ដោយៈ សុផល / ភ្នំពេញ​៖ «​យុទ្ធសាស្ត្រ​សហប្រតិបត្តិការ សេដ្ឋកិច្ច អា​យ៉េ​យ៉ា​វ៉ា​ឌី – ចៅ​ប្រា​យ៉ា – មេគង្គ ( ACMECS)» បាន​ដើរតួនាទី​យ៉ាងសំខាន់ ក្នុង​ការជួយ​បំពេញ បន្ថែម ទៅលើ​ការកសាង សហគមន៍​សេដ្ឋកិច្ច​អាស៊ាន​។ នេះ​ជា​ប្រសាសន៍​លើកឡើង របស់លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន ថ្លែង​ក្នុង​កិច្ចប្រជុំ ACMECS លើក​ទី​បី តាម​ប្រព័ន្ធ​វីដេអូ​ពី​ចម្ងាយ កាលពី​ថ្ងៃទី​១៧ ខែវិច្ឆិកា ឆ្នាំ​២០២១​។​

​កិច្ចប្រជុំ ACMECS ដែល​ក្រោម​កិច្ចសម្របសម្រួល ពី​លោក Pablo Kang ឯកអគ្គរដ្ឋទូត​អូស្ត្រាលី ប្រចាំ​ព្រះរាជាណាចក្រ​កម្ពុជា​នេះ បាន​ត្រូវ​រៀបចំឡើង ក្នុង​គោលបំណង ស្វែងយល់ ពី​វិធី​ផ្តល់​គុណ​តម្លៃ ជា​យុទ្ធសាស្ត្រ ដល់​ក្របខណ្ឌ កិច្ចសហប្រតិបត្តិការ ACMECS ក្នុងការ​បំពេញបន្ថែម ដល់​យន្តការ អនុតំបន់​ផ្សេងទៀត ក៏ដូចជា ដើម្បី​ប្រមូល​ធាតុ​ចូល និង​មតិយោបល់​ពី ភាគី​ពាក់ព័ន្ធ​ទាំងអស់ សម្រាប់​ការពិនិត្យ ពិចារណា មុន​កិច្ចប្រជុំ​ឧ​ត្ត​ម​មន្ត្រី ACMECS​។​

​ក្រៅពី​គូសបញ្ជាក់​ពី​តួនាទី យ៉ាងសំខាន់​របស់ ACMECS លោក​ទេសរដ្ឋមន្ត្រី ក៏បាន​ជម្រាបជូន​អង្គប្រជុំ អំពី​លទ្ធផល និង​បញ្ហា​អាទិភាព ដែលជា​លទ្ធផល នៃ​កិច្ចប្រជុំ រដ្ឋមន្ត្រី​ដឹកជញ្ជូន អាស៊ាន ដែល​លោក​បាន​ធ្វើជា ប្រធាន​ដឹកនាំ​កិច្ចប្រជុំ កាលពី​ថ្ងៃទី ១១-១២ ខែវិច្ឆិកា ឆ្នាំ ២០២១​។​

​សូម​ជម្រាបជូន​ថា​៖ ACMECS ត្រូវបាន​បង្កើតឡើង នៅ​ឆ្នាំ​២០០៣ មាន​ប្រទេស​ជា សមាជិក ចំនួន ប្រាំ​រួមមាន​៖ កម្ពុជា វៀតណាម ឡាវ មី​យ៉ាន់​ម៉ា និង​ថៃ មាន​គោលបំណង ត​ភ្ជាប់​គម្លាត​សេដ្ឋកិច្ច ក្នុងចំណោម​ប្រទេស​ទាំងអស់ ជា​សមាជិក និង​លើកកម្ពស់​វិបុលភាព នៅក្នុង​អនុតំបន់ ប្រកបដោយ​និរន្តរភាព​។
​ក្របខណ្ឌ​កិច្ចសហប្រតិបត្តិការ​ថ្មី​នេះ ត្រូវបាន​រំពឹងថា នឹង​ដើរតួ​ជា​ប្លុក​អភិវឌ្ឍន៍ និង​ជំរុញ​អាស៊ាន ឱ្យ​ឆ្ពោះទៅមុខ ក្នុង​ល្បឿន​កាន់តែ​លឿន ដោយ​ឈរលើ​មូលដ្ឋាន​រឹងមាំ និង​ពឹង​ផ្អែកលើ​ខ្លួនឯង និង​វិបុលភាព រួមគ្នា​៕/V​