ដោយ៖ រ៉ាម៉ន / ភ្នំពេញ៖ គណៈកម្មការរៀបចំការប្រឡង រាជធានីភ្នំពេញ បានជូនដំណឹង ដល់បេក្ខជន ទាំងពីរភេទ ដែលបានដាក់ពាក្យសុំសិទ្ធិប្រឡង ចូលបម្រើការងារ នៅក្នុងក្របខណ្ឌ មន្ត្រីរាជការស៊ីវិល ដើម្បីទៅបម្រើការងារ នៅអង្គភាពនានា ចំណុះរដ្ឋបាល រាជធានីភ្នំពេញ (ក្របខណ្ឌមន្ត្រីរដ្ឋបាលជាន់ខ្ពស់ ក្របខណ្ឌមន្ត្រីក្រមការ និងក្របខណ្ឌ លេខាធិការរដ្ឋបាល) ថា កាលបរិច្ឆេទ នៃការប្រឡង នឹងប្រព្រឹត្តទៅ នៅថ្ងៃអាទិត្យ ទី២៨ ខែវិច្ឆិកា ឆ្នាំ២០២១។
សេចក្តីជូនដំណឹងដដែល បានបញ្ជាក់ថាៈ ការប្រឡងនេះ នឹងរៀបចំឡើងនៅមណ្ឌលប្រឡង វិទ្យាល័យ ជា ស៊ីម សន្ធរម៉ុក ដែលមានទីតាំង ស្ថិតនៅលើមហាវិថីកម្ពុជាក្រោម សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ។
បេក្ខជន អាចពិនិត្យមើល ឈ្មោះ លេខតុ និងលេខបន្ទប់ ក្នុងបញ្ជីរាយនាមបេក្ខជន ដែលនឹងបិទផ្សាយ នៅថ្ងៃទី២៧ ខែវិច្ឆិកា ឆ្នាំ២០២១ វេលាម៉ោង ០៩:០០ នាទីព្រឹក នៅមណ្ឌលប្រឡងវិទ្យាល័យ ជា ស៊ីម សន្ធរម៉ុក។
បេក្ខជនទាំងពីរភេទ ត្រូវរួសរាន់ ទៅមណ្ឌលប្រឡង ដើម្បីអនុវត្តវិធានការ សុខាភិបាល ដោយត្រូវវាស់កំដៅ ពាក់ម៉ាសគ្រប់ពេល (លើកលែងពេលមន្ត្រីអនុរក្ស ស្នើសុំឱ្យដោះ ម៉ាស) រក្សាគម្លាតសុវត្ថិភាព លាងដៃជាមួយអាល់កុល បង្ហាញប័ណ្ណចាក់វ៉ាក់សាំង បង្ការជំងឺកូវីដ-១៩ ឬលិខិតបញ្ជាក់ បានចាក់វ៉ាក់សាំងបង្ការជំងឺកូវីដ-១៩ មុនចូលក្នុងបរិវេណ មណ្ឌលប្រឡង។
ក្នុងករណីពុំមានបណ្ណចាក់វ៉ាក់សាំង បង្ការជំងឺកូវីដ-១៩ ឬលិខិតបញ្ជាក់ បានចាក់វ៉ាក់សាំង បង្ការជំងឺកូវីដ-១៩ គណៈកម្មការរៀបចំការប្រឡង រាជធានីភ្នំពេញ ពុំអនុញ្ញាតឱ្យចូល ក្នុងមណ្ឌល ដើម្បីប្រឡងឡើយ។
ចំពោះព័ត៌មានផ្សេងៗទៀត បេក្ខជន អាចទំនាក់ទំនង បានទៅតាមទីកន្លែង ដែលបានដាក់ ពាក្យសុំចុះឈ្មោះប្រឡង៕/V
