ដោយៈ ភ្នំស្វាយ / ព្រំដែនកម្ពុជា ថៃៈ ប្រតិភូខេត្តបី នៃកម្ពុជា ថៃ គឺខេត្តបន្ទាយមានជ័យ ខេត្តបាត់ដំបង ប្រទេសកម្ពុជា និងខេត្តស្រះកែវ ប្រទេសថៃ នឹងជួបប្រជុំគ្នា នៅវេលាម៉ោង ប្រហែលជា ២ រសៀល នៅថ្ងៃទី២៥ ខែវិច្ឆិកា ឆ្នាំ២០២១ នៅតំបន់ស្ពានមិត្តភាព កម្ពុជា ថៃ នៃច្រកព្រំដែនអន្តរជាតិ ប៉ោយប៉ែត ខេត្តបន្ទាយមានជ័យ-ខ្លងលឹក ខេត្តស្រះកែវ ។
មន្ត្រីថ្នាក់ដឹកនាំ ទាំង ៣ ខេត្ត សមភាគីកម្ពុជា មានលោក សុខ លូ អភិបាលខេត្តបាត់ដំបង លោក អ៊ុំ រាត្រី អភិបាលខេត្តបន្ទាយមានជ័យ និងសមភាគីថៃ លោក ព្រីនយ៉ា ពោធិ៍សាត់ អភិបាលខេត្តស្រះកែវ ។
លោក អភិបាលខេត្តបន្ទាយមានជ័យ បានប្រាប់រស្មីកម្ពុជានៅថ្ងៃត្រង់ទី២៥ ខែវិច្ឆិកា នេះថាៈ ពិតជាមានគម្រោងជួបប្រជុំ ពង្រឹងសម្ព័ន្ធមេត្រីភាព ៣ ខេត្តបន្ទាយមានជ័យ បាត់ដំបង (កម្ពុជា) និងខេត្តស្រះកែវ (ថៃ) មែន ហើយពេលនេះ លោកផ្ទាល់ និងលោកអភិបាល ខេត្តបាត់ដំបង និងប្រតិភូ បាននឹងកំពុងស្ថិតនៅមាត់ច្រកព្រំដែន អន្តរជាតិហើយ។
សូមរំលឹកថា កាលពីថ្ងៃទី១៧ ខែធ្នូ ឆ្នាំ២០២០ វេលាម៉ោង ១១និង១០នាទី ក៏មានកិច្ចប្រជុំ ពិភាក្សាការងារ ស្ដីពីការបន្ធូរបន្ថយច្បាប់ នៃការគ្រប់គ្រង ស្ថានការណ៍ ក្នុងគ្រាអាសន្ន ដើម្បីដោះស្រាយសេដ្ឋកិច្ច ក្នុងតំបន់ រវាងខេត្តបន្ទាយមានជ័យ ខេត្តបាត់ដំបង និងខេត្តស្រះកែវ នៅលើស្ពានមិត្តភាព កម្ពុជា-ថៃ ច្រកទ្វារព្រំដែន អន្តរជាតិ ភ្នំដី-ខៅឌិន ស្ថិតក្នុងភូមិគីឡូ ១៣ ឃុំសន្តិភាព ស្រុកសំពៅលូន ខេត្តបាត់ដំបង ព្រះរាជាណាចក្រកម្ពុជា ឈមនឹងស្រុកខ្លងហាត ខេត្តស្រះកែវ ព្រះរាជាណាចក្រថៃ រួចម្តង។
កាលណោះ មានការអញ្ជើញដឹកនាំប្រតិភូ និងចូលរួមជាកិត្តិយស ក្នុងកិច្ចប្រជុំ នាឱកាសនោះ មាន ភាគីកម្ពុជា លោក អ៊ុំ រាត្រី អភិបាលខេត្តបន្ទាយមានជ័យ, លោក ងួន រតនៈ អតីតអភិបាល ខេត្តបាត់ដំបង និងមានការចូលរួមពី សំណាក់លោកឧត្តមសេនីយ៍ទោ ច័ន្ទ រដ្ឋា មេបញ្ជាការរង យោធភូមិភាគទី៥ ទទួលបន្ទុកការងារព្រំដែន កម្ពុជា-ថៃ និងលោកអភិបាលរងខេត្ត, អភិបាល-អភិបាលរង ក្រុង-ស្រុក ជាប់ព្រំដែន ព្រមទាំងលោក ឧត្ដមសេនីយ៍ វរសេនីយ៍ ស្ថាប័នពាក់ព័ន្ធមួយចំនួន ។ រីឯភាគីថៃ លោក គៀតតិស័ក្កិ ចាន់ត្រា អភិបាលខេត្តស្រះកែវ ដោយមានការចូលរួមពីលោក ប្រធាន-អនុប្រធាន មន្ទីរ ស្ថាប័ន ពាក់ព័ន្ធ និងមន្ត្រីមុខការ ចំណុះខេត្ត ជាច្រើនរូប។
ឆ្លងតាមកិច្ចពិភាក្សា ក្នុងអង្គប្រជុំ ភាគីទាំងពីរ បានឯកភាពគ្នា លើចំណុចសំខាន់ៗ ដូចតទៅៈ ១-ឯកភាពឲ្យពលករកម្ពុជា ចូលទៅធ្វើការងារ លើវិស័យកសិកម្ម ក្នុងព្រះរាជាណាចក្រថៃ បាន ប៉ុន្តែត្រូវអនុវត្ត តាមសេចក្ដីណែនាំ របស់ក្រសួងសុខាភិបាល នៃព្រះរាជាណាចក្រថៃ (ចត្តាឡីស័ក ១៤ ថ្ងៃ), ២- ចំពោះអាជីវករកម្ពុជា ចូលទៅប្រកបអាជីវកម្ម ក្នុងផ្សាររោងក្លឿ ស្រុកអារញ្ញប្រាថេត ខេត្តស្រះកែវ ត្រូវធ្វើចត្តាឡីស័ក ១៤ ថ្ងៃ ដូចគ្នា, ៣-ដោយឡែក ការស្នើសុំបើកច្រកទ្វារព្រំដែន អន្តរជាតិស្ទឹងបត់-បានណងអៀន បណ្ដោះអាសន្ន ជាច្រក ដឹកទំនិញ ដើម្បីកាត់បន្ថយ ការកកស្ទះ នៅច្រកទ្វារព្រំដែនអន្តរជាតិ ប៉ោយប៉ែត-ខ្លងលិក ខាងភាគីថៃ និងយកសំណើនេះ ដាក់ជូនគណៈកម្មាធិការខេត្ត ដើម្បីពិនិត្យ ពិភាក្សាលំអិត បន្ទាប់ពីបានទទួលលទ្ធផល ទើបផ្ដល់ព័ត៌មាន ជូនវិញជាក្រោយ។
ភាគីទាំងពីរ នៃ ៣ ខេត្ត បានសំណូមពរ ឲ្យសមត្ថកិច្ច និងស្ថាប័នពាក់ព័ន្ធ រវាងប្រទេស ទាំងពីរ បង្កើនកិច្ចសហប្រត្តិបត្តិការ រួមគ្នា ឲ្យកាន់តែល្អប្រសើរ ប្រកបដោយប្រសិទ្ធភាពខ្ពស់ និងរក្សាស្ថានភាពដើម នៃបន្ទាត់ព្រំដែន។ រាល់ករណី កើតមានឡើង រាល់បញ្ហាផ្សេងៗ ចំពោះពលរដ្ឋ នៃប្រទេសទាំងពីរ ត្រូវផ្ដល់ព័ត៌មាន ទាន់ហេតុការណ៍ ឲ្យគ្នាទៅវិញទៅមក និងរួមគ្នាដោះស្រាយ ដោយសន្តិវិធី។
មន្ត្រីចូលរួមប្រជុំលើកនេះ ក៏បានបង្ហើបថាៈ លើកនេះ ក៏នឹងរំលឹកស្មារតីខ្លឹមសារចាស់ និង ធ្វើបច្ចុប្បន្នភាព បូកនឹងរបៀបវារៈថ្មីខ្លះ ហើយជម្រុញអោយអនុវត្ត ចេញជាលទ្ធផល ផ្លែផ្កា ជាក់ស្តែង ក្នុងបរិបទ នៃភាពធូរស្រាលខ្លះ នៃការរីករាលដាលជំងឺកូវីដ១៩ ក៏ដូចជា ការរៀបចំបើកប្រទេស ទាំងពីរ ខេត្តទាំង ៣ ឡើងវិញ។
សូមរំលឹកបន្ថែមដែរថា កាលពីព្រឹកថ្ងៃទី១៣ ខែសីហា ឆ្នាំ២០២១ លោក អភិបាល ខេត្តបន្ទាយមានជ័យ ព្រមទាំងកងកម្លាំងប្រដាប់អាវុធ ពាក់ព័ន្ធ បានជួបពិភាក្សាការងារ មួយចំនួនជាមួយ លោក ព្រីនយ៉ា ពោធិ៍សាត់ អភិបាលខេត្តស្រះកែវ ព្រះរាជាណាចក្រថៃ នៅលើស្ពានច្រកទ្វារអន្តរជាតិ ប៉ោយប៉ែត-ក្លងលឹក ដើម្បីដោះស្រាយកិច្ចការបន្ទាន់ ជាមួយចំនួន។
ជំនូបពិភាក្សា ផ្ដោតលើស្ថានភាព នៃការរាលដាលជំងឺកូវីដ ១៩ បំប្លែងថ្មី (Delta) និងការបិទព្រំដែន មិនទាន់ឱ្យពលករខ្មែរ ចូលមកទឹកដីកម្ពុជា រយៈពេល ១៤ ថ្ងៃ។
ខេត្តបន្ទាយមានជ័យ ក៏ស្នើឱ្យអាជ្ញាធរថៃ ជួយសម្រួល ដោះស្រាយបញ្ហា បងប្អូន ប្រជាពលរដ្ឋ ដែលត្រឡប់មកទឹកដីកម្ពុជា ក្នុងនោះ ត្រូវធានាទាំងសុខភាព សុវត្ថិភាព និងស្នើសុំកុំអោយមាន ការបញ្ជូនមកជាគំហុក ហើយបើមានបញ្ហាអ្វី សូមផ្តល់ព័ត៌មានបន្ទាន់ មកភាគីកម្ពុជា ដើម្បីត្រៀមលក្ខណៈ ទទួលបងប្អូន តាមវិធានសុខាភិបាល និងស្នើភាគីថៃ សម្រួលអោយគ្រូពេទ្យកម្ពុជា អាចចូលទៅចាក់វ៉ាក់សាំង បង្ការជំងឺកូវីដ១៩ ជូនពលរដ្ឋកម្ពុជា ដែលប្រកបរបរ រកស៊ីនៅផ្សាររោងក្លឿ ស្រុកអារញ្ញប្រថេត ។ មន្ត្រី បានបង្ហាញថាៈ ប៉ុន្តែ លទ្ធផលជាក់ស្តែង កន្លងមក បានតិចតួច ៕/V
