ដោយៈ​ពៅ និមល​/​ភ្នំពេញៈ​នៅ​ថ្ងៃអាទិត្យ​ទី​៥ ខែធ្នូ ឆ្នាំ​២០២១ លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ បាន​អញ្ជើញ​មក​បំពេញបេសកកម្ម​ជាមួយ​ក្រុមការងារ​អន្តរក្រសួង​ដែល​ដឹកនាំ​ដោយ​លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួង​ដែនដី នគរូបនីយកម្ម និង​សំណង់ ដើម្បី​ចុះមក​ពិនិត្យ និង​ចាត់វិធានការ​បង្ក្រាប​ការទន្ទ្រាន​ដី​រដ្ឋ​ក្នុង​ដែន​ព្រៃ​លិច​ទឹក​នៅ​តំបន់​បឹង​ទន្លេសាប​ស្ថិតក្នុង​ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ និង​ខេត្តសៀមរាប​។

​លោក វេ​ង សាខុន រដ្ឋមន្ត្រី​ក្រសួងកសិកម្ម​បានបញ្ជាក់​នៅក្នុង​បណ្ដាញ​សង្គម​ហ្វេ​ស​ប៊ុ​កនៅ​ថ្ងៃទី​៥​ខែធ្នូ​ថា សម្រាប់​ថ្ងៃទី​១ នៃ​ដំណើរ​បេសកកម្ម​រយ​:​ពេល​បី​ថ្ងៃ​គិត​ចាប់ពី​ថ្ងៃទី​៥ ដល់​ថ្ងៃទី​៧ ខែធ្នូ នេះ​មាន​កម្មវិធី​ដូចតទៅ​៖​កម្មវិធី​ទី​១ ៖ ខេត្តពោធិ៍សាត់ បាន​ចុះ​ពិនិត្យ​ទីតាំង​ជាក់ស្តែង​នៃ​ការរំលោភ​កាប់ ទន្ទ្រាន​យក​ដីព្រៃ​រដ្ឋ​ធ្វើជា​កម្មសិទ្ធិ ក្នុង​ឃុំ​កំពង់​លួង ស្រុក​ក្រគរ​។ បន្ទាប់មក​នៅវេលា​ម៉ោង ១០:០០ ក្រុមការងារ​អន្តរក្រសួង បាន​អញ្ជើញ​ចូលរួម​ប្រជុំ ដែល​កិច្ចប្រជុំ​នេះ​ដឹកនាំ​ដោយ​លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួង​ដែនដី នគរូបនីយកម្ម និង​សំណង់ ដើម្បី​បូកសរុប​ស្ថានភាព​ជារួម ពិនិត្យ វាយតម្លៃ និង​ដាក់ចេញ​នូវ​វិធានការ​ដោះស្រាយ​។​

​យោងតាម​របាយការណ៍​របស់​ក្រុមការងារ​អន្តរក្រសួង​បាន​ឲ្យ​ដឹងថា តំបន់ ៣ នៃ​ភូមិសាស្ត្រ​ខត្ត​ពោធិ៍សាត់ មាន​ទំហំ​ផ្ទៃដី​ចំនួន ៩៤ ១៤២ ហិកតា​ស្មើ ១៤,៥២​ភាគរយ នៃ​ទំហំ​ផ្ទៃដី​តំបន់ ៣ ទូទាំងប្រទេស​ដែលមាន​ផ្ទៃដី​សរុប​ចំនួន ៦៤៧ ៤០៦​ហ​ត ក្នុងស្រុក​ចំនួន​បី គឺ​៖ ១. ស្រុក​បាកាន​មាន​ចំនួន ៤​ឃុំ (​ស្នាម​ព្រះ​, បឹង​បត់​កណ្ដាល​, ឈើ​ទឹក​, អូរ​តា​ប៉ោង​) មាន​ប្រជា​ពល​ល​រដ្ឋ​ចំនួន ៣៤៩ គ្រួសារ កំពុង​អាស្រ័យ​ផល​លើ​ផ្ទៃដី ១ ០២២,៦៨​ហិកតា​។ ២. ស្រុក​កណ្តៀង មាន​ទំ​នួន ៦​ឃុំ (​កោះធំ ស្រែ​ស្តូក​, កណ្ដៀង​, ស្យា​, កញ្ជួរ និង​ឃុំ​រាំង​ទិល​)​មាន​ប្រជាពលរដ្ឋ​ចំនួន ៦៦២ គ្រួសារ កំពុង​អាស្រ័យ​ផល​លើ​ផ្ទៃដី ១៨៦៣,៧៩ ហិកតា​។​៣. ស្រុក​ក្រគរ មាន​ចំនួន ៧​ឃុំ (​អ​ន្សា​ចំបក់​, ក្បាល់​ត្រា​, កំពង់​លួង​, អន្លង់ត្នោត​, ស្នា​អ​ន្សោ​ង កំពង់​ពោធិ៍ និង​ឃុំ​អូរសណ្ដាន់​) មាន​ប្រជាពលរដ្ឋ​ចំនួន ៩១០​គ្រួសារ កំពុង​អាស្រ័យ​ផល​លើ ផ្ទៃដី ១ ៥៤៧,៦​ហិកតា​។

​លោក​រដ្ឋមន្ត្រី​បន្តថា សរុប​ជារួម​ខេត្តពោធិ៍សាត់ មាន​ប្រជាពលរដ្ឋ​ចំនួន ១.៩២១ គ្រួសារ កំពុង​អាស្រ័យ​ផល​ក្នុង​តំបន់​៣ លើ​ផ្ទៃដី ៤ ០០០,២៨ ហ​ត ក្នុងនោះ​មុន​ឆ្នាំ​២០១២ មាន ១៤០៩ គ្រួសារ លើ​ផ្ទៃដី ២ ៦៤១, ៤៨ ហិកតា និង​ក្រោយ​ឆ្នាំ ២០១២ មាន ៥១២ គ្រួសារ លើ​ផ្ទៃដី ១ ៣៥៨,៨ ហិកតា​។​

​បន្ទាប់ពី​ទទួលបាន​សេចក្តីរាយការណ៍​ពី​មន្ត្រី​ជំនាញ និង​ពិនិត្យ​ពិភាក្សា ជាមួយ​ក្រសួង​ពាក់ព័ន្ធ​រួចមក​អង្គប្រជុំ​ទាំងមូល បានសម្រេច​ដាក់ចេញ​វិធានការ មួយចំនួន​។​ក្នុងនោះ​៖១. ជូន​រដ្ឋបាល​ខេត្តពោធិ៍សាត់​ចេញ​លិខិត​ណែនាំ​ដល់​អាជ្ញាធរ​ស្រុក ឃុំ​បញ្ឈប់​ការពិនិត្យ​បញ្ជា​ក់លើ​លិខិត​សុំ​កាន់កាប់​ដី​និង​លិខិត​ផ្ទេរសិទ្ធិ​កាន់កាប់​ដី​ក្នុង​ដែន​ព្រៃ​លិច​ទឹក​ព្រមទាំង​ចេញ​លិខិត​បដិសេធ​លើ​រាល់​លិខិត​ដែល​បាន​ចេញរួច​ពី​ពេលមុន​។​២.​ជូន​រដ្ឋបាល​ខេត្តពោធិ៍សាត់​ចាត់វិធានការ​បញ្ឈប់​ការចូល​ទន្ទ្រាន​ដី​ដែន​ព្រៃ​លិច​ទឹក​បន្តទៀត ធ្វើ អត្តសញ្ញាណ​អ្នក​ដែល​បាន​ចូល​ទន្ទ្រាន ដើម្បី​ធ្វើការ​ដកហូត​ដី​និង​ចាត់វិធានការ​តាមផ្លូវ​ច្បាប់ ដោយ​ត្រូវ​កសាង​អង្គហេតុ​និង​ដាក់​បណ្ដឹងអាជ្ញា​ទៅ​តុលាការ​។​៣.​ទន្ទឹមនឹង​វិធានការ​ផ្លូវច្បាប់​ជនល្មើស​ត្រូវ​ដាំ​ដើមឈើ​ឡើងវិញ​លើ​ផ្ទៃដី​ដែល​បាន​ទន្ទ្រាន​។​៤.​កងរាជអាវុធហត្ថ​លើ​ផ្ទៃ​ប្រទេស​បាន​ចាត់​កម្លាំង​ចុះ​ល្បាត​តាម​គោលដៅ​ដើម្បី​ទប់ស្កាត់​ការទន្ទ្រាន​ដីព្រៃ​លិច​ទឹក​និង​អនុវត្ត​វិធានការ​ច្បាប់​។​៥.​ជូន​ក្រសួង​ធនធានទឹក​និង​ឧតុនិយម​ទទួលបន្ទុក​ដាំ​បង្គោល​ព្រំដែន​ព្រៃ​លិច​ទឹក​ដែល​ខ្វះ និង​ដែល បាន​ដួលរលំ និង​ដាក់​ពាក្យសុំ​ចុះបញ្ជី​ដី​រដ្ឋ​នូវ​ដីព្រៃ​លិច​ទឹក​តំបន់​ទន្លេសាប​។​៦. ចំពោះ​ប្រជាពលរដ្ឋ​ដែល​បាន​ដាំ​ដំណាំ ពិសេស​ដំណាំ​ស្រូវ ទុកពេល​ឱ្យ​ប្រមូល​ផល រួច​ស្នើ​ឱ្យធ្វើ លិខិត​ទទួលកំហុស និង​ប្រគល់​ដីព្រៃ​លិច​ទឹក​ជូន​រដ្ឋ​វិញ​និង​ទី​៧. ការដាំ​ដើមឈើ​ឡើងវិញ ផ្ដល់​អាទិភាព​លើ​ការដាំ​ដើម​ឫស្សី​៕​សរន​