​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ គណៈកម្មាធិការ​អូឡាំពិក​អន្តរជាតិ (IOC)​បាន​និយាយថា តារា​វាយ​តេ​ន្នី​ស​ចិន ផឹង ស័យ​បាន​និយាយថា​នាង​មាន​សុវត្ថិភាព​និង​មាន​សុខភាព​ល្អ​ក្នុងអំឡុង​​ពេល​សន្ទនា​តាម​វីដេអូបន្តផ្ទាល់​ជាមួយ​ប្រធាន IOC កាលពី​ថ្ងៃអាទិត្យ​ទី​២១​វិច្ឆិកា ចំ​ពេល​មាន​ការព្រួយបារម្ភ​ជា​អន្តរជាតិ​អំពី​សុខុមាលភាព​របស់​នាង​បន្ទាប់ពី​មាន​ការអះអាង​ដ៏​កក្រើក​អំពី​​ការរំលោភ​ផ្លូវភេទ​។​

IOC បាន​និយាយ​នៅក្នុង​សេចក្តីថ្លែងការណ៍​មួយ​ថា នៅ​ពេល​ចាប់ផ្តើម​ការសន្ទនា​តាម​វីដេអូ​រយៈពេល ៣០ នាទី​ជា​មួយ​ប្រធាន IOC លោក ថូ​ម៉ាស បាច់ “​នាង​ផឹង ស័យ​បាន​ថ្លែងអំណរគុណ​ដល់ IOC ​សម្រាប់​ការព្រួយបារម្ភ​អំពី​សុខុមាលភាព​របស់​នាង​”​។​

IOC និយាយថា “​នាង​បាន​បកស្រាយ​ថា​នាង​មាន​សុវត្ថិភាព​និង​មាន​សុខភាព​ល្អ ដោយ​រស់​នៅ​ផ្ទះ​របស់​នា​ង​ក្នុង​ទីក្រុង​ប៉េកាំង ប៉ុន្តែ​ចង់ឱ្យ​មាន​ការគោរព​ឯកជន​ភាព​របស់​នាង​នៅពេលនេះ​”​។​

“​នោះ​ហើយ​ជា​មូលហេតុ​ដែល​នាង​ចំណាយពេល​ជាមួយ​មិត្តភក្តិ​និង​ក្រុមគ្រួសារ​ឥឡូវនេះ​។ ទោះយ៉ាងណា​ក៏ដោយ នាង​នឹង​បន្ត​ប្រឡូក​ក្នុង​កីឡា​វាយ​តេ​ន្នី​ស ដែល​ជា​កីឡា​នាង​ស្រលាញ់​ខ្លាំង​បំផុត​”​។​

​កាលពី​ព្រឹក​ថ្ងៃអាទិត្យ គេ​ឃើញ​នាង​ផឹង​បាន​ចូលរួម​ក្នុង​ការប្រកួត​តេ​ន្នី​ស​មួយ​នៅ​ទីក្រុង​ប៉េកាំង​នៅក្នុង​រូបថត​ផ្លូវការ​នៃ​ព្រឹត្តិការណ៍​នេះ​ដោយ​បង្ហាញ​មុខ​ជា​សាធារណៈ​លើកដំបូង​ចាប់​តាំងពី​នាង​​បាន​ចោទប្រកាន់​អតីត​ឧបនាយករដ្ឋមន្ត្រី ចាង កៅ​លី ថា​រំលោភ​នាង ហើយ​ការ​ចោទ​នោះ​ត្រូវបាន​លុប​ចេញ​ពី​អ៊ី​ន​ធឺ​ណេត​ភ្លាមៗ​ហើយ​នាង​ក៏​បាត់​មុខ​តាំងពី​ពេលនោះ​មក​។​

​ម្ចាស់​ជើងឯក Grand Slam ពីរ​សម័យកាល​វ័យ ៣៥ ឆ្នាំ​រូប​នេះ​បាន​ចោទប្រកាន់​កាលពីដើម​ខែ​នេះ​ថា លោក​កៅ​លី ដែល​ឥឡូវនេះ​មាន​អាយុ ៧០​ឆ្នាំ​បាន​បង្ខំ​នាង​ឱ្យ​រួមភេទ​ក្នុងអំឡុងពេល​ទំ​នាក់​​ទំនង​ស្នេហា​លួចលាក់​អស់​ជាច្រើន​ឆ្នាំ​។​

​បន្ទាប់ពី​មាន​ការផ្ទុះ​ការរិះគន់​ជា​សកល​រួម​ទាំង​ពី​កំពូល​តារា​វាយ​តេ​ន្នី​ស​លើ​ពិភពលោក​និង​អង្គការសហប្រជាជាតិ អ្នកសារព័ត៌មាន​រដ្ឋ​របស់​ចិន​បាន​ចេញផ្សាយ​វីដេអូ​ឃ្លីប​មួយ​ដែល​បង្ហាញ​ថា​នាង​​ផឹង​មិន​មាន​បញ្ហា​អ្វី​ទេ​៕

​នាង​ផឹង ស័យ​បង្ហាញ​មុខ​សាជា​ថ្មី​កាល​ពី​ថ្ងៃអាទិត្យ​អំឡុង​ការតេ​តាម​វីដេអូ​ជាមួយ​ប្រធានា IOC