​ប្រែ​សម្រួលៈ​វាសនា​/​ញូវយ៉ក​៖ អង្គការសហប្រជាជាតិ​កាលពី​ថ្ងៃ​ចន្ទ​ទី​២៩​វិច្ឆិកា​បាន​ទទូច​សុំ​ហ្វីលីពីន​អោយ​អនុញ្ញាត​ជ័យលាភី​រង្វាន់​ណូបែល​សន្តិភាព​និង​ជា​អ្នកកាសែត​លោកស្រី ម៉ា​រី​យ៉ា រេស​សា ធ្វើ​​ដំណើរ​ទៅកាន់​ប្រទេសន័​រវេស​នៅ​ខែ​ក្រោយ​ដើម្បី​ទទួល​រង្វាន់​។​

​រេស​សា បាន​ទទួល​រង្វាន់​ដ៏​មាន​កិត្យានុភាព​នេះ រួមគ្នា​ជាមួយ​អ្នកកាសែត​រុស្ស៊ី​លោក ឌី​មី​ទ្រី មូរ៉ា​តូ​វ សំរាប់​សេចក្តីក្លាហាន​របស់​គេ​ក្នុង​ការជំរុញ​សិទ្ធិ​និយាយ​ដោយ​សេរី ដែល​កំពុង​រង​ការវាយប្រហារ​នៅ​​ទូទាំង​ពិភពលោក​។​

​អ្នកកាសែត​ជើងចាស់​រូបនេះ​បាន​ស្នើ​សុំ​រដ្ឋាភិបាល​អោយ​លោកស្រី​ចេញពី​ប្រទេស​ទៅកាន់ន័​រវេស ដើម្បី​ទទួល​រង្វាន់​នៅ​ថ្ងៃ​១០​ធ្នូ តែ​រដ្ឋាភិបាល​បាន​និយាយថា​លោកស្រី ប្រឈម​បណ្តឹង​ផ្លូវ​ច្បាប់​ជាច្រើន​​ហើយ​ចុង​ចម្លើយ​អាច​រត់គេច​ចេញពី​ការប្រឈមមុខ​ផ្លូវច្បាប់​បើសិនជា​ត្រូវ​អនុញ្ញាត​អោយ​ចាកចេញ​ពី​ប្រទេស​។​

​ស្ទេ​ហ្វាន ឌុយ​ចារិក អ្នកនាំពាក្យ​របស់​លោក​អគ្គលេខា​អង្គការសហប្រជាជាតិ បាន​និយាយថា អង្គការសហប្រជាជាតិ​«​ព្រួយបារម្ភ​ណាស់​»​អំពី​ការ​រឹតត្បិត​លើ​ការ​ធ្វើ​ដំណើរ​ដែល​អាជ្ញាធរ​ដាក់​លើ រេស​សា​។​«​យើង​ទទូច​សុំអោយ​រដ្ឋាភិបាល​ហ្វីលីពីន ដកចេញ​ការ​រឹតត្បិត​ដូច្នេះ​ជាបន្ទាន់ និង​អនុញ្ញាត​អោយ​លោកស្រី​ធ្វើដំណើរ​ទៅ​កាន់​ទីក្រុង​អូ​ស្លូ​»​។​

​សូមបញ្ជាក់​ថា អាជ្ញា​បណ្ណ​សំរាប់​គេហទំព័រ​សារព័ត៌មាន​Rappler​របស់​រេស​សា ត្រូវ​បាន​ព្យួរ​និង​លោកស្រី​ប្រឈម​បណ្តឹង​ជាច្រើន តែ​អ្នកគាំទ្រ​យល់​ថា​លោកស្រី​ជា​គោលដៅ​នៃ​ស្វែងរក​ចាប់កំហុស​ដាក់ទោស​​ដោយសារតែ​លោក​ស្រី​រិះគន់​គោលនយោបាយ​របស់​រដ្ឋាភិបាល រួម​មាន​សង្គ្រាម​ថ្នាំញៀន​ដ៏​បង្ហូរឈាម ដែល​ដឹកនាំ​ធ្វើ​ដោយ​ប្រធានាធិបតី រ៉ូ​ឌ្រី​ហ្គោ ទុយ​ទែត​៕

​អ្នកកាសែត​លោក​ស្រី ម៉ា​រី​យ៉ា រេស​សា