ដោយៈ រិទ្ធិសែន / ពោធិ៍សាត់៖ នៅព្រឹកថ្ងៃទី១៧ ខែវិច្ឆិកា ឆ្នាំ២០២១ ស្នងការរង នគបាល សណ្តាប់ធ្នាប់ ខេត្តពោធិសាត់ លោកឧត្តមសេនីយ៍ត្រី នូវ តាល់ និងជា តំណាងលោក ឧត្តមសេនីយ៍ទោ ស ថេង ស្នងការនគរបាល ខេត្តពោធិ៍សាត់ និងលោក វ៉ាន់ ហ៊ាង នាយកប្រតិបត្តិ កាកបាទក្រហមកម្ពុជា ខេត្តពោធិ៍សាត់ បានដឹកនាំកម្លាំងនគរបាល ចរាចរណ៍ផ្លូវគោក និងអ្នកស្ម័គ្រចិត្ត ព្រមទាំងយុវជន កាកកបាទក្រហមកម្ពុជាខេត្ត បានបើកយុទ្ធនាការ ចុះផ្សព្វផ្សាយ ស្តីពីសុវត្ថិភាព ចរាចរណ៍ផ្លូវគោក និងវិធានការទប់ស្កាត់ ការឆ្លងជំងឺកូវីដ–១៩ និងបានបំពាក់មួក សុវត្ថិភាព ចែកខិតប័ណ្ណផ្សព្វផ្សាយ អំពីច្បាប់ចរាចរណ៍ផ្លូវគោក និងចែកម៉ាស់ ជូនប្រជាពលរដ្ឋ ដែលកំពុងធ្វើចរាចរ នៅលើផ្លូវជាតិលេខ៥ ត្រង់ចំណុចស្តុបផ្សារ ភួពុយ នៅមុនពេលពិធីបុណ្យអុំទូក បណ្តែតប្រទីប សំពះព្រះខែ និងអកអំបុក នៅពេលខាងមុខនេះ។
លោកឧត្តមសេនីយ៍ត្រី នូវ តាល់ បានមានប្រសាសន៍ឲ្យដឹងថាៈ ការចុះបំពាក់មួក សុវត្ថិភាព ចែកខិតប័ណ្ណផ្សព្វផ្សាយ និងម៉ាស់ នាពេលនេះក្នុងគោលបំណងធ្វើការ ក្រើនរំលឹក ដល់បងប្អូនប្រជាពលរដ្ឋ ចូលរួមគោរពច្បាប់ចរាចរណ៍ផ្លូវគោក ស្វែងយល់អំពីហានីភ័យ និងគុណវិបត្តិ នៃការមិនគោរពច្បាប់ចរាចរណ៍ផ្លូវគោក ដើម្បីធ្វើយ៉ាងណា កាត់បន្ថយនូវ អត្រាគ្រោះថ្នាក់ចរាចរណ៍ អោយនៅទាបបំផុត។
លោក បានអោយដឹងបន្ថែមទៀតថាៈ យុទ្ធនាការនេះ ក៏បន្តអនុវត្តវិធានការ បីកុំ បីការពារ របស់រាជរដ្ឋាភិបាល និងក្រសួងសុខាភិបាល ដើម្បីបង្ការទប់ស្កាត់ ការឆ្លងរីករាលដាល នៃវីរុសកូវីដ–១៩ ក្នុងឱកាសព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែរ៕/V-PC
