ប្រែសម្រួល : កញ្ញាដាលីស (ដេលីមែល) ៖ កាលពីថ្ងៃព្រហស្បតិ៍ទី២៥វិច្ឆិកា បារាំងបានចាប់ផ្តើមផែនការផ្តល់វ៉ាក់សាំងកូវីដ១៩ដូសជំរុញដល់មនុស្សពេញវ័យទាំងអស់ខណៈប្រទេសនេះជ្រើសយកការប្រឆាំងនឹងការបិទខ្ទប់ឬបម្រាមគោចរបន្ថែមទៀតដើម្បីជួយប្រយុទ្ធប្រឆាំងនឹងការកើនឡើងគួរឱ្យព្រួយបារម្ភនៃការឆ្លងវីរុសកូរ៉ូណានៅក្នុងប្រទេស។
ការឆ្លងវីរុសកូរ៉ូណាបានហក់ឡើងខ្ពស់នៅក្នុងប្រទេសបារាំងក្នុងរយៈពេលប៉ុន្មានថ្ងៃចុងក្រោយនេះ ដោយករណីថ្មីប្រចាំថ្ងៃបានកើនឡើងលើសពីខ្ទង់ ៣០.០០០នាក់ហើយការសម្រាកព្យាបាលនៅមន្ទីរពេទ្យនិងការស្លាប់ទាក់ទងនឹងវីរុសកូរ៉ូណាកំពុងកើនឡើងម្តងទៀត។
រដ្ឋមន្ត្រីសុខាភិបាលបារាំងលោក អូលីវីយ៉េ វើរ៉ាន់ បានដាក់ចេញនូវផែនការនេះក្នុងអំឡុងសន្និសីទសារព័ត៌មានមួយ ដែលក្នុងនោះលោកបានប្រកាសបន្ថយចន្លោះពេលរវាងការចាក់ដូសទីពីរនិងទីបីពី៦ខែមកនៅត្រឹម៥ខែ។ លោកបាននិយាយថា បារាំងមានវ៉ាក់សាំងគ្រប់គ្រាន់រួចហើយដើម្បីចាប់ផ្តើមយុទ្ធនាចាក់ដូសជំរុញទូទាំងប្រទេស។
លោកវើរ៉ាន់ក៏បានដាក់ចេញនូវវិធានការមួយចំនួនផងដែរដែលគេមើលឃើញថាជាការរឹតបន្តឹងការប្រើប្រាស់ម៉ាស់នៅតាមទីសាធារណៈ ហើយនិយាយថា បណ្ណវ៉ាក់សាំងដែលគេទាមទារឱ្យមាននៅតាមទីកន្លែងបិទជិតខាងក្នុងភាគច្រើននៅទូទាំងប្រទេសនឹងលែងមានសុពលភាព ប្រសិនបើមនុស្សមិនបានចាក់ដូសជំរុញនៅប្រាំពីរខែនៃដូសទីពីរ។
លោកបាននិយាយថាមានមនុស្សមិនទាន់ចាក់វ៉ាក់សាំងច្រើនជាង១០ដងបច្ចុប្បន្នកំពុងសម្រាកព្យាបាលនៅមន្ទីរពេទ្យដោយសារវីរុសកូរ៉ូណាធៀបនឹងអ្នកចាក់វ៉ាក់សាំង ហើយលោកបានបន្ថែមថា បើគ្មានវ៉ាក់សាំងទេ ប្រទេសច្បាស់ជាកំពុងបិទខ្ទប់រួចទៅហើយឥឡូវនេះ។
ជាង ៨៩ ភាគរយនៃមនុស្សពេញវ័យជនជាតិបារាំងត្រូវបានចាក់វ៉ាក់សាំង ប៉ុន្តែអ្នកដែលងាយរងគ្រោះបំផុតបានចាក់វ៉ាក់សាំងតាំងពីដើមឆ្នាំ ហើយដូច្នេះភាពស៊ាំត្រូវគេជឿថាបានធ្លាក់ចុះអស់ទៅហើយ។ កុមារដែលមានអាយុក្រោម ១២ ឆ្នាំមិនទាន់ទទួលបានវ៉ាក់សាំងនៅឡើយទេនៅក្នុងប្រទេសបារាំង ទោះបីជារឿងនេះអាចផ្លាស់ប្តូរបន្ទាប់ពីទីភ្នាក់ងារឱសថអឺរ៉ុបកាលពីថ្ងៃព្រហស្បតិ៍បានអនុញ្ញាតឱ្យចាក់វ៉ាក់សាំង Pfizer សម្រាប់ក្មេងអាយុ ៥-១១ ឆ្នាំក៏ដោយ៕
រដ្ឋមន្ត្រីសុខាភិបាលបារាំងលោក អូលីវីយ៉េ វើរ៉ាន់