ដោយ​: វ៉ៃ​កូ / ខេត្តស្វាយរៀង​: លោក ម៉ែន វិបុល អភិបាល នៃ​គណៈ​អភិបាលខេត្ត​ស្វាយរៀង នា​ព្រឹក​ថ្ងៃទី​២៨ ខែវិច្ឆិកា ឆ្នាំ​២០២១​នេះ បាន​អញ្ជើញ​ជា​អធិបតី​ក្នុង​ពិធី​បើក​វិញ្ញាសារ ប្រឡង​ជ្រើសរើស​បេក្ខជន​ឲ្យ​ចូល​បម្រើ​ការងារ​នៅក្នុង​ក្របខ័ណ្ឌ​មន្ត្រីរាជការ​ស៊ីវិល​ក្រសួងមហាផ្ទៃ សម្រាប់​សាលាខេត្ត​ស្វាយរៀង ឆ្នាំ​២០២១ នៅ​មណ្ឌល​ប្រឡង​វិទ្យាល័យ ស្វាយរៀង​។

​ពិធី​នេះ​ក៏មាន​ការ អញ្ជើញ​ចូលរួម​ពី​លោក អភិបាលរង​ខេត្ត លោកនាយ​រដ្ឋបាល​សាលាខេត្ត លោកនាយក​ទីចាត់ការ​សាលាខេត្ត ព្រមទាំង​មន្ត្រីរាជការ​ពាក់ព័ន្ធ​មួយចំនួនទៀត​។

​មានប្រសាសន៍​ក្នុងឱកាស​នោះ លោក​អភិបាលខេត្ត បាន​លើកទឹកចិត្ត​ដល់​បេក្ខជន​ទាំងអស់​ត្រូវខិតខំ​ប្រឹង​ប្រែង​ឲ្យ​អស់ពី​សមត្ថភាព ធ្វើ​ឲ្យ​បាន​រួចរាល់​លើ​គ្រប់​វិញ្ញាសារ​ដែល​បានដាក់​ក្នុងការ​ប្រឡង គោរព​ឲ្យ​បាន​ខ្ជាប់ខ្ជួន​នូវ​បទ​ប្បញ្ញត្តិ និង​បទបញ្ជាផ្ទៃក្នុង​នៃ​ការប្រឡង ដោយ​មិនត្រូវ​លួច​ចម្លង​គ្នា មើលគ្នា ពិភាក្សាគ្នា មិនត្រូវ​គូសសញ្ញា​សម្គាល់​លើ​ក្រដាស វិញ្ញាសារ និង​លួចលាក់​ប្រើប្រាស់​ឧបករណ៍​អេ​ឡិច​ត្រូ​និ​ច​នោះឡើយ ហើយ​លោក​ក៏បាន​ជូនពរ​ឲ្យ​បេក្ខជន​ទទួលបាន​ជោគជ័យ​ក្នុងការ​ប្រឡង​ផងដែរ​។

​សូមបញ្ជាក់​ជូន​ផងដែរ​ថា វិញ្ញាសារ​ប្រឡង ក្របខ័ណ្ឌ​មន្ត្រីរដ្ឋបាល​ជាន់ខ្ពស់ និង​ក្របខ័ណ្ឌ​មន្ត្រី​ក្រមការ​រយះពេល​មួយ​ព្រឹក​នេះ រួមមាន​៖ ជំនាញ​ឯកទេស និង​ភាសារ​អង់គ្លេស​៕​