ប្រែសម្រួល : កញ្ញាដាលីស (ដេលីមែល) ៖ ប៉ូលិសបាននិយាយថា ការបំផ្ទុះគ្រាប់បែកអត្តឃាតពីរលើកបានសម្លាប់មនុស្សបីនាក់ និងបង្ករបួសជាច្រើនសិបនាក់ទៀតនៅក្នុងរដ្ឋធានីកាំប៉ាឡានៃប្រទេសអ៊ូហ្គង់ដាកាលពីថ្ងៃអង្គារទី១៦វិច្ឆិកា ខណៈក្រុមរដ្ឋអ៊ីស្លាមបានអះអាងទទួលខុសត្រូវចំពោះការវាយប្រហារនេះ។
ប៉ូលិសមុននេះបានស្តីបន្ទោសកងកម្លាំងសម្ពន្ធមិត្តប្រជាធិបតេយ្យ (ADF)ដែលជាក្រុមប្រដាប់អាវុធសកម្មនៅភាគខាងកើតនៃសាធារណរដ្ឋប្រជាធិបតេយ្យកុងហ្គោចំពោះការវាយប្រហារជាបន្តបន្ទាប់នៅអ៊ូហ្គង់ដា និងដែលទីក្រុងវ៉ាស៊ីនតោនបានផ្សារភ្ជាប់ពួកគេជាមួយអាយស៊ីស។
ជនបំផ្ទុះគ្រាប់បែកអត្តឃាតពីរនាក់ ដែលក្លែងធ្វើជាអ្នករត់ម៉ូតូឌុប បានបំផ្ទុះគ្រាប់បែកនៅជិតច្រកចូលសភាដោយសម្លាប់អ្នកដំណើរឆ្លងកាត់ម្នាក់។ អ្នកនាំពាក្យប៉ូលិសលោក ហ្វ្រេដ អេណានហ្គា បាននិយាយថា ជនវាយប្រហារទីបីបានកំណត់គោលដៅលើប៉ុស្តិ៍ត្រួតពិនិត្យមួយនៅជិតស្ថានិយប៉ូលិសកណ្តាលក្រុង ដោយសម្លាប់មនុស្សពីរនាក់។
លោកបាននិយាយថា ការបំផ្ទុះនៅក្នុងសង្កាត់ពាណិជ្ជកម្មកណ្តាលក្រុងកាំប៉ាឡាបានកើតឡើងក្នុងរយៈពេលតែប៉ុន្មាននាទីពីគ្នាប៉ុណ្ណោះបន្ទាប់ពីម៉ោង ១០:០០ ព្រឹក ហើយបានបណ្តាលឱ្យ”អ្នកស្លាប់និងរបួសរាយប៉ាយគ្រប់កន្លែង”។
លោកអេណានហ្គាបានបន្ថែមថា ប៉ូលិសបានរារាំងការវាយប្រហារលើកទីបី ដោយបានរកឃើញគ្រឿងផ្ទុះនៅក្នុងផ្ទះរបស់ជនបំផ្ទុះគ្រាប់បែកអត្តឃាតម្នាក់ទៀត ដែលប៉ូលិសបាញ់របួស។ ប៉ូលិសកំពុងតាមប្រមាញ់សមាជិកផ្សេងទៀតក្នុងក្រុមអាយស៊ីស។
ប្រធានាធិបតីអ៊ូហ្គង់ដាលោក យ៉ូវើរី មូសេវ៉េនី បាននិយាយថា បុរសនោះក្រោយមកបានស្លាប់ ហើយបានប្តេជ្ញាថា ជនវាយប្រហារទាំងឡាយនឹងត្រូវ “ស្លាប់”។
លោកបានបន្តថា “សាធារណជនគួរតែរក្សាការប្រុងប្រយ័ត្នក្នុងការត្រួតពិនិត្យមនុស្សនៅចំណុចច្រកចូលចំណតរថយន្តក្រុង សណ្ឋាគារ ព្រះវិហារគ្រិស្ត ព្រះវិហារអ៊ីស្លាម និងផ្សារ”។
ជំនួយការអគ្គអធិការនគរបាលនៃប្រទេសអ៊ូហ្គង់ដា លោក អេដវ៉ាដ អូឆូម បានប្រាប់ទីភ្នាក់ងារសារព័ត៌មាន AFP មុននេះបន្តិចថា ការបំផ្ទុះនៅជិតស្ថានីយប៉ូលិសបានបណ្តាលឱ្យបង្អួចបែកខ្ទេចខ្ទី ខណៈរថយន្តមួយចតនៅក្បែរអគារសភាត្រូវគេដុតឆេះ។
កាកបាទក្រហមអ៊ូហ្គង់ដាបាននិយាយថា មនុស្ស ២១ នាក់ ក្នុងចំណោមអ្នករបួស ៣៣ នាក់ គឺជាមន្ត្រីប៉ូលិស៕
មនុស្ស ២១ នាក់ ក្នុងចំណោមអ្នករបួស៣៣នាក់ គឺជាមន្ត្រីប៉ូលិស