាប់​ពី​អារ៉ាប់​រួម​កាលពី​ឆ្នាំមុន​បាន​បង្កើត​ទំនាក់ទំនង​ជាមួយ​អ៊ីស្រាអែល​៕

​យន្តហោះ Sukhoi Su-75 Checkmate កំពុង​ដាក់​តាំង​បង្ហាញ​នៅ​ឌូ​បៃ

F-35​របស់​អាម៉េរិក