ដោយៈចេង ហ៊ាង​/ក្រចេះ​ៈ​ប៉ោ​ដើម​ស្វាយ​ជា​ភូមិ​ដាច់​ស្រ​យាល​មួយ នៃឃុំ​គ្រញូង​សែន​ជ័យ ស្រុក​ស្នួល ខេត្តក្រចេះ ដែលមាន​ចម្ងាយ​ផ្លូវ​ប្រមាណជាង​១៣០គីឡូម៉ែត្រ​ពី​ទី​រួម​ខេត្ត​​។

បច្ចុប្បន្នភូមិ​ប៉ោ​ដើម​ស្វាយ​មាន​សាលារៀន​ដែលមានអគារសិក្សាមួយ​ខ្នង​បី​បន្ទប់​ជា​ប្រភេទ​សាលា​រោងដោល​ដែល​បាន​សាងសង់ឡើង​ដោយ​សហគមន៍​ភូមិ​ប៉ោ​ដើម​ស្វាយ​ក្នុង​ឆ្នាំ​(២០១៤.២០១៥) ។​សាលាមានសិស្សចំនួន​១៨៥​នាក់​(ស្រី​ចំនួន​៩០​)ក្នុង​ឆ្នាំ​សិក្សា​២០២០- ២០២១។នេះបើតាម​ការបញ្ជាក់​ពី​លោកនាយក​សាលា​។

តាមរយៈមន្ទីរ និង​ការិយាល័យ​អប់រំ ,​នាយកដ្ឋានសំណង់​នៃ​ក្រសួង​អប់រំ​យុវជន​និង​កីឡា​បាន​ចុះមក​សិក្សា​ឃើញភាព លំបាក​របស់​កុមារ​ក្នុង​ការសិក្សា​រៀនសូត្រ បានសម្រេច​ផ្តល់​ឲ្យ​សំណង់​អគារសិក្សា​មួយ​ខ្នង​ប្រាំ​បន្ទប់ បង្គន់​អនាម័យ​មួយ​ខ្នង​ប្រាំបន្ទប់​និង​អាង​ស្តុ​កទឹក​បេតុង​​ចំណុះ​២០​ម៉ែត្រគូប។សំណង់នេះ​រៀបចំ​ដោយ​នាយកដ្ឋាន​សំណង់​នៃ​ក្រសួង​អប់រំ​យុវជន​និង​កីឡា​ឧបត្ថម្ភ​ដោយកម្មវិធី​គាំទ្រ​ហិរញ្ញប្បទាន​ឥត​សំណង​នៃ​ភាពជា​ដៃគូ​សហភាព​អឺរ៉ុប​.​កម្ពុជា ហើយ​និង​ចាប់ផ្តើម​បើក​ការដ្ឋាន​សាងសង់​នៅ​ថ្ងៃទី​៥​ខែធ្នូ​ឆ្នាំ​២០២១​នេះ​។​

លោក សេង គង់ តំណាង​ឲ្យ​សហគមន៍​ភូមិ​ប៉ោ​ដើម​ស្វាយ បាន​ប្រាប់​រស្មី​កម្ពុជា​ថា​៖មធ្យោបាយ​ក្នុងការ​ធ្វើដំណើរ​មកដល់​ភូមិ​នេះ​លំបាក​ណាស់ ខ្ញុំ​មិន​នឹក​ស្មានថា​ភូមិ​របស់ខ្ញុំ​មានសំណាង​បាន​ទទួលសមិទ្ធផលដែល​រៀបចំ​ដោយ​នាយកដ្ឋាន​សំណង់​នៃ​ក្រសួង​អប់រំ​យុវជន​និង​កីឡា ​ឧបត្ថម្ភ​ដោយកម្មវិធី​គាំទ្រ​ហិរញ្ញប្បទាន​ឥត​សំណង​នៃ​ភាពជា​ដៃគូ​សហភាព​អឺរ៉ុប​កម្ពុជា​នេះឡើយ។ ទោះជា​ប្រទេសជាតិ​ជួប​វិបត្តិ​ជម្ងឺ​កូ​វីដ​.១៩​ក៏ដោយ ក៏​ក្រសួង​នៅតែ​ខិតខំ​ធ្វើ​ឲ្យ​ការអប់រំ​នៅតែមាន​គុណភាព​ប្រសើរ​ជានិច្ច ។

ប្រភព​ដដែល​បន្តទៀតថា សូម​សំណូមពរ​ដល់​រដ្ឋ​និង​ក្រុមហ៊ុន​ដែលមាន​ក្នុង​តំបន់​នេះ​ជួយ​ធ្វើ​ផ្លូវថ្នល់​ឲ្យ​បានល្អ​ផង​ត្បិត​អី​ក្នុងភូមិ​សាស្ត្រ​នេះ​មាន​ក្រុមហ៊ុន​ច្រើន​នៅ​ទីតាំង​នេះ​និង​ធ្វើដំណើរ​លើផ្លូវ​នេះដែរ​។​ម្យ៉ាងវិញទៀត​ភ្លើងអគ្គិសនី​ក៏​ពុំទាន់​មានប្រើ​ដែរមានតែ​បង្គោល​ភ្លើង​និង​ខ្សែកាប​ចំនួន​បី​នៅលើ​បង្គោល​ភ្លើង គិត​ទៅ​ប្រហែល​បី​ឆ្នាំ​ហើយ​ដែល​បានដាក់​លើ​ភូមិ​នេះ៕សរន

 ទិដ្ឋភាព​នៃ​ការបើក​ការដ្ឋាន​សាងសង់​សាលា បង្គន់​អនាម័យ​និង​អាង​ស្តុ​ក​ទឹក​ចំនួន  (​រូបថត​ចេង ហ៊ាង​)