ប្រែសម្រួលៈវាសនា/ហ្សឺណែវ៖ អង្គការសុខភាពពិភពលោក(WHO) កាលពីថ្ងៃសុក្របានប្រកាសថាវីរុសកូរ៉ូណាបំប្លែងខ្លួនទើបរកឃើញថ្មី B.1.1.529 ជាប្រភេទវីរុសគួរអោយព្រួយបារម្ភ និងបានដាក់ឈ្មោះថ្មីថា អូមីក្រុង( Omicron)។
ការចាត់ថ្នាក់នេះដាក់ Omicronទៅក្នុងក្រុមវីរុសកូវីដ១៩បំប្លែងខ្លួនដែលបង្កបញ្ហាបំផុត ជាមួយវីរុសដែលកំពុងវាយលុកពិភពលោកបច្ចុប្បន្ន ដែលតា(Delta)និងក្រុមខ្សោយជាងអាល់ហ្វា(Alpha)បេតា(Beta )និងហ្កាម៉ា(Gamma)។
ប្រទេសជាច្រើនបានប្រញាប់ប្រញាល់ហាមការធ្វើដំណើរទៅនិងមកពីប្រទេសមួយចំនួននៅអាហ្វ្រិកភាគខាងត្បូង ជាពិសេសប្រទេសអាហ្វ្រិកខាងត្បូង នៅពេលថ្លៃប្រេងឆៅបានធ្លាក់ចុះដោយសារតែទីផ្សារប្រេងព្រួយបារម្ភអំពីវីរុសថ្មី ដែលរារាំងការធ្វើដំណើរផ្លូវអាកាស។
ទីភ្នាក់ងារសុខភាពពិភពលោកនេះបាននិយាយនៅក្នុងសេចក្តីថ្លែងការណ៍មួយថា « ផ្អែកលើភស្តុតាងបង្ហាញថាមានការប្រែប្រួលនៅក្នុងជំងឺកូវីដ១៩…WHOចាត់វីរុសB.1.1.529ជាប្រភេទវីរុសបំប្លែងខ្លួនគួរអោយព្រួយបារម្ភ(VOC)និងដាក់ឈ្មោះអោយថាOmicron»។
WHO បាននិយាយថា វាអាចត្រូវចំណាយពេលរាប់សប្តាហ៍ដើម្បីបញ្ចប់ការសិក្សាលើOmicronដើម្បីអោយដឹងថាតើមានការប្រែប្រួលណាមួយនៅការចម្លង ភាពធ្ងន់ធ្ងរនៃជំងឺនិងប្រសិទ្ធភាពរបស់វ៉ាក់សាំងលើវា ការធ្វើតេស្តិ៍រកនិងការព្យាបាលវា។
វីរុសបំប្លែងខ្លួននេះ ត្រូវបានគេរាយការណ៍ដំបូងពីប្រទេសអាហ្វ្រិកខាងត្បូងមកកាន់អង្គការសុខភាពពិភពលោកកាលពីថ្ងៃពុធ។ការឆ្លងOmicronដែលគេដឹងដំបូងចេញពីសំណាកដែលគេប្រមូលកាលពីថ្ងៃ៩វិច្ឆិកា។នៅប៉ុន្មានសប្តាហ៍ចុងក្រោយនេះការឆ្លងកូវីដ១៩នៅអាហ្វ្រិកខាងត្បូងបានកើនឡើងថេរ ចំពេលមានការរកឃើញOmicronនៅទីនោះ។
បើតាមWHO វីរុសនេះបានបំប្លែងខ្លួនជាច្រើនលើក ដែលខ្លះគួរអោយព្រួយបារម្ភ ហើយភស្តុតាងដំបូងៗបង្ហាញកំណើននៃការឆ្លងវីរុសប្រភេទនេះពោលគឺការឆ្លងOmicronបានកើតមានស្ទើរគ្រប់ខេត្តនៅអាហ្វ្រិកខាងត្បូង។
គ្រប់វីរុសតែងវិវត្តប្រែប្រួលទៅតាមពេល រួមទាំងវីរុសSARS-CoV-2ជាវីរុសកូរ៉ូណាដើមដែលបង្កជំងឺកូវីដ១៩។
ក្នុងអំឡុងចុងឆ្នាំ២០២០ វីរុសបំប្លែងខ្លួនបានលេចឡើងជាច្រើនដែលបង្កជាហានិភ័យដល់សុខភាពពិភពលោកនិងនាំអោយអង្គការWHOចាប់ផ្តើមចាត់ថ្នាក់និងដាក់ឈ្មោះអោយពួកវា ដូចជាវីរុសបំប្លែងខ្លួនគួរអោយចាប់អារម្មណ៍ វីរុសបំប្លែងខ្លួនគួរអោយព្រួយបារម្ភ ដើម្បីជូនដំណឹងអំពីស្ថានភាពជំងឺ។
WHOកាលពីថ្ងៃសុក្រក៏បានអំពាវនាវអោយប្រទេសនានាក្នុងលោកបង្កើនការប្រុងប្រយ័ត្ននិងខិតខំវិភាគរៀបលំដាប់DNAវីរុស ដើម្បីយល់ដឹងកាន់តែប្រសើរឡើងអំពីចរាចរណ៍របស់វា។
ក្រៅពីអាហ្វ្រិកខាងត្បូង Omicronត្រូវបានរកឃើញនៅអ៊ីស្រាអែលលើមនុស្សម្នាក់មកពីប្រទេសម៉ាឡាវី ,បុតស្វាណា,បែលហ្សិចនិងហុងកុង។
ទោះជាប្រទេសជាច្រើនបានហាមការធ្វើដំណើរមកពីអាហ្វ្រិក ក៏មុននេះអង្គការWHOប្រាប់អោយប្រយ័ត្នប្រយែងអំពីការរឹតត្បិតការធ្វើដំណើរដោយសារតែOmicron និងថាប្រទេសនានាគួរចាត់វិធានការបែបវិទ្យាសាស្ត្រនិងផ្អែកលើហានិភ័យ ពេលនិយាយអំពីបំរាមការធ្វើដំណើរដោយសារវីរុសថ្មីនេះ ៕