ប្រែសម្រួលៈវាសនា/ញូវេល្លី៖ នាយករដ្ឋមន្ត្រីឥណ្ឌាលោក ណារេនដ្រា ម៉ូឌី បានចុះចេញពីយន្តហោះដឹកជញ្ជូនHerculesនៅលើផ្លូវយានយន្តថ្មីមួយកាលពីថ្ងៃអង្គារទី១៦វិច្ឆិកា នៅក្នុងការរំលេចអំពីការប្រើបានទាំងទ្វេ គឺទាំងយានយន្តនិងការចុះឡើងរបស់យន្តហោះចម្បាំងក្នុងករណីគ្រាអាសន្ន។
យន្តហោះខ្នាតយក្សនេះបានចុះនៅលើផ្លូវល្បឿនលឿនទើបសាងសង់ថ្មីមួយនៅក្នុរដ្ឋអ៊ុតតាប្រាដែស មុនការបង្ហាញរបស់កងទ័ពអាកាសជាមួយនឹងយន្តហោះចម្បាំងទំនើបMirageផលិតនៅបារាំងនិង Su-30MKIsរបស់រុស្ស៊ី ដោយប្រើផ្លូវថ្នល់នេះជាកន្លែងចុះឡើងរបស់ពួកវា។
លោកម៉ូឌី បាននិយាយបន្ទាប់ពីចុះពីយន្តហោះថា « វិបុលភាពរបស់ឥណ្ឌា មានសារសំខាន់ដូចជាសន្តិសុខជាតិដែរ។ផ្លូវល្បឿនលឿននេះបានក្លាយជាផ្លូវចុះឡើងថ្មីរបស់យន្តហោះ»។
ឥណ្ឌាមានផ្លូវហាយវ៉េកូនកាត់មួយទៀតនៅក្នុងរដ្ឋរ៉ាចាស្ថាន ក្បែរព្រំដែនប៉ាគីស្ថាន តែរដ្ឋាភិបាលមានផែនការសាងសង់១២ខ្សែទៀតដើម្បីពង្រឹងសមត្ថភាពយោធារបស់ខ្លួនក្នុងពេលខ្លួនកាន់តែប្រឈមភាពតានតឹងជាមួយចិននិងប៉ាគីស្ថាន ហើយក៏កំពុងពង្រឹងទំនាក់ទំនងយោធាជាមួយអាម៉េរិកនិងបណ្តាប្រទេសលោកខាងលិច។
ផ្លូវល្បឿនលឿនPurvanchal Expressway ប្រវែង៣៥០គីឡូម៉ែត្រដែលត្រូវបានសម្ពោធបើកដោយលោកម៉ូឌី ក៏បង្កើតបានផ្នែកមួយនៃការជំរុញតំលៃរាប់ពាន់លានដុល្លារដើម្បីធ្វើអោយល្អប្រសើរឡើងបណ្តាញផ្លូវគមនាគមន៍របស់ឥណ្ឌាដែលអភិវឌ្ឍតិច។
រដ្ឋាភិបាលរបស់ម៉ូឌីនិយាយថាខ្លួនបានធ្វើអោយប្រសើរឡើងផ្លូវហាយវ៉េជាង៥០.០០០គីឡូម៉ែត្រនៅទូទាំងប្រទេសចាប់តាំងពីខ្លួនចូលកាន់អំណាចនៅឆ្នាំ២០១៤ ហើយមានផែនការសាងសង់១១.០០០គីឡូម៉ែត្រទៀតនៅឆ្នាំ២០២១៕
លោកណារេនដ្រា ម៉ូឌី ចុះចេញពីយន្តហោះក្រោយវាចុះលើផ្លូវល្បឿនលឿនទើបសាងសង់រួចមួយកាលពីថ្ងៃ១៦វិច្ឆិកានៅអ៊ុតតា ប្រាដែស