​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ប៉ូលិស​បែលហ្ស៊ិក​បាន​បាញ់​ទឹក​និង​ឧស្ម័ន​បង្ហូរទឹកភ្នែក​ដើម្បី​បំបែក​ក្រុម​បាតុករ​នៅ​ទីក្រុង​ព្រុច​សែល​កាលពី​ថ្ងៃអាទិត្យ​ទី​៥​ធ្នូ​បន្ទាប់ពី​បាតុករ​ភាគច្រើន​​បាន​ដើរ​ក្បួន​ដោយ​សន្តិវិធី​ដើម្បី​តវ៉ា​ប្រឆាំង​នឹង​ការ​រឹតបន្តឹង​ថ្មីៗ ដែល​រៀបចំឡើង​ដើម្បី​ទប់ទល់​នឹង​ការកើនឡើង​ករណី​ឆ្លងកូវី​ដ​១៩​។​

​មនុស្ស​រាប់ពាន់​នាក់​បាន​ប្រមូលផ្តុំ​គ្នា​ដើម្បី​បដិសេធ​វិធានការ​ថ្មី​ដែល​បាន​ប្រកាស​កាលពី​ថ្ងៃ​សុក្រ​ពោលគឺ​សប្តាហ៍​ទី​បី​ជាប់ៗ​គ្នា​ដែល​រដ្ឋាភិបាល​បាន​រឹតបន្តឹង​ច្បាប់​របស់​ខ្លួន​ខណៈដែល​ការ​ផ្ទុះឡើង​​ករណី​ថ្មី​បាន​ធ្វើឱ្យ​ប៉ះពាល់​ដល់​សេវា​សុខភាព​របស់​ប្រទេស ដោយ​នាំ​ឱ្យ​មនុស្ស​កើត​ជំងឺ​គំរាមកំហែង​អាយុជីវិត​ផ្សេងទៀត​មិន​អាច​ទទួលបាន​ការព្យាបាល​។​

​ស្រែកថា “​សេរីភាព​! សេរីភាព​!” និង​កាន់​បដា​សរសេរថា “​រួបរួមគ្នា​ដើម្បី​សេរីភាព សិទ្ធិ​និង​កូន​របស់​យើង​” ក្រុមអ្នកតវ៉ា​បាន​ដើរ​ក្បួន​ទៅកាន់​ទីស្នាក់ការ​សហភាព​អឺរ៉ុប​។ អ្នកខ្លះ​កាន់​បដា​រិះគន់​ចំពោះ​វ៉ាក់សាំង​និង​ប្រឆាំង​នឹង​ការចាក់​វ៉ាក់សាំង​ជា​កាតព្វកិច្ច​។​

​ហ្វូង​មនុស្ស​នៅក្នុង​ការហែក្បួន​ដោយ​សន្តិវិធី​កាលពី​ថ្ងៃអាទិត្យ​ភាគច្រើន​បាន​បំបែក​រួចទៅហើយ នៅពេល​ដែល​បាតុករ​ប្រហែល ១០០​នាក់​បាន​រត់​ទម្លុះ​របាំ​ង​ប៉ូលិស​កុបកម្ម​ដែល​បិទ​ផ្លូវ​ចូល​​ទៅ​កាន់​គណៈកម្មការ​អឺរ៉ុប​។​

​បន្ទាប់​ពី​ប្រឈម​មុខ​ដាក់​គ្នា​មួយ​ប្រាវ​ជាមួយ​ប៉ូលិស ក្រុមបាតុករ​បាន​គប់​សំរាម​និង​វត្ថុ​ផ្សេងទៀត រួម​ទាំង​កង់​មួយ​ដាក់​ប៉ូលិស ហើយ​បាន​ដុត​ផាវ និង​កាំជ្រួច​ភ្លើង​។​

​ប៉ូលិស​បាន​បាញ់​ទឹក​និង​បាញ់​ឧស្ម័ន​បង្ហូរទឹកភ្នែក​ដើម្បី​បំបែក​ហ្វូង​មនុស្ស​។ ភ្លាមៗ​នោះ​មិន​មាន​របាយការណ៍​អំពី​អ្នករបួស​ទេ​។​

​នាយករដ្ឋមន្ត្រី អា​ឡិច​សាន់ឌ័​រ ដឺ គ្រូ បាន​ប្រកាស​កាលពី​ថ្ងៃ​សុក្រ​ថា មជ្ឈមណ្ឌល​ថែទាំ​ពេល​ថ្ងៃ​និង​សាលាបឋមសិក្សា​នឹង​ត្រូវ​បិទ​សម្រាប់​ថ្ងៃ​ឈប់សម្រាក​មួយ​សប្តាហ៍​មុន​ហើយ​កុមារ​ត្រូវ​ពាក់​ម៉ាស់​​ចាប់ពី​អាយុ ៦ ឆ្នាំ​។ ព្រឹត្តិការណ៍​រៀបចំ​ខាងក្នុង​អគារ​នឹង​ត្រូវ​អនុញ្ញាត​ឱ្យមាន​មនុស្ស​អតិបរមា ២០០ នាក់​ប៉ុណ្ណោះ​។​

​មុន​នេះ​រដ្ឋាភិបាល​បាន​បិទ​ក្លិប​រាត្រី ហើយ​បាន​បញ្ជា​ឱ្យ​បារ​និង​ភោជនីយដ្ឋាន​បិទ​នៅ​ម៉ោង ១១ យប់​សម្រាប់​រយៈពេល​បី​សប្តាហ៍​។ មាន​ពាក្យ​ចចាមអារ៉ាម​ខ្លាំង​ឡើង​ថា​ម៉ោង​បិទ​នឹងត្រូវ​លើក​មក​ត្រឹម​ម៉ោង ៨ យប់ ប៉ុន្តែ​ពួក​រដ្ឋមន្ត្រី​បាន​សម្រេចចិត្ត​ប្រឆាំងនឹង​ការបិទ​ម៉ោង​នេះ​៕

​បាតុករ​ត្រូវ​បាន​បង្ក្រាប​នៅ​ទីក្រុង​ព្រុច​សែល​កាលពី​ថ្ងៃអាទិត្យ​