ប្រែសម្រួលៈវាសនា/ប៉េកាំង៖ ក្រសួងការពារជាតិចិនបាននិយាយកាលពីថ្ងៃព្រហស្បតិ៍ទី២៥វិច្ឆិកាថាវាមិនមានឳកាសចិនធ្វើការស្រុះស្រួលទេអំពីបញ្ហាតៃវ៉ាន់និងសហរដ្ឋអាម៉េរិកមិនគួរមានការយល់ច្រឡំណាមួយអំពីបញ្ហានេះ ក្រោយពីរដ្ឋាភិបាលក្រុងវ៉ាស៊ីនតោនបានបង្ករឿងជាបន្តបន្ទាប់លើបញ្ហានេះ។
ចិននិយាយថា បញ្ហាតៃវ៉ាន់ដែលចិនចាត់ទុកជាទឹកដីរបស់ខ្លួន ជាបញ្ហារសើបបំផុតនៅក្នុងទំនាក់ទំនងជាមួយអាម៉េរិក ដែលជាអ្នកគាំទ្រនិងផ្គត់ផ្គង់អាវុធធំបំផុតដល់កោះសេរីនិយមនេះ។
ការខ្វែងគំនិតគ្នាអំពីតៃវ៉ាន់នៅតែបន្តមានក្រោយកិច្ចប្រជុំកំពូលនៅខែនេះ រវាងប្រធានាធិបតីចូ បៃដិន និងសមភាគីចិន ស៊ី ជីនភីង។
លោកស៊ីធ្លាប់បានមានប្រសាសន៍ថា អ្នកនៅកោះតៃវ៉ាន់ដែលស្វះស្វែងរកឯករាជ្យភាព និងអ្នកគាំទ្ររបស់គេនៅអាម៉េរិកកំពុង«លលេងជាមួយភ្លើង»ហើយ។
អ្នកនាំពាក្យក្រសួងការពារជាតិចិនលោក វូ គៀន
ក្នុងសន្និសីទសារព័ត៌មានមួយនៅក្រុងប៉េកាំង អ្នកនាំពាក្យក្រសួងការពារជាតិចិនលោក វូ គៀន បាននិយាយថា ការមានទំនាក់ទំនងល្អនិងឋិតថេរមួយជាការល្អសំរាប់ភាគីទាំងពីរ និងជាអ្វីដែលពិភពលោកចង់បាន។ចិនមានបំណងរក្សាការផ្លាស់ប្តូរនិងកិច្ចសហប្រតិបត្តិការជាមួយអាម៉េរិកតែ«មួយរយៈពេលកន្លងមក ភាគីអាម៉េរិកបាននិយាយមិនទទួលខុសត្រូវច្រើននិងធ្វើការងារបែបបង្ករឿងច្រើនពាក់ព័ន្ធនឹងតៃវ៉ាន់ សមុទ្រចិនខាងត្បូង ព្រមទាំងប្រតិបត្តិការឈ្លបយកការណ៍ពីយន្តហោះនិងនាវាចម្បាំងអាម៉េរិក»។
លោកបានបន្ថែមថា ចិនមានគោលការណ៍សំរាប់ការអភិវឌ្ឍទំនាក់ទំនងរវាងយោធានៃប្រទេសទាំងពីរ តែមិនត្រូវរំលោភអធិបតេយ្យភាព សេចក្តីថ្លៃថ្នូរនិងផលប្រយោជន៍ស្នូលឡើយ «ជាពិសេសបញ្ហាតៃវ៉ាន់ ចិនគ្មានឳកាសធ្វើការស្រុះស្រួល ហើយភាគីអាម៉េរិកគួរកុំភ័ន្តច្រឡំណាមួយអំពីរឿងនេះ»។
សាររបស់ក្រសួងការពារជាតិចិននេះកើតឡើងក្រោយពីអ្នកនាំពាក្យក្រសួងការបរទេសចិនលោក ចាវ លីជៀន កាលពីថ្ងៃពុធ បានសម្តែងការប្រឆាំងការដែលអាម៉េរិកសំរេចអញ្ជើញតៃវ៉ាន់អោយចូលរួមក្នុងអ្វីដែលគេហៅថា ជំនួបកំពូលមេដឹកនាំសំរាប់លទ្ធិប្រជាធិបតេយ្យនៅខែធ្នូ និងបានទទូចសុំអោយអាម៉េរិកឈប់ជួយ«កម្លាំងឯករាជ្យតៃវ៉ាន់»។
លោកថា «នៅក្នុងច្បាប់អន្តរជាតិតៃវ៉ាន់មិនមានឋានៈណាផ្សេងក្រៅតែពីជាផ្នែករបស់ចិនព្រោះកោះនេះជាផ្នែកនៃទឹកដីចិនដែលមិនអាចកាត់ចេញបាន។អាម៉េរិកគួរឈប់ផ្តល់វេទិកាណាមួយសំរាប់កងកម្លាំងឯករាជ្យតៃវ៉ាន់ហើយ«ការលលេងជាមួយភ្លើង លទ្ធផលវានឹងរលាកតែប៉ុណ្ណោះ»៕
លោក ចាវ លីជៀន បាននិយាយថា អាម៉េរិកគួរឈប់ជាបន្ទាន់ការបង្កើនទំនាក់ទំនងជាមួយតៃវ៉ាន់និងជៀសវាងការបញ្ជូនសញ្ញាខុសណាមួយទៅកាន់កម្លាំងនិយមឯករាជ្យតៃវ៉ាន់