ប្រែសម្រួល : កញ្ញាដាលីស (ដេលីមែល) ៖ មែននី ប៉ាកគីអៅ ដែលជាបេក្ខជនប្រធានាធិបតីហ្វីលីពីនជាទីរំពឹងខ្ពស់មួយរូបនោះ បាននិយាយថា គាត់ជាមនុស្ស “ឆោតល្ងង់” និងមិនចេះច្បាប់អ្វីទាំងអស់ នៅពេលដែលគាត់សេពថ្នាំញៀនគ្រីស្តាល់នៅវ័យជំទង់ ប៉ុន្តែគាត់ប្រកែកថាជនល្មើសសព្វថ្ងៃនេះដឹងថាគ្រឿងញៀនខុសច្បាប់ ហើយគួរតែត្រូវបានផ្តន្ទាទោស។
ប៉ាកគីអៅ ដែលជាជើងឯកប្រដាល់ពិភពលោកចូលនិវត្តន៍ គឺជាអ្នកគាំទ្រដ៏ល្បីម្នាក់នៃសង្គ្រាមប្រឆាំងគ្រឿងញៀនដ៏ឃោរឃៅរបស់ប្រធានាធិបតីរ៉ូឌ្រីហ្គោ ឌុយទែត ដែលបានសម្លាប់មនុស្សរាប់ពាន់នាក់។
ប៉ុន្តែនៅមុនពេលឈានដល់ការបោះឆ្នោតឆ្នាំ ២០២២ ប៉ាកគីអៅបានព្យាយាមរក្សាខ្លួននៅឆ្ងាយពីលោកឌុយទែតដែលកំពុងប្រឈមមុខនឹងការស៊ើបអង្កេតអន្តរជាតិចំពោះការបង្ក្រាបដ៏បង្ហូរឈាមរបស់គាត់ ហើយឥឡូវនេះបាននិយាយថាជនល្មើសគួរតែមាន “ឱកាសដើម្បីការពារខ្លួន”។
ប៉ាកគីអៅបានប្រាប់ទីភ្នាក់ងារសារព័ត៌មាន AFP ថា “យើងត្រូវតែដាក់គុកអ្នកដែលកំពុងប្រើប្រាស់គ្រឿងញៀន លក់គ្រឿងញៀន នោះហើយជាអ្វីដែលច្បាប់ចែង”ដោយប្តេជ្ញាថានឹងបន្តយុទ្ធនាការប្រឆាំងគ្រឿងញៀន “តាមរបៀបត្រឹមត្រូវ”។
ប៉ាគីអៅអាយុ ៤២ ឆ្នាំ ដែលបច្ចុប្បន្នកាន់កៅអីក្នុងព្រឹទ្ធសភា និងធ្លាប់បានបម្រើការពីរអាណត្តិនៅក្នុងសភាបាននិយាយថា “ពីមុនខ្ញុំល្ងង់ នោះហើយជាមូលហេតុដែលខ្ញុំប្រើថ្នាំញៀន…ខ្ញុំមិនចេះច្បាប់ទេ។ សព្វថ្ងៃនេះ ប្រជាជនដឹងហើយថា ច្បាប់មិនអនុញ្ញាតឱ្យមានគ្រឿងញៀនខុសច្បាប់ទេ”។
ប៉ាកគីអៅបានធ្វើឱ្យពិភពកីឡាប្រដាល់មានការភ្ញាក់ផ្អើលក្នុងឆ្នាំ ២០១៦ នៅពេលគាត់បានសារភាពថាបានប្រើប្រាស់កញ្ឆានិងសាប៊ូដែលជាឈ្មោះក្នុងស្រុកសម្រាប់ថ្នាំគ្រីស្តាល់ដែលមានតម្លៃថោកនិងកម្រិតខ្លាំង កាលពីនៅក្មេង។
ត្រូវគេស្គាល់ដោយសារការប្រែក្លាយពីអ្នកក្រទៅជាអ្នកមានដែលកើតចេញពីក្មេងតាមចិញ្ចើមថ្នល់ទៅជាអ្នកប្រដាល់ដ៏ឆ្នើមបំផុតគ្រប់សម័យកាល ប៉ាកគីអៅបានធ្វើឱ្យការប្រយុទ្ធនឹងគ្រឿងញៀន អំពើពុករលួយ និងភាពក្រីក្រជាប្រធានបទសំខាន់នៃយុទ្ធនាការរបស់គាត់ដើម្បីស្នងតំណែងបន្តពីលោកឌុយទែត៕
ប៉ាកគីអៅថាខ្លួនល្ងង់មិនចេះច្បាប់ទេទើបសេពគ្រឿងញៀនកាលពីនៅក្មេង