ដោយៈ​សុផល​/ទីក្រុង​បាងកក​, ប្រទេស​ថៃ ៖ លោក​បណ្ឌិត សុខ សុ​ក្រឹ​ត្យា ទីប្រឹក្សា​ផ្ទាល់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​និង​ជា​រដ្ឋលេខាធិការ ក្រសួងទេសចរណ៍​បាន​អញ្ជើញ​ផ្តល់​បទសំភាសន៍​ក្នុង​កម្មវិធី ”​រឿង​ល្បី​ក្រោយ​ព័ត៌មាន​” របស់​ទូរទស្សន៍​ជាតិ​ថៃ​។​

​បទសម្ភាសន៍​ធ្វើការ​ចាក់ផ្សាយ​នៅ​ទូរទស្សន៍​ល្បី​ប៉ុស្តិ​លេខ ២​ថៃ (NBT) កាល​ពី​ពេល​ថ្មីៗ​កន្លងមកនេះ​រៀបចំឡើង​សម្រាប់​ពលរដ្ឋ​ថៃ​ចង់​ធ្វើដំណើរ​ទេសចរណ៍​ឬ​ធ្វើការ​វិនិយោគទុន​នៅ​ប្រទេសជិតខាង​ជាពិសេស​ព្រះរាជាណាចក្រ​កម្ពុជា​។ កម្ម​វិធី​នេះ​នឹង​ផ្តល់​អត្ថប្រយោជន៍​ចំពោះ​អ្នក​ចង់​មក​វិនិយោគ ឬ​ប្រកប​របរជំនួញ ឬ​សូម្បីតែ​ធ្វើដំណើរ​ទេសចរណ៍​នៅ​កម្ពុជា​។​

​ខាងក្រោម​នេះ​ជា​ខ្លឹមសារ​នៃ​បទសម្ភាសន៍​លោក​បណ្ឌិត សុខ សុ​ក្រឹ​ត្យា​និង​ទូរទស្សន៍​ថៃ​៖

-ពិធីករ​, លោក ប៉ា​តិ​ផាត់ ខេ​ម​ធី​ត​៖ យើង​មាន​កិត្តិយស​និង​ក៏​ជា​ឱកាស​ពិសេស​ណាស់​ដែល​ឯកឧត្តម​មក​ផ្តល់​បទសម្ភាសន៍​ថ្ងៃនេះ ខ្ញុំ​សង្ឃឹមថា​ពលរដ្ឋ​ថៃ​មិន​ថា​ជា​អ្នកធ្វើ​ជំនួញ អ្នកទេសចរ​ដែល​ធ្វើដំណើរ​ទៅ​កម្ពុជា​ពួកគាត់​នឹង​ទទួល​បាន​ព័ត៌មាន​ល្អៗ​តាមរយៈ​ការ​ទស្សនា​កម្មវិធី​មួយ​នេះ​។ឯកឧត្តម​អញ្ជើញ​មកកាន់​​ប្រទេស​ថៃ​លើក​នេះតើ​មាន​គំរោង​ជួបពិភាក្សា​ការងារ​ជាមួយ​គណៈរដ្ឋមន្ត្រី​ថៃ​លើ​​ប្រធានបទ​អ្វីខ្លះ​? តើ​មាន​គម្រោង​ដើម្បី​ធ្វើការ​ពិភាក្សា​ទៅលើ​វិស័យ​ទេសចរណ៍ វិស័យ​កីឡា និង​កិច្ចសហប្រតិបត្តិការ​រ​វាង​ប្រទេស​កម្ពុជា​-​ថៃ​យ៉ាងដូចម្តេចខ្លះ​?

-លោក​បណ្ឌិត សុខ សុ​ក្រឹ​ត្យា​៖ ខ្ញុំ​សូម​ជំរាប​ថា​ការបំពេញ​ទស្សនកិច្ច​របស់ខ្ញុំ​លើក​​​នេះ​គឺ​ដើម្បី​ជួបពិភាក្សា​ការងារ​ជាមួយ​ថ្នាក់ដឹកនាំ​របស់​ប្រទេស​ថៃ​ដើម្បី​រឹត​ចំណង​មិត្តភាពរ​វា​ង​ប្រទេស​ទាំងពីរ​ឱ្យ​កាន់តែ​ប្រសើរឡើង​។ ខ្ញុំ​មកលើ​ក​នេះ​ក៏​ជា​តំណាង​ដ៏​ខ្ពង់ខ្ពស់​របស់​សម្តេច​អគ្គមហាសេនាបតី​តេ​ជោ​ហ៊ុនសែន​ផងដែរ​។ ខ្ញុំ​សូមបញ្ជាក់ថា​ក្នុង​កិច្ចពិភាក្សា​ជាមួយ​ថ្នាក់ដឹកនាំ​ថៃ​យើង​បាន​លើកយក​ចំណុច​សំខាន់​អំពី​កិច្ចសហប្រតិបត្តិការ​រ​វាង​កម្ពុជា​-​ថៃក្នុងនោះ​មាន​ទៅលើ​កិច្ចសហ​ប្រតិ​បត្តិការ​អភិវឌ្ឍ​ន៍​លើ​វិស័យ​ទេសចរណ៍ និង​ការ​ធ្វេ​ី​ពា​ណិ្ជ​កម្ម ដោះដូរ​ទំនិញ​តាម​ព្រំដែន​រវាង​ប្រទេស​ទាំងពីរ​។​

-ពិធីករ​, លោក ប៉ា​តិ​ផាត់ ខេ​ម​ធី​ត​៖ ថៃ​បាន​បើក​ប្រទេស​កាលពី​ថ្ងៃទី​១ ខែវិច្ឆិកា ឆ្នាំ​២០២១​រួចហើយ​។ ចុះ​ចំណែក​កម្ពុជា​បាន​បើក​ប្រទេស​ឡើងវិញ​ក្រោយ​ជំងឺ​កូ​វីដ​-១៩ បាន​ធូរស្បើយ​ពេលណា តើ​ឯកឧត្តម​អាច​បញ្ជាក់​ជុំវិញ​បញ្ហា​នេះ​ដូចម្តេច ខ្លះ​?

-​លោក​បណ្ឌិត សុខ សុ​ក្រឹ​ត្យា​៖ បើ​និយាយ​ពី​បញ្ហា​ជំងឺ​កូ​វីដ​-១៩​នៅ​កម្ពុជា ពេល នេះ​បាន​ធូរស្បើយ​វិញ​ហើយ ។ ក្នុង​មួយថ្ងៃ​មាន​អ្នក​ឆ្លង​ជំងឺ​កូ​វីដ​-១៩ មិន​ដល់ ៣០​នាក់​ទេហើយ​អ្នក​បាត់បង់​ជីវិត​ក្នុង​មួយថ្ងៃ​ប្រមាណ​២-៣​នាក់​។ចំពោះ​អ្នក​បាត់បង់ ​ជីវិត​ដោយ​ជំងឺ​កូ​វីដ​-១៩ ភាគច្រើន​កើតចេញ​មកពី​អ្នក​ដែល​មិនបាន​ចាក់​វ៉ាក់សាំង​ការពារ​ជំងឺ​កូ​វីដ​-១៩​។ ខ្ញុំ​សូម​ជំរាប​ដែរ​ថា​កម្ពុជា​បាន​បើក​ប្រទេស​កាលពី​ថ្ងៃទី​១៥ ខែវិច្ឆិកា ឆ្នាំ២០២១​។ ហេតុនេះ​មិន​ថា​អ្នកទេសចរ​បរទេស ឬ​ អ្នកទេសចរ​មកពី​ប្រទេស​ថៃ​ដែល​បាន​ចាក់​វាក់​សាំង​កូ​វីដ​១៩ដូ​ស​ទី​២​រួចនិង​មុន​មកដល់​កម្ពុ​ជា​​​មាន​ការ​ពិនិត្យ​(PCR)​លើ​ជំងឺ​កូ​វីដ​-១៩ រយៈពេល​៧២​ម៉ោង​រួចហើយ នៅពេល​មកដល់​កម្ពុជា គេ​ឱ្យ​ពិនិត្យ​តាមរយៈ ATK (​តេស្ត​រហ័ស​) ម្តងទៀត​បើ​មិនជា​អ្វី​អាច​ចូល​បានតែ​ម្តង​។ សម្រាប់អ្នកទេសចរ ឬ​អ្នកវិនិយោគ​ណា​ដែល​មិនបាន​ចាក់​វាក់​សាំង​២​លើក នៅពេលដែល​មក​ដល់ក​ម្ពុ​ជា​នឹង​តម្រូវឱ្យធ្វើ​ច​តា​ឡី​ស័ក​ចំនួន​១៤​ថ្ងៃ​ដូច​កាលពីមុន​។ ដោយឡែក​ចំពោះ​ប្រភេទ​វាក់​សាំង​ដែល​អ្នកទេសចរ​បាន​ចាក់​មិន​ថា​ជាស៊ី​ណូ​វ៉ា​ក់ ឬ​សូម្បីតែ​វាក់​សាំង​អ្វី​ក៏​អាច​ចូល​កម្ពុជា​បាន​ទាំងអស់ដោយ​កម្ពុជា​​មិនបាន​កំណត់​ឈ្មោះ​វ៉ាក់សាំង​នោះទេ​។ សំខាន់​គឺ​ចាក់​បាន ២​ដូ​ស​គឺអាច​ចូល​កម្ពុជា​បាន​ហើយ​។ ខ្ញុំ​សុំ​បញ្ជាក់ថា​នៅ​កម្ពុ​ជាមាន​សុ​វត្ថិភាព​ជុំវិញ​បញ្ហា​ជំងឺ​កូ​វីដ​-១៩ ពីព្រោះថា​គិត​មកដល់ពេលនេះ​មាន​ពលរដ្ឋ​ច្រើនជាង​១៤​លាន​នាក់​ក្នុង​ចំណោម​ពលរដ្ឋ​មាន​ប្រមាណ​ជាង​១៦​លាន​នាក់​បាន​ចាក់​វ៉ាក់សាំង​រួចហើយ​។ កាលពី​ម្សិល​ម៉ិ​ញ​នេះ​គឺមាន​ទិន្នន័យ​អ្នក​ចាក់​វាក់​សាំង​រួចហើយ​ចំនួន​ជាង ១៤​លាន​​​នាក់​ដែល​បាន​ចាក់​វាក់​សាំង​២​ដូ​ស​រួចហើយ និង​ពេលនេះ​កំពុងដំណើរការ​ចាក់​វា​ក់​សាំង​ដូ​ស​ទី​៣​បន្ថែមទៀត​។​

-ពិធីករ​, លោក ប៉ា​តិ​ផាត់ ខេ​ម​ធី​ត​៖ ពេលនេះ​យើង​ងាក​មក​និយាយ​ពី​វិស័យ​ទេសចរ​ណ៌​វិញ​ពីព្រោះថា ឯកឧត្តម​ក៏​ជា​មន្ត្រីជាន់ខ្ពស់​នៅ​ក្រសួងទេសចរណ៍​ដែរ​។ ខ្ញុំ​សុំ​សួរ​ទៅកាន់​ឯកឧត្តម​ថា នៅពេល​ពលរដ្ឋ​កម្ពុជា​មក​ដើរ​កម្សាន្ត​ប្រទេស​ថៃ​ភាគច្រើន​គាត់​ចូលចិត្ត​មកកាន់​ទីណា ហើយ​ចំណែក​ពលរដ្ឋ​ថៃ​ដែល​ធ្វើដំណើរ​កម្សាន្ត​នៅ​កម្ពុជា វិញ​ភាគច្រើន​ពួកគាត់​ចាប់អារម្មណ៍​ទស្សនា​ទីណា​ដែរ​?
-​លោក​បណ្ឌិត សុខ សុ​ក្រឹ​ត្យា​៖កន្លងមក​ពលរដ្ឋ​កម្ពុជា​ដែល​ធ្វើដំណើរ​ទៅ​កម្សា​ន្ត​ប្រទេស​ថៃ​គឺ​គាត់​មក​ពិនិត្យ​សុខភាព គឺ​មានន័យថា​ទេសចរណ៍​បែបថែរក្សា​សុខ​ភាព និង​កំសាន្ត​លក្ខ​ណៈ​គ្រួសារ​។ ដោយឡែក​សម្រាប់អ្នកទេសច​រ​ថៃ​ទៅ​កម្ពុជា​ភាគច្រើន​ពួកគាត់​ចាប់អារម្មណ៍​ទៅកាន់​អង្គរវត្ត​ខេត្តសៀមរាប ។​ខ្ញុំ​សុំ​ជំរាប​ដែរ​ថា​ពេលនេះ​កម្ពុ​ជាមាន​គម្រោង​នាំចូល​អ្នក​ទេសចរ​ថៃ​តាមផ្លូវអាកាសផ្លូវ​គោ​ក​និង​ផ្លូវ​ទឹក​។​យើង​កំពុង​ធ្វើការ​ជាមួយ​វិស័យ​ឯកជន​ថៃ​ដែល​បាន​បណ្តាក់ទុន​លើ​វិស័យ​ទេសចរ​ណ៍និង​សេវាកម្ម​ផ្នែក​ទេសចរ​ណ៍​ក្នុង​ការរៀបចំ​កញ្ចប់​សំរាប់​ភ្ញៀវ​។ចំពោះ​​គម្រោងការ​នេះ​យើង​នឹង​អាច​ចាប់ផ្តើម​បញ្ជូន​ភ្ញៀវ​នៅ​ខែកុម្ភៈឆ្នាំ​២០២២។សម្រា​ប់​​​ខែមករា​យើង​មានការ​រៀបចំ​វេទិកា​ទេសចរណ៍​អាស៊ាន (ATF 2022) នៅ​ទីក្រុង​ព្រះសីហនុ​ខាងមុខ​។ នៅថ្ងៃនោះ​ដែរ​ថ្នាក់ដឹកនាំ​លើ​វិស័យ​ទេសចរណ៍​ថៃ​ក៏​នឹង​ចូលរួម​សម្ពោធ​ផលិតផល​ទេសចរ​ណ៍​ដែល​ក្រុមហ៊ុន​ទេសចរណ៍​ថៃ​មួយ​ចំនួ​ន​​ដាក់​បង្ហាញ​នៅថ្ងៃនោះ​ផង​។​


-ពិធីករ​, លោក ប៉ា​តិ​ផាត់ ខេ​ម​ធី​ត​៖ នៅ​ខែមករា​ខាងមុខ​ដែល​កម្ពុជា​ធ្វើជា​ម្ចាស់ ផ្ទះ​នៃ​ការរៀបចំ​វេទិកា​ទេសចរណ៍​អាស៊ាន​(ATF 2022) តើ​បាន​ត្រៀម​ជជែក​និង​បានរៀបចំ​គម្រោង​អ្វីខ្លះ​នៅថ្ងៃនោះ​?
-​លោក​បណ្ឌិត សុខ សុ​ក្រឹ​ត្យា​៖ ខ្ញុំ​សុំ​ជំរាប​ថា​នៅថ្ងៃនោះ​រដ្ឋមន្ត្រី​នៃ​ក្រសួងទេស ចរណ៍​អាស៊ាន​នឹង​ជួបគ្នា​នៅ​កម្ពុជា យើង​នឹងដាក់​គម្រោង​ផែនការ​គោលនយោ បាយ​ថា​នឹង​ត្រូវធ្វើ​ដូចម្តេច​បន្តទៅទៀត​លើ​វិស័យ​ទេសចរណ៍​។ ក្រៅពីនេះ​យើង​ក៏​នឹងមាន​រៀបចំ​បង្ហាញ​ពី​ឈុត​ឆាក​សម្តែង​វិស័យ​សិល្បៈ​លើ​វេទិកាតាម​ប្រទេស​នីមួយៗ​ដោយ​បង្ហាញ​ឱ្យគេ​ឃើញ​ពី​វប្បធម៌​សិល្បៈ​ដើម្បី​ទាក់ទាញ​វិស័យ​ទេសច រណ៍​នាឱកាស​នោះ​ផង​។ ប្រទេស​នីមួយៗ​នឹង​បង្ហាញ​ពី​វិស័យ​ទេសចរណ៍​របស់ ខ្លួន​ក្នុង​វេទិកានេះ​ដើ​ម្បីទាក់ទាញ​វិស័យ​ទេសចរណ៍​របស់ខ្លួន​ឡើងវិញ​។ សម្រាប់​កម្ពុជា​ខ្ញុំ​សុំ​អះអាងថា​យើង​បាន​ត្រៀម​រួចរាល់​និង​មិន​ព្រួយបារម្ភ​លើ​ការរីក​រាល​ដាល​ឆ្លង​ជំងឺ​កូ​វីដ​-១៩​ឡើយ ពីព្រោះថា​ពលរដ្ឋ​របស់​យើង​បាន​ចាក់​វ៉ាក់សាំង​ការ​ពារ​ជំងឺ​នេះ​ស្ទើរ​រួចរាល់​ទាំងស្រុង​អស់ហើយ​។ ខ្ញុំ​ចង់ឃើញ​អ្នកទេសចរ​ថៃ ក៏ដូច​ជា​អ្នកទេសចរ​បរទេស​ដ​ទៃទៀត​ដែល​ចូលមក​កម្សាន្ត​នៅ​ប្រទេស​ថៃ ហើយ​បន្ត​ចូលមក​កម្សាន្ត​នៅ​ប្រទេស​កម្ពុជា​ផងដែរ​។

ពិធីករ​, លោក ប៉ា​តិ​ផាត់ ខេ​ម​ធី​ត​ ៖  នាពេល​កន្លងមក​យើង​ធ្លាប់​ឮ​តែ​ប្រាសាទ​អង្គរ​វត្ត​ដែលជា​កន្លែង​អច្ឆរិយៈ​ល្បីល្បាញ​លើ​លោក ហើយ​អ្នកទេសចរ​តែង​ចូល​កម្សាន្ត​។ ក្រៅពី​តំបន់​ពិសេស​នេះ​តើ​នៅ​កម្ពុ​ជាមាន​កន្លែង​ល្បីឈ្មោះ​ដែល​អ្នក​ទេសចរ​គួរ​ចូល​កម្សាន្ត​ទៀត​ឬទេ​? ឯកឧត្តម​សូមជួយ​ណែនាំ​ផង​បាទ​?
– លោក​បណ្ឌិត សុខ សុ​ក្រឹ​ត្យា​៖ បើ​និយាយ​ពី​សក្តានុពល​វិស័យ​ទេសចរណ៍​នៅ​ខេត្តសៀមរាប​យើង​តែងតែ​នឹក​ដល់​ប្រាសាទអង្គរវត្ត ប៉ុន្តែ​នៅ​តំបន់​នេះ​មិនមែន​មានតែ​ប្រាសាទ​នេះ​តែមួយ​នោះទេ​គឺ​នៅ​តំបន់​ខេត្ត​នេះ​ក៏មាន​ទីកន្លែង​កម្សាន្ត​រាប់​មិនអស់​ជាច្រើន​ទៀត​។​អ្នកទេសចរ​ដែល​ចូល​កម្សាន្ត​ប្រាសាទអង្គរវត្ត​កន្លង​មក​ភាគច្រើន​បានត្រឹមតែ​មើល​ប្រាសាទ​មិនបាន​ស្គាល់​អ្វីដែល​ស៊ីជម្រៅ​ជាង​នេះ​នៅ​ឡើយ​ទេ ​។ ខ្ញុំ​សូមបញ្ជាក់ថា​វិស័យ​ទេសចរ​ដែល​យើង​កំពុងនិយាយ​ដល់​នេះ ក៏​មាន​​វិស័យ​ទេសចរណ៍​បែប​ជំនឿ សាសនា ហើយ​ក្រសួង​ទេសចរ​របស់​យើងខ្ញុំ​កំពុង​លើក​គម្រោង​នេះ​ឡើងមក​។ បន្ទាប់​ពីនេះ​ទៅ​យើង​នឹងដាក់​នូវ​គោលការណ៍​ពី​ការដែល​អ្នកទេសចរ​ចូលមក​កម្សាន្ត​នៅ​ប្រាសាទអង្គរវត្ត​តើ​ពួកគាត់​មក​ដើម្បី​អ្វី ?​យើង​នឹង​បន្ថែម​សកម្មភាព​នៅ​កន្លែង​អោយបាន​ច្រេ​ី​ន ហេ​ី​យ​ណែនាំ​ដល់​អ្នក​ទេសចរ​ឱ្យបាន​ដឹង​ពី​ការដែល​ចូលមក​កម្សាន្ត​នៅ​ខេត្ត​នេះហើយ​បាន​ទៅកាន់​ទីនោះ​ឱ្យបាន​ច្បាស់លាស់​និង​ពីអ្វី​ដែល​គេ​ចង់បាន​។​ប្រាសាទ​អង្គ​វត្តមាន​ប្រវត្តិ​យូរលង់​ហេតុនេះ​មានរឿង​រ៉ាវ​ជា​ច្រេ​ី​ន​ដែល​អ្នកទេសចរ​ចូលមក​ហើយ​គួរ​មាន​ការ​សិក្សា​ស្វែងយល់​ពី​គម្រោង​ការដើរ​កម្សាន្ត​អោយបាន​ច្បាស់លាស់​។


-ពិធីករ​, លោក ប៉ា​តិ​ផាត់ ខេ​ម​ធី​ត​៖ បើ​អ្នកទេសចរ​ទៅកាន់​ប្រទេស​កម្ពុជា​ក្រៅពី​ទីកន្លែង​កម្សាន្ត​ហើយ​បើ​និយាយ​ពី​អាហារ​វិញ​តើ​មាន​អ្វីដែល​ពួកគាត់​គួរ​ជ្រើស រើស​បរិភោគ​?
-​លោក​បណ្ឌិត សុខ សុ​ក្រឹ​ត្យា​៖ ជាការ​ពិត​អាហារ​របស់​កម្ពុជា​ក៏​មិន​ខុសពី​អាហារ​របស់​ប្រ​ទស​ថៃ​ប៉ុន្មាន​ដែរ​គឺ​ខុសគ្នា​តែ​ត្រង់​ថា​អាហារ​កម្ពុជា​មិនសូវហិ​រ​។ ក្នុងនោះ​ដូចជា​ថៃ​មាន​មាន់​អាំង កម្ពុជា​ក៏មាន​មាន់​អាំង​ជាដើម​។​

-ពិធីករ​, លោក ប៉ា​តិ​ផាត់ ខេ​ម​ធី​ត​៖ ឯកឧត្តម​បើ​អ្នកទេសចរ​ធ្វើដំណើរ​កម្សាន្ត​ទៅ​កម្ពុជា​តើ​ពួកគេ​អាចធ្វើ​ដំណើរ​តាម​មធ្យោបាយ​ណា​ល្អ​ជាងគេ​ក្នុងនេះ​ដូចជា តាម ផ្លូវ​គោក ផ្លូវទឹក ឬ​ផ្លូវអាកាស​?
-​លោក​បណ្ឌិត សុខ សុ​ក្រឹ​ត្យា​៖ ខ្ញុំ​សុំ​បញ្ជាក់ថា​អ្នកទេសចរ​អាច​ចូលទៅ​កម្សាន្ត​នៅ​កម្ពុជា​តាម​មធ្យោបាយ​ណា​ក៏មាន​លក្ខណៈ​ងាយស្រួល​ទាំងអស់ មិន​ថា​តាម ផ្លូវ​គោក ផ្លូវទឹក ឬ​ផ្លូវអាកាស បានសេចក្តីថា បើ​យើង​ធ្វើដំណើរ​តាមផ្លូវ​គោក​ការ ចាយវាយ​អាច​ធូរ​ថ្លៃ​។ បើតាម​ផ្លូវគោក​មាន​ទៅតាម​ខេត្ត​សុរិន្ទ ស៊ីសាកេត ជា​ដើ​ម ចំណែក​ផ្លូវថ្នល់​ក៏​ល្អ​ស្ទើរ​គ្រប់កន្លែង​។រាជរដ្ឋាភិបាល​កម្ពុជា​កំពុងមាន​គោល​ន​យោ​​​បាយ​រៀបចំ​ទេសចរ​បែប​ធុរៈកិច្ច​ដែល​ត​ភ្ជាប់​ពី​ខេត្តសៀមរាប​មកកាន់​ខេត្ត ភាគ​ឦ​សាន្ត​ខាងត្បូង​ប្រទេស​ថៃ​។ ក្នុងនេះ​ពលរដ្ឋ​កម្ពុជា​អាចធ្វើ​ដំណើរ​ទៅកាន់​ប្រទេស​ថៃ​តាមរយៈ​រថយន្ត​បាន ព្រោះថា​ពលរដ្ឋ​កម្ពុជា​ចូលចិត្ត​ធ្វើដំណើរ​មក​ពិនិ​ត្យ​ព្យាបាល​សុខភាព​នៅ​ខេត្ត​សុរិន្ទ ហេតុនេះ​យើង​អាចធ្វើ​ការផ្លាស់ប្តូរ​គ្នា​បាន​។ ចំណែក​ខាង​ផ្លូវទឹក​ក៏​ដូចគ្នា​គឺ​យើង​ទៅតាម​ខេត្ត​ត្រាត ហើយ​បើ​យើង​និយាយ​ដល់​ខេត្ត​ត្រាត​យើង​ក៏​នឹង​នឹក​ដល់​កោះ​ឆាង ព្រោះថា​កោះ​ឆាង​យើង​នឹង​អាច​ភ្ជាប់​ទៅ​ដល់​ខេត្តកោះកុងខេត្ត​ព្រះសីហនុ​បានតែ​ម្តង​។នាពេល​កន្លងមក​ខ្ញុំ​មាន​ឱកា​ស​​​បាន​ជជែក​ពិភាក្សា​ជាមួយ​អភិបាលក្រុង ហួ​ហ៊ី​ន ហើយ​យើង​បាន​ឯកភាពគ្នា​ថា នៅ​ថ្ងៃ​អនាគត​យើង​នឹងធ្វើ​ការផ្លាស់ប្តូរ​អ្នកទេសចរ​ពី​ហួ​ហ៊ី​ន​ទៅ​ប៉ា​តា​យ៉ា ពី​ប៉ា​តា​យ៉ា​ចូលទៅ​ខេត្តកោះកុង កោះរ៉ុង ឬ​ក្រុងព្រះសីហនុ​របស់​កម្ពុជា​បានតែ​ម្តង​។​

– ពិធីករ​, លោក ប៉ា​តិ​ផាត់ ខេ​ម​ធី​ត​៖ ទាក់ទិន​ទៅនឹង​គម្រោង​ផ្លូវ​រថភ្លើង​ដែលមាន​នាយករដ្ឋមន្ត្រី​ថៃ​ប្រា​យុទ្ធ​ចាន់​អូ​ឆា និង ​នាយករដ្ឋមន្ត្រី​កម្ពុជា ​គឺ ​សម្តេច​តេ​ជោ​ហ៊ុនសែន​បានធ្វើការ​ស​ម្អោ​ធ​ដាក់ឱ្យ​ដំណើរការ​ផ្លូវ​រថភ្លើង​រវាង​ប្រទេស​ទាំង​ពីរ តើ​គិត​មកដល់ពេលនេះ​ពលរដ្ឋ​រវាង​ប្រទេស​ទាំង​២​អាច​ជិះ​រថភ្លើង​នេះ​បាន​ហើយ​ឬ​នៅ​?

-​លោក​បណ្ឌិត សុខ សុ​ក្រឹ​ត្យា​៖ តាម​ការពិត​ផ្លូវដែក​រវាង​ប្រទេស​ទាំងពីរ​គឺមាន​មុន​សង្គ្រាម​ស៊ី​វិល​កើត​ឡើ​ង​នៅ​កម្ពុជា​យូរ​មកហើយ​។ យើង​គ្រាន់តែ​ធ្វើការ​កែ​លម្អ​ហើយ​អាច​ប្រើការ​បានតែ​ម្តង​។ ការធ្វើដំណើរ​ទេសចរ​ណ៍​តាម​រថភ្លើង​អាច​ប្រើ​ពេលវេលា​បន្តិច ទោះ​វា​លំបាក​ខ្លះៗ​ក្តី​តែ​ក៏មាន​សុ​វត្តិភាព​ល្អ​ដូចគ្នា​។ បើ​គេ​មក​តាមផ្លូវ​ដែក​គឺ​ឆ្លងកាត់​ខេត្ត​ជាច្រើន​ដូចជា​៖ បន្ទាយមានជ័យ បាត់ដំបង ដែល​ខេត្តបាត់ដំបង​ដូច​យើង​ដឹង​ហើយ​ជា​ខេត្ត​មាន​ប្រវត្តិ​ដ៏​យូរលង់ ហេតុនេះ​រាជរដ្ឋា​ភិបាល​កម្ពុជា​កំពុង​ស្នើសុំ​បញ្ចូល​ក្នុង​បញ្ជី​បេ​តិ​ភណ្ឌ​ពិភពលោក​ផងដែរ​។​

-ពិធីករ​, លោក ប៉ា​តិ​ផាត់ ខេ​ម​ធី​ត​៖ យើង​បានឃើញ​ហើយ​ថា​វិស័យ​ទេសចរណ៍​រវាង​ថៃ​-​កម្ពុជា​គឺមាន​ភាពរលូន​និង​ងាយស្រួល​។ ពេលនេះ​យើង​ងាក​មក​មើល​លើ​វិស័យ​ពាណិជ្ជកម្ម​វិញ​ម្តង​។​តើ​អ្នកវិនិយោគទុន​ដែល​ចង់​ចូលទៅ​រកស៊ី​នៅ​កម្ពុជា​គេ​គួរ​វិនិយោគ​ទៅលើ​អ្វីដែល​ពលរដ្ឋ​កម្ពុជា​ចូលចិត្ត​? ឯកឧត្តម​ជួយ​ណែនាំ​ក្នុង​រឿងនេះ​ផង​បាទ​។
-​លោក​បណ្ឌិត សុខ សុ​ក្រឹ​ត្យា​៖ បើ​និយាយ​ពី​រឿង​បណ្តាក់ទុន​នេះ​គឺ​វិស័យ SME អាច​ទទួលជោគជ័យ​បានយូរ​អង្វែង ក្នុងនោះ​មានដូចជា គ្រឿងសម្អាង អាហារ​ជំនួយ​សុខភាព គ្រឿងឧបភោគ​បរិភោគ ជា​ទំនិញ​ដែល​ទីផ្សារ​កម្ពុជា​ស្គាល់​និង​មាន​តម្រូវការ​ខ្ពស់ ពលរដ្ឋ​កម្ពុជា​ទទួលស្គាល់ថា ទំនិញ​ថៃ​មានគុណ​ភាព​និង​ចូលចិត្ត​ទំនិញ​ថៃ​។

-ពិធីករ​, លោក ប៉ា​តិ​ផាត់ ខេ​ម​ធី​ត​៖ បើ​នាំ​ទំនិញ​ទៅ​កម្ពុជា​ធ្វើ​វិនិយោគ​តើ​គេ​ត្រូវ ដាក់​ភាសា​ណា​ល្អ​ងាយស្រួល​ទំនាក់ទំនង​ដូចជា ភាសា​កម្ពុជា ភាសា​ថៃ ឬ​ភាសា​អង់គ្លេស​?
-​លោក​បណ្ឌិត សុខ សុ​ក្រឹ​ត្យា​៖ ភាសា​ថៃ​ល្អ​ជាង បើជា​ផលិតផល​ថ្មី ខ្ញុំ​សូម​អះ អាងថា​ទំនិញ SME របស់​ថៃ​ជា​ទំនិញ​មានគុណ​ភាព សោ​ភ័​ណ្ឌ​ភាព យើ​ង​អាច​សង្កេត​ឃើញ​ពី​ការរីក​ចំ​រើន ក្នុងការ​ដោះដូរ​ជំនួញ​តាម​ព្រំដែន​កម្ពុជា​-​ថៃ យើង​នឹង​ដឹង​ហើយ​ថា ទំនិញ SME គឺជា​ទំនិញ​បង្គោល​ដែល​ទីផ្សារ​កម្ពុជា​ត្រូវការ​។​

-ពិធីករ​, លោក ប៉ា​តិ​ផាត់ ខេ​ម​ធី​ត​៖ មាន​គេ​សួរ​ថាបើ​មានការ​វិនិយោគ​តើ​ការប្តូរ​លុយ​នៅ​កម្ពុជា​ជួប​ឧបសគ្គ​ទេ​លំបាក​ទេ​?
-​លោក​បណ្ឌិត សុខ សុ​ក្រឹ​ត្យា​៖ ការពិត​មិន​លំបាក​ទេ មាន​ភាពងាយស្រួល យើង​គ្រាន់តែ​មើល​ពី​អត្រា​ប្តូរ​លុយ​ប្រចាំថ្ងៃ​ទៅ​យើង​អាច​ប្តូរ​កន្លែង​ណា​ក៏បាន​។​លុយ​បាត​អាច​ប្តូរ​ជា​លុយ​ដុល្លារ ប្តូរ​ជា​លុយ​រៀល ការប្តូរ​លុយ​មិន​ពិបាក​នោះ​ឡើ​យ ធានា​គារ​ក៏បាន ហាង​ប្តូរប្រាក់​ក៏បាន​។ ពេលនេះ​យើង​អាច​ប្តូរ​លុយ​តាម​ប្រព័ន្ធ​ឌីជីថល​ក៏​អាច​ប្តូរ​បានតែ​ម្តង​គឺ​តាម​ណា​ក៏​បានដែរ​។

-ពិធីករ​, លោក ប៉ា​តិ​ផាត់ ខេ​ម​ធី​ត​៖ យើង​ឃើញថា​ទាំង​វិស័យ​ទេសច​និង​វិស័យ​ពាណិជ្ជកម្ម​គឺ​យើង​មាន​លក្ខណៈ​ងាយស្រួល​រវាង​ពលរដ្ឋ​ទាំង​២​គឺ​ថៃ​-​កម្ពុជា​។​ប៉ុន្តែ​បើ​យើង​ងាក​ទៅ​មើល​កិច្ចប្រជុំ​វេទិកា​ទេសចរណ៍​អាស៊ាន​នៅ​ខែមករា ឆ្នាំ​២០២២( ATF 2022)​ទាំង​វិស័យ​ទេសចរណ៍​និង​ពាណិជ្ជកម្ម​តើ​ប្រទេស​ទាំង​២​នឹង​ទទួលបាន​ប្រយោជន៍​អ្វីខ្លះ​?
-​លោក​បណ្ឌិត សុខ សុ​ក្រឹ​ត្យា​៖ ត្រង់ចំណុច​នេះ​ខ្ញុំ​សុំ​បញ្ជាក់ថា​ប្រទេស​កម្ពុជា​ទើ ប តែ​ចេញ​ច្បាប់​លើ​ការវិនិយោគ​ថ្មី​។ច្បាប់​នេះ​ផ្តល់​ភាពងាយស្រួល​និង​ប្រយោជ ន៍​ដល់​អ្នកវិនិយោគ​។ គេ​អាច​បណ្តាក់ទុន​ដោយមាន​លំនឹង​និង​យូរអង្វែង​ដែល​មិន​ដូច​កាលពីមុន​នោះទេកម្ពុ​ជាមាន​សុខសន្តិភាព​ពេញលេញ និង​ មាន​ស្ថិរភាព​នយោបាយ យើង​មិនត្រូវ​រំលឹក​ពី​ការវិនិយោគ​កាលពី ២០​ឆ្នាំមុន ដែល​វិនិយោគិន​មានការ​ខូចខាត​ឬ​បាត់បង់ដោយសារ​ដៃគូ​ខិលខូច​មួយចំនួន​ពីព្រោះថា​យុគសម័ យ​នេះ​គឺ​យុគសម័យ​បច្ចេកវិទ្យា ឧស្សាហកម្ម​៤.០ហើយច្បាប់​វិនិយោគ​នៅ​កម្ពុ​ជា​មាន​ធ្វើ​វិសោធនកម្ម គាំពារ​វិនិយោគិន​គ្រប់រូប​។ យើង​មាន​អ្នកនយោបាយ និង​មន្ត្រី​ដែលជា​ធនធានមនុស្ស​ម​ក​ពី​បរទេស មាន​តួនាទី​ក្នុង​នយោបាយ​នៅ​កម្ពុ​ជា​ច្រើន​។​បើ​យើង​ធ្វើការ​ប្រៀបធៀប​ពី​ច្បាប់​និង​របៀប​ធ្វើការ​របស់​កម្ពុជា​ក្នុង​កំឡុង​ពេល ២០​ឆ្នាំមុន​គឺ​ខុសគ្នា​ដូច​មេឃ​និង​ដី​អញ្ចឹង​។ ខ្ញុំ​សុំ​ធានាថា​ការវិនិយោគទុន​ក្នុងពេល​បច្ចុប្បន្ននេះ​មានការ​រីកលូតលាស់ និង​ បានយូរ​អង្វែង ហើយ​មាន​សុវត្ថិភាព​។

ពិធីករ​, លោក ប៉ា​តិ​ផាត់ ខេ​ម​ធី​ត​៖ យើង​បាន​ស្តាប់ និង​យើង​បានលឺ​គឹ​ពេលនេះ​ពលរដ្ឋ​ថៃ​គួរ​ធ្វើដំណើរ​ទៅ​ទេសចរ​ណ៍​និង​វិនិយោគ​នៅ​កម្ពុជា សូម​ឯកឧត្តម​បញ្ជាក់បន្ថែម​?
-​លោក​បណ្ឌិត សុខ សុ​ក្រឹ​ត្យា​៖ ខ្ញុំ​សុំ​បញ្ជាក់ថា ចំពោះ​សក្តានុពល​វិនិយោគ​វិស័យ​ទេសចរ​ណ៌​នៅ​កម្ពុជា ខ្ញុំ​សូម​អះអាង​ជាថ្មី​ថា​មានឱកាស និង​អទិភាព​ខ្ពស់​ណាស់​ ពីព្រោះថា​នយោបាយ​របស់​សម្តេច​អគ្គមហាសេនាបតី​តេ​ជោ ហ៊ុនសែន នាយករដ្ឋមន្ត្រី​កម្ពុជា មានការ​ផ្តោត​លើ​វិស័យ​ទេសចរ​ណ៍ យើង​រំពឹងថា​នឹង​ធ្វើ​ឱ្យ​ផ្នែក​ទេសចរណ៍​រីក​ចំ​រេ​ី​ន​ឡេ​ី​ង​ក្នុង​កំរិត​មួយ​ដែល​អាច​ធ្វើ​ឱ្យ​ជីវភាព​ពលរដ្ឋ​ប្រ​សើរ​ឡើង​។ បើ​វិស័យ​ទេសចរណ៍​ហក់​លឿន ទន្ទឹម​និង​នេះដែរ​ធ្វើឱ្យ​ក្រុមហ៊ុន​ផ្សេងៗ​ដែល​រក​សុ​ី​ពាក់ព័ន្ធ​វិស័យនេះ​ក៏មាន​ការរីកដុះដាល​តា​ម​មកជា​មួយ​ដែរ​។​ខ្ញុំ​គិតថា​ប្រទេស​ថៃ​មាន​ទាំង​ធនធាន មាន​ទាំង​បទពិសោធ​ន៍ និង​អ្នកវិនិយោគ អាចធ្វើ​ការបណ្តាក់ទុន​នៅ​កម្ពុជា​បាន​ហើយ​។ ខ្ញុំ​សុំ​ណែនាំ​ថា​ការ​ទៅ​វិនិយោគ​ពេលនេះ​គឺ​ល្អ​ខ្លាំងណាស់​។​

-ពិធីករ​, លោក ប៉ា​តិ​ផាត់ ខេ​ម​ធី​ត​៖ បើ​គាត់​ចង់​សាកល្បង​ទីផ្សារ មុននឹង​ទៅ​បណ្តាក់ទុន​តែម្តង តើ​ឯកឧត្តម​យល់ថា​មួយណា​ល្អ​ជាង​?
-​លោក​បណ្ឌិត សុខ សុ​ក្រឹ​ត្យា​៖ គឺ​ពួកគាត់​បណ្តាក់ទុន​តែម្តង​ល្អ​ជាង​។ យើង​ដឹង​ហើយ​ថា​ទំនិញ​ថៃ វិស័យ​សេវាកម្ម​នានា​គឺ​ពលរដ្ឋ​កម្ពុជា អតិថិជន​កម្ពុជា មានការ​ជឿជាក់​លើ​ថៃ​ទៅហើយ យើង​មិនចាំបាច់​សាកល្បង​ទេ ព្រោះ​ថាបើ​យើង​សាក ល្បង​គឺ​យើង​នឹង​បាត់បង់​ឱកាស​ច្រើនជាង​ការទទួលបាន​ផលចំណេញ​។​

-ពិធីករ​, លោក ប៉ា​តិ​ផាត់ ខេ​ម​ធី​ត​៖ យើង​ឃើញថា​ទាំង​វិស័យ​ទេសចរ​ណ៍ ​ការ​វិនិយោគទុន​នានា​នៅ​កម្ពុជា​គឺ​យើង​គួរ​ទៅ​បណ្តាក់ទុន​ណាស់​។ ដោយឡែក​បើ​យើង​ក្រឡេក​មក​មើលទៅ​ថ្ងៃ​អនាគត​ប្រទេស​កម្ពុជា​នឹង​បានទទួល​រៀបចំ​វេទិកា​អន្តរជាតិ ទាំង​ផ្នែក​កីឡា ទាំង​វេទិកាទេសចរណ៍ សម័យប្រជុំ​រដ្ឋមន្ត្រី​ទេសចរណ៍​អាស៊ាន​ជាដើម​។ បើ​យើង​ក្រឡេក​មក​មើ​លពី​ការដែល​ប្រទេស​កម្ពុជា​ធ្វើជា​ម្ចាស់​ផ្ទះ​ក្នុងការ​ប្រកួត​កីឡា​ស៊ី​ហ្គេម​នៅ​ឆ្នាំ​២០២៣ ខាងមុខ តើ​កម្ពុជា​បាន​ត្រៀម​រួច​រាល់​​ហើយ​ឬ​នៅ​?
-​លោក​បណ្ឌិត សុខ សុ​ក្រឹ​ត្យា​៖ យើង​បាន​ត្រៀម​រួចរាល់​អស់ហើយ​។ យើង​ទើប​តែ​សាងសង់​ពហុកីឡាដ្ឋាន​ជាតិ​មួយ​រួចរាល់ បើ​សម្ពោ​ធ​ឱ្យ​ប្រើប្រាស់​នៅ​ថ្ងៃទី ១៨ ខែធ្នូ ខាងមុខនេះ​ក្រោម​អធិបតីភាព​សម្តេច​តេ​ជោ ហ៊ុន សែន​។ ពហុកីឡាដ្ឋាន​នេះ​ត្រៀម​ទទួល​ការរៀបចំ​បើ​ក​កីឡា​ស៊ី​ហ្គេម​នេះ​។ សម្រាប់​ទីកន្លែង​អ្នកកីឡា​ស្នាក់នៅ​និង​ហាត់​គឺ​យើង​បាន​ត្រៀម​រួចរាល់​អស់ហើយ​ដែរ​។​

-ពិធីករ​, លោក ប៉ា​តិ​ផាត់ ខេ​ម​ធី​ត​៖ កីឡា​ដែល​ប្រទេស​កម្ពុជា​នឹងដាក់​ចូលរួម​ប្រកួត​តើ​លោក​សង្ឃឹមថា​កីឡា​ផ្នែក​ណាមួយ​នឹង​ទទួលជោគជ័យ​ជាងគេ​?
-​លោក​បណ្ឌិត សុខ សុ​ក្រឹ​ត្យា​៖ យើង​បាន​ត្រៀម​គ្រប់​វិញ្ញាសារ​កីឡា​ទាំងអស់​ក្នុងនេះ​ដូចជា​ប្រដាល់ ប៉េតង់ តៃ​ក្វាន់​ដូ ខ្ញុំ​គិតថា​គួរ​បាន​មេដាយ​។ ទោះ​បីយ៉ាង​ណា​យើង​បាន​ត្រៀម​គ្រប់​វិញ្ញាសារ​កីឡា​ដើម្បី​ប្រកួតប្រជែង​។​
-ពិធីករ​, លោក ប៉ា​តិ​ផាត់ ខេ​ម​ធី​ត​៖ ខ្ញុំ​គិតថា​នៅពេលដែល​កម្ពុជា​ជា​ម្ចាស់ផ្ទះ​កីឡា​ស៊ី​ហ្គេម​ពេលនោះ​ពលរដ្ឋ​ថៃ​ក៏មាន​ឱកាស​ចូលទៅ​ទស្សនា ចូលទៅ​កម្សាន្ត​ច្រើន តើ​កម្ពុជា​បានរៀបចំ​សម្រាប់​រឿងនេះ​ហើយ​ដែរ​ឬ​នៅ​?
-​លោក​បណ្ឌិត សុខ សុ​ក្រឹ​ត្យា​៖ កម្ពុជា​បាន​បើក​ប្រទេស​ចាប់​តាំងតែ​ពីថ្ងៃ​ទី​១៥ ខែវិច្ឆិកា ឆ្នាំ​២០២១ ហេតុនេះ​បើ​អ្នកទេសចរ​ថៃ និង​បរទេស​មក​ពេលនេះ​គេ​អាច ធ្វើ​ដំណើរ​ទៅកាន់​ខេត្តសៀមរាប ខេ​ត្ព​ព្រះសីហនុ និង​រាជធានី​ភ្នំពេញ​។ បើទោះបី​ក្នុងអំឡុង​កូ​វីដ​-១៩​នេះ​ក្តី​កម្ពុជា​បាន​យក​ឱកាស​កសាង​ហេដ្ឋារចនាសម្ព័ន្ធ​ផ្លូវថ្នល់​ក្នុង​តំបន់​ទេសចរណ៍​ជាច្រើន​គួរ​ជាទី​ទាក់ទាញ​បន្តបន្ទាប់​។ យើង​មិនចាំបាច់​រងចាំ​ដល់​ឆ្នាំ​២០២៣​ទេ គឺ​សម្រាប់​ឆ្លង​ឆ្នាំ​ថ្មី​នេះ​យើង​អាចមក​កម្សាន្ត​បាន​ហើយ​។ ខ្ញុំ​ធានា​លើ​សុ​វត្តិភាព​កូ​វីដ​-១៩ មិនចាំបាច់​ព្រួយបារម្ភ​។ កម្ពុ​ជាមាន​រៀបចំ​នូវ​វិធាន​សុវត្ថិភាព ការពារ​ជំងឺ​កូ​វីដ​-១៩​យ៉ាង​ល្អ តាម​បទដ្ឋានអង្គការសុខភាពពិភពលោក (WHO​)។​

-ពិធីករ​, លោក ប៉ា​តិ​ផាត់ ខេ​ម​ធី​ត​៖ បើ​សរុប​ទាំង​លើ​វិស័យ​ទេសចរណ៍ វិស័យ​វិនិ​យោគទុន គឺ​កម្ពុ​ជាមាន​សក្តានុពល មាន​សុ​វត្តិភាព ទាំង​សុ​វត្តិភាព​សន្តិសុខ សុ​វត្ថិ​ភាព​ជំងឺ​កូ​វីដ​-១៩ ដែល​យើង​គប្បី​ធ្វើដំណើរ​ទៅ​កម្ពុជា​។យើង​អាចមាន​ទំ​នុក​ចិត្ត​បាន​តាមរយៈ​ការលើកឡើង​របស់​ឯក​ឧ​ត្ត​ម​ដែលជា​ទីប្រឹក្សា​ផ្ទាល់​របស់​សម្តេ​ច  ​​​​តេ​ជោ ហ៊ុន សែន​និង​ជា​រដ្ឋលេខាធិការ​ក្រសួងទេសចរណ៍។ ជាទី​បញ្ចប់​ខ្ញុំបាទ ប៉ា​តិ​ផាត់ សូម​ថ្លែងអំណរគុណ​យ៉ាង​ជ្រាលជ្រៅ​ដែល​ឯកឧត្តម​បានមក​បំភ្លឺ​គ្រប់​រឿង ជូន​ពលរដ្ឋ​ថៃ​បាន​ជ្រាប​ថ្ងៃនេះ​៕​Ph

សូមទស្សនាវីដេអូសម្ភាសន៍តាមរយៈតំណនេះ៖

  https://youtu.be/0o1DB9qQ8ng