ដោយៈ ទេព មង្គល / ភ្នំពេញៈ ក្រសួងសុខាភិបាល បានចេញសេចក្ដីប្រកាសព័ត៌មានមួយ នៅថ្ងៃទី២៧ ខែវិច្ឆិកា ឆ្នាំ២០២១ នេះ ស្ដីពីការរកឃើញ និងការវិវត្តន៍វីរុស កូវីដ-១៩ បំប្លែងខ្លួនថ្មី មានឈ្មោះថា ” អូមីក្រុង (Omicron) ” ដែលអង្គការសុខភាពពិភពលោក បាននិងកំពុងតាមដាន យ៉ាងយកចិត្តទុកដាក់ លើវីរុសបំប្លែងខ្លួនថ្មីនេះ។
ដើម្បីការពារ និងទប់ស្កាត់ បានទាន់ពេលវេលា នូវការចម្លងវីរុសប្រភេទថ្មី ខាងលើនេះ និងដើម្បីបន្តនិរន្តភាព នៃការរស់នៅ ក្នុងប្រក្រតីភាពថ្មី ក្នុងសង្គមកម្ពុជា លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល សូមអំពាវនាវ និងក្រើនរំលឹក ដល់បងប្អូន ប្រជាពលរដ្ឋទាំងអស់ ដូចតទៅ៖
១. សូមបន្តអនុវត្តវិធានការសំខាន់ៗ ជាពិសេសសូមបន្តអនុវត្តវិធានការ «ពាការពារ និង៣កុំ» ឱ្យបានហ្មត់ចត់ ដើម្បីកាត់បន្ថយ ហានិភ័យនៃ ការឆ្លងវីរុសកូវីដ-១៩ រួមទាំងអនុវត្តវិធានការ សុខភាពសាធារណៈ និងសង្គមចាំបាច់នានា ដូចជា ការពាក់ម៉ាស់ ឱ្យបានត្រឹមត្រូវ អនាម័យដៃ ដោយលាងសម្អាតញឹកញាប់ ការរក្សាគម្លាតសុវត្ថិភាព បុគ្គល ១,៥ ម៉ែត្រឡើង ការកែលម្អខ្យល់ចេញចូល នៃទីធ្លាក្នុងផ្ទះ ឬទីតាំងការងារ ឬទីតាំងប្រកបរបររកស៊ីទទួលទាន ចៀសវាងកន្លែង មានមនុស្សច្រើន កន្លែងដែលបិទជិត គ្មានខ្យល់ចេញចូល និងទទួលចាក់ថ្នាំបង្ការជំងឺកូដ-១៩ ឱ្យបានគ្រប់ដូសមូលដ្ឋាន ទាំងអស់គ្នា។
២. រាយការណ៍ជូនអាជ្ញាធរមូលដ្ឋាន ឬគ្រូពេទ្យ ដែលនៅជិតលោកអ្នក អំពីករណីសង្ស័យ ណាមួយ ដែលពាក់ព័ន្ធទៅនឹងភាពខុសប្លែកធម្មតា នៃរោគសញ្ញា ឬជំងឺ និងត្រូវនៅដាច់ ដោយឡែក ដើម្បីកុំឱ្យមានការចម្លងបន្ត ទៅអ្នកដែលនៅជិតខ្លួន ឬក្រុមគ្រួសារខ្លួន ក្នុងពេលរង់ចាំការវិភាគ ដើម្បីរកវីរុសកូវីដ-១៩ថ្មីនេះ។
៣. ត្រូវជំរុញប្រជាពលរដ្ឋ ឱ្យទៅទទួលការចាក់វ៉ាក់សាំង កូវីដ-១៩ ឱ្យបានគ្រប់គ្នា ជាពិសេស ជនដែលងាយរងគ្រោះ និងបង្កើនការយកចិត្តទុកដាក់ បន្ថែមទៀត ដោយបុគ្គលម្នាក់ៗ ត្រូវទទួលខុសត្រូវ លើការការពារខ្លួន ព្រមទាំងគ្រួសារ និងសហគមន៍ ត្រូវលើកកម្ពស់ការចូលរួម តាមដាន និងអនុវត្តវិធានការការពារ និងស្វែងរកការព្យាបាល ឱ្យបានទាន់ពេលវេលា ដើម្បីជួយសង្គ្រោះអាយុជីវិត អ្នកជំងឺធ្ងន់ៗ ជាដើម៕/V
