ដោយ : ប.ជ័យ / បន្ទាយមានជ័យៈ រដ្ឋបាលក្រុងប៉ោយប៉ែតបានបើកការដ្ឋានស្ថាបនា ផ្លូវបេតុង ១ខ្សែ នៅភូមិកូនដំរី ប្រើកញ្ចប់គម្រោងថវិកា មូលនិធិសង្កាត់និមិត្ត ឆ្នាំ២០២១ ដែលផ្លូវថ្មី មួយខ្សែនេះ នឹងជួយសម្រួល ដល់ការធ្វើដំណើររបស់បងប្អូន ប្រជាពលរដ្ឋ ក៏ដូចជា លើកកម្ពស់ សោភ័ណភាព ផ្នែកហេដ្ឋារចនាសម្ព័ន្ធ ក្នុងសង្កាត់និមិត្ត បានមួយកម្រិតទៀត។
លោក គាត ហ៊ុល អភិបាលក្រុងប៉ោយប៉ែត ដែលបានចូលរួមជាអធិបតីក្នុងពិធី បើកការដ្ឋាន ដែលមានពលរដ្ឋរាប់រយនាក់ កាលពីថ្ងៃទី១៥ខែវិច្ឆិកាឆ្នាំ២០២១ នោះ បាននិយាយថា: នៅពេល ដែលផ្លូវមួយខ្សែនេះ ស្ថាបនាបានរួចរាល់លោកក៏សូម ជម្រុញលើកទឹកចិត្ត ឲ្យលោកចៅសង្កាត់ និមិត្ត លោក លោកស្រី ជាសមាជិក សមាជិកា ក្រុមប្រឹក្សាសង្កាត់ និងលោកមេភូមិ ធ្វើការចលនា កៀងគរសប្បុរសជន និងបងប្អូនប្រជាពលរដ្ឋ ដែលទទួលផល ពីផ្លូវមួយខ្សែនេះ ជួយបំពាក់ភ្លើងសូឡា បំភ្លឺផ្លូវ និងដាំដើមឈើអមសងខាងផ្លូវ ដើម្បីបង្កើនសោភ័ណភាពឲ្យកាន់តែ ស្រស់ស្អាត បានមួយកម្រិតទៀត។
សូមបញ្ជាក់ថា ផ្លូវបេតុង ១ខ្សែនេះ មានប្រវែង ៦៥០ ម៉ែត្រ ទទឹង ៥ ម៉ែត្រ និងកម្រាស់ ០,១៥ ម៉ែត្រ នៅភូមិកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយ មានជ័យ ជាកញ្ចប់គម្រោងថវិកា មូលនិធិសង្កាត់និមិត្ត ឆ្នាំ២០២១ ៕/V-PC
