ដោយ​៖ ម៉េង​ឆៃ / ភ្នំពេញ​៖ ជាថ្មី​ម្តងទៀត រដ្ឋលេខាធិការ​ក្រសួង​សាធារណការ និង​ដឹកជញ្ជូន លោកស្រី មិន មា​ណាវី បាន​អំពាវនាវ​ឲ្យ​ប្រជាពលរដ្ឋ អ្នកប្រើប្រាស់​ផ្លូវ យកចិត្តទុកដាក់ ចំពោះ​បញ្ហា​គ្រោះថ្នាក់​ចរាចរណ៍ ដូច​ករណី​ឆ្លង​រាលដាល​ជំងឺ​កូ​វីដ​១៩​។ ការអំពាវនាវ​យ៉ាង​ដូច្នេះ បន្ទាប់ពី​កម្ពុជា នៅតែ​ប្រឈម​នឹង​អត្រា​ស្លាប់ និង​របួស ដោយសារ​គ្រោះថ្នាក់​ចរាចរណ៍ ទោះ​ក្នុងស្ថានភាព​កូ​វីដ​-១៩ ក៏ដោយ​។

​លោកស្រី មិន មាណវី រដ្ឋលេខាធិការ​ក្រសួង​សាធារណការ និង​ដឹក​ញ្ជូ​ន និង​ជា​អគ្គលេខាធិការ​គណៈកម្មាធិកា​រ​ជាតិ​សុវត្ថិភាព​ចរាចរណ៍​ផ្លូវគោក បាន​ទ​ទួ​ច​ឱ្យ​ប្រជាពលរដ្ឋ​អ្នកប្រើប្រាស់​ផ្លូវ​ទាំងអស់ យកចិត្តទុកដាក់​ប្រុងប្រយ័ត្ន​ខ្ពស់​លើ​ការបង្ការ​ទប់ស្កាត់​គ្រោះថ្នាក់​ចរាចរណ៍ ខណៈ​បញ្ហា​នៃ​ជំងឺ​កូ​វីដ​១៩ នៅ​កម្ពុជា បាន​ធូរស្បើយ​ជា​បន្តបន្ទាប់​។

​ដើម្បី​ទប់ស្កាត់ និង​បង្ការ​គ្រោះថ្នាក់​ចរាចរណ៍ ក្នុងអំឡុងពេល​ឈប់សម្រាក​បុណ្យអុំទូក ចាប់ពី​ថ្ងៃទី​១៨-២០​វិច្ឆិកា គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវគោក រួម​នឹង​អាជ្ញាធរ​សមត្ថកិច្ច​ពាក់​ព័ន្ធ បាន​បើក​យុទ្ធនា​ការអប់រំ ផ្សព្វផ្សាយ​ពី​គ្រោះថ្នាក់​ចរាចរណ៍ រួមទាំង​ការចែក​មួកសុវត្ថិភាព​ដល់​អ្នកដំណើរ​ថែមទៀត​។​

​ក្នុង​ពិធី​ផ្សព្វផ្សាយ​សុវត្ថិភាព​ចរាចរណ៍​ដល់​អ្នកដំណើ​រ នៅ​ផ្លូវជាតិ​លេខ​១ ត្រង់ចំណុច​ផ្សារ​គគីរ កាលពី​ព្រឹក​ថ្ងៃទី​១៧ ខែវិច្ឆិកា លោកស្រី មិន មាណវី បាន​អះអាងថា បញ្ហា​សុវត្ថិភាព​ចរាចរណ៍ នៅតែ​បន្ត​ប្រឈម​ខ្លាំង បន្ទាប់ពី​មានការ​បើក​ដំណើរការ​ប្រទេស​ឡើងវិញ ក្រោយពី​ជំងឺ​កូ​វីដ​១៩ បាន​ធូរស្រាល ដែល​ធ្វើការ​ចរាចរណ៍​តាម​ដងផ្លូវ​មាន​ភាព​មមាញឹក​ឡើងវិញ ពិសេស​នាឱកាស​ឈប់សម្រាក​បុណ្យអុំទូក​នេះ​។​

​ទន្ទឹមនឹង​ការផ្សព្វផ្សាយ​បញ្ហា​ចរាចរណ៍ ក្រសួង​សាធារណការ និង​ដឹកជញ្ជូន ក៏បាន​ចែក​មួកសុវត្ថិភាព​ដល់​អ្នកដំណើរ បាន​ជិត ៩​ម៉ឺន​មួក ខណៈ​តាម​គម្រោង នឹង​បន្ត​ចែក​ឱ្យបាន ១០​ម៉ឺន​មួក​ថែមទៀត​។​

​ជា​មធ្យម នៅ​ទូទាំងប្រទេស គ្រោះថ្នាក់​ចរាចរណ៍​ផ្លូវគោក កើតឡើង​រៀងរាល់ថ្ងៃ ហើយ​សបាន​សម្លាប់​មនុ​ស្សច​ន្លោះ​ពី ៤​នាក់ ទៅ ៥​នាក់ ក្នុង ១​ថ្ងៃ និង​មាន​អ្នករងរបួស​ជាង ១០​នាក់ ក្នុង ១​ថ្ងៃ​។ ក្នុងពេល​បុណ្យទាន ចំនួន​អ្នកធ្វើដំណើរ កើនឡើង ហើយ​គ្រោះថ្នាក់​ចរាចរណ៍ ក៏​កើតឡើង​ច្រើន​ផងដែរ​។​

​ទន្ទឹមនឹង​កំណើន​អ្នកធ្វើដំណើរ មិន​ថា​ទៅលេង​ស្រុកកំណើត ឬក៏​ដើរលេង តាម​រមណីយដ្ឋាន​នានា ក្នុងឱកាស​ឈប់សម្រាក​ក្នុង​ពិធីបុណ្យ​អុំទូក​នេះ​ទេ សូម្បី​អ្នក​មិន​ធ្វើដំណើរ​ទៅណា​មក​ណា ក៏​ជួបជុំគ្នា ផឹកស្រា​ច្រើន​គ្នា​ដែរ​។ គ្រឿង​ស្រវឹង​នេះហើយ ជា​មូលហេតុ​មួយ ក្នុងការ​បង្ក​ឲ្យ​មាន​គ្រោះថ្នាក់​ចរាចរណ៍ ដោយសារតែ​ការបើកបរ នៅពេល​ស្រវឹង​។​

​បើ​មើ​លពី​កូ​វីដ នៅ​កម្ពុជា​យើង ទោះជា​ចំនួន​អ្នក​ឆ្លង​ថមថយ តែ​ក៏​នៅមាន​អ្នក​ឆ្លង​ប្រមាណ ៥០​នាក់ និង​ស្លាប់​ពី ៤​នាក់ ទៅ ៥​នាក់ ក្នុង ១​ថ្ងៃៗ នៅឡើយ​។ ម្នាក់ៗ ខ្លាច​ឆ្លង ខ្លាច​ឈឺ និង​ខ្លាច​ស្លាប់​ដោយសារតែ​កូ​វីដ​។ ប៉ុន្តែ​ចំពោះ​គ្រោះថ្នាក់​ចរាចរណ៍ ហាក់ដូចជា អ្នកដំណើរ​មួយចំនួន ភ្លេចខ្លួន​។ ដូច្នេះ​កុំភ្លេចថា យើង​ការពារ​កុំ​ឲ្យ​ឆ្លង​កូ​វីដ ដោយ​ពាក់​ម៉ាស លាងដៃ​ញឹកញាប់ និង​រក្សា​គម្លាត​សុវត្ថិភាព ជាដើម​។ ចំណែក​គ្រោះថ្នាក់​ចរាចរណ៍ គឺ​ត្រូវ​ពាក់មួក​សុវត្ថិភាព ពេលធ្វើ​ដំណើរ​តាម​ម៉ូតូ ហើយ​កុំ​បើកបរ​លឿន​ពេក និង​មិនត្រូវ​ទទួលទាន​គ្រឿង​ស្រវឹង​។​ល​។​

​ជារួម នៅពេល​ឈប់សម្រាក​ពី​ការងារ ឈប់សម្រាក​ពី​ការរៀនសូត្រ ជាដើម ក្នុងអំឡុងពេល​បុណ្យអុំទូក​នេះ ម្នាក់ៗ សូម​សប្បាយ​ដោយ​ការទទួលខុសត្រូវ និង​ប្រុងប្រយ័ត្ន​។ យើង​ខ្លាច​ទាំង​កូ​វីដ ហើយ​យើង​ក៏​ត្រូវតែ​ខ្លាច​គ្រោះថ្នាក់​ចរាចរណ៍​ដែរ​។ ក្នុងនោះ បើសិនជា​យើង​ការពារ​ខ្លួន​ពី​កូ​វីដ​បាន​ហើយ តែ​បែរជា​មក​រងគ្រោះថ្នាក់ ដោយសារតែ​ផឹកស្រា បណ្តាល​ឲ្យ​ខូចសុខភាព បណ្តាល​ឲ្យ​ឈឺ រហូតដល់​ពុល​ស្លាប់​ជាដើម​ផង​នោះ គឺ​មិនគួរ​កើតឡើង​ទាល់តែសោះ​។ គ្រោះថ្នាក់​ចរាចរណ៍ ក៏​ដូចគ្នា សុទ្ធតែជា​រឿង ដែល​អាច​ការពារ​បាន ហើយ​កូ​វីដ ក៏​ការពារ​បានដែរ​។ ដូច្នេះ​កុំ​ភ្លេចខ្លួន មិន​ថា កូ​វីដ ឬក៏​គ្រោះថ្នាក់​ចរាចរណ៍​នោះទេ​៕​srn