ដោយ​: ម៉េង​ឆៃ / ភ្នំពេញ​: រហូតដល់​ថ្ងៃទី​៩ ខែធ្នូ ឆ្នាំ​២០២១ កម្ពុជា នៅ​មិនទាន់មាន​វត្តមាន​វីរុស​កូ​វីដ បំប្លែង​ថ្មី “​អូ​មី​ក្រុង “​នៅឡើយ​ទេ ទោះជា​ប្រទេស​ជាច្រើន ពិសេស​ក្នុង​តំបន់​អាស៊ាន ដូចជា ប្រទេស​សិង្ហ​បុរី ម៉ាឡេស៊ី និង​ថៃ បាន​រកឃើញ​ជា​បន្តបន្ទាប់​។ តែ​យ៉ាងណាក៏ដោយ មន្ត្រី​ជំនាញ​ក្រសួងសុខាភិបាល​បាន​បញ្ជាក់ថា​បើទោះបីជា ការលេចឡើង នូវ​វីរុស​កូ​វីដ​-១៩ បំប្លែង​ថ្មី ប្រភេទ​”​អូ​មី​ក្រុង​” ដែល​ចាត់ទុកថា ជា​វីរុស​មួយ​បង្កក្តី​ព្រួយបារម្ភ ដែលនាំឱ្យ​កើតមាន​រលក​នៃ​ការឆ្លង​រាលដាល​ជាថ្មី ប៉ុន្តែ​ការទទួល​ចាក់​វ៉ាក់សាំង​បាន​ពេញលេញ និង​វិធាន​សុខាភិបាល ដែល​កម្ពុជា បាន និង​កំពុង​អនុវត្តន៍​បច្ចុប្បន្ន នៅតែមាន​ប្រសិទ្ធិភាព​សម្រាប់​ការពារ​ភាព​ធ្ងន់ធ្ងរ​ពី​ការវាយលុក​របស់ វីរុស​ឆ្លង​ដ៏​កាច​សាហាវ​នេះ​។

​ក្នុង​បទសម្ភាសន៍​រួមគ្នា​រវាង​ក្រសួងសុខាភិបាល និង​អង្គការ​សុខភាព​ពិភពលោក ប្រចាំ​កម្ពុជា នៅ​រសៀល​ថ្ងៃទី​៩ ខែធ្នូ លោកស្រី ឱ វណ្ណឌី​ន រដ្ឋលេខាធិការ និង​ជា​អ្នកនាំពាក្យ​ក្រសួងសុខាភិបាល បាន​បញ្ជាក់ថា ទោះបីជា​បច្ចុប្បន្ននេះ នៅ​មិនទាន់មាន​វត្តមាន​វីរុស​បំប្លែង​ថ្មី អូ​មី​ក្រុង នៅក្នុង​ប្រទេស​កម្ពុជា នៅឡើយ​ក៏ដោយ ប៉ុន្តែ​បើតាម​ការសិក្សា​ពី​ចរាចរណ៍ និង​បទពិសោធន៍ គឺ​ក្រសួងសុខាភិបាល ប្រ​មើ​មើល​ទុកជាមុន​ថា វត្តមាន​មកដល់​កម្ពុ​ជា​របស់​អូ​មី​ក្រុង នឹង​អាច​កើតមានឡើង នៅពេល​ណាមួយ​ជាមិនខាន​។

​យ៉ាងណាក៏ដោយ ដើម្បី​កាត់បន្ថយ​ពេលវេលា​នៃ​ការមកដល់​នៃ​មេរោគ​បំប្លែង​ថ្មី អូ​មី​ក្រុង រាជរដ្ឋាភិបាល បាន​ចាត់វិធានការ​ការពារ នៅតាម​ព្រំដែន​អន្តរជាតិ ដោយ​អនុវត្ត​យ៉ាង​ហ្មត់ចត់​លើ​ការត្រួតពិនិត្យ រួមទាំង​ការតម្រូវ​ឲ្យ​ធ្វើ​ច​ត្តា​ឡី​ស័ក ជាដើម​។ ចំណែក​បុគ្គល​ម្នាក់ៗ និង​ក្រុមគ្រួសារ​និ​មួយៗ រួមទាំង​សហគមន៍ ក៏ត្រូវ​អនុវត្ត​ឱ្យបាន​ម៉ឺងម៉ាត់​នូវ​វិធានការ ៣ ការពារ និង ៣ កុំ​។ ក្នុងនោះ ក៏ត្រូវ​ចាក់​វ៉ាក់សាំង កូ​វីដ​-១៩ ឱ្យបាន​គ្រប់ៗ​គ្នា និង​គ្រប់​ចំនួន​ដូ​ស​។ ពោលគឺ​កុមារ ចាប់ពី​អាយុ ៥​ឆ្នាំ ដល់​ក្រោម ១៨​ឆ្នាំ ត្រូវ​ចាក់ ២​ដូ​ស និង​អ្នកមាន​អាយុ​ចាប់ពី ១៨​ឆ្នាំ​ឡើងទៅ ត្រូវ​ចាក់​វ៉ាក់សាំង​បង្ការ​ជំងឺ​កូ​វីដ​១៩ ម្នាក់ ៣​ដូ​ស​។​

​អ្នកជំនាញ​សុខាភិបាល និង​អង្គការ​សុខភាព​ពិភពលោក បាន​លើកឡើងថា ដើម្បី​ឆ្លើយតប​ទៅនឹង​វីរុស​បំប្លែង​ថ្មី អូ​មី​ក្រុង ក៏ដូចជា ជៀសវាង​នូវ​ការឆ្លង​រាលដាល​កើន​ឡើងជា​គំហុក ជាថ្មីទៀត នៅ​កម្ពុជា គឺ​ពលរដ្ឋ​ម្នាក់ៗ ត្រូវតែ​អនុវត្តន៍​នូវ​វិធាន​ការចាក់​វ៉ាក់សាំង អោយ​ពេញលេញ វិធានការ​សុខភាព​សាធារណៈ និង​សង្គម ពង្រឹងសមត្ថភាព​ផ្នែក​ព្យាបាល និង​ថែទាំ​សុខភាព ជាដើម​។ ក្នុងនោះ រាជរដ្ឋាភិបាល តាមរយៈ​ក្រសួងសុខាភិបាល ក៏ត្រូវ​ពង្រឹង​ប្រព័ន្ធ សម្រាប់​រកឃើញ​កូ​វីដ អោយទាន់​ពេលវេលា និង​ឆ្លើយតប​ឆាប់រហ័ស រួមទាំង​ការត្រួតពិនិត្យ​តាម​ព្រំដែន ត្រូវធ្វើ​ដោយ​ហ្មត់ចត់ និង​ម៉ឺងម៉ាត់​បំផុត​។​

​តាម​របាយការណ៍​អង្គការ​សុខភាព​ពិភពលោក (WHO) គិត​ត្រឹម​ថ្ងៃទី​៧ ខែធ្នូ អូ​មី​ក្រុង បាន​ឆ្លង​នៅ​ប្រទេស​ចំនួន ៥៧ ហើយ នៅលើ​ពិភពលោក​។ មេរោគ​កូ​វីដ បំប្លែង​ថ្មី​នេះ រកឃើញ​ដំបូង កាលពី​ថ្ងៃទី​៩ ខែវិច្ឆិកា ឆ្នាំ​២០២១ នៅ​ប្រទេស​អាហ្វ្រិក​ខាងត្បូង​។​

​យ៉ាងណាក៏ដោយ ក្នុង​រយៈពេល​ប៉ុន្មាន​ថ្ងៃ​ចុង​ក្រោយនេះ ពិសេស​នៅពេល​កូ​វីដ​១៩ ចេញ​បំប្លែង​ថ្មី អូ​មី​ក្រុង ចូល​មកដល់​ប្រទេស​ថៃ ជាប់​ព្រំដែន​កម្ពុជា គឺ​ចំនួន​អ្នក​ឆ្លង​កូ​វីដ​១៩ បាន​កើន​ឡើងវិញ ទាំង​នៅ​ថៃ វៀតណាម និង​នៅ​ប្រទេស​ឡាវ​។ ឆ្លង​មួយថ្ងៃៗ ចូល​ខ្ទង់​ជាង ១​ម៉ឺន ៥​ពាន់​នាក់ នៅ​វៀតណាម​។ នៅ​ថៃ​ជាង ៤០០០​នាក់ និង​នៅ​ឡាវ ជាង ១២០០​នាក់​។​

​ដោយឡែក កម្ពុជា​យើង បាន​រក្សា​ពិន្ទុ​ល្អ ដោយ​គ្រប់គ្រង និង​ទប់ស្កាត់​ការឆ្លង​រាលដាល​កូ​វីដ​១៩ ថយចុះ នៅត្រឹមតែ​ជាង ១០​នាក់ ក្នុង ១​ថ្ងៃ ខណៈ​អ្នក​ស្លាប់មាន​ចន្លោះ​ពី ៣​នាក់ ទៅ ៤​នាក់​ប៉ុណ្ណោះ ក្នុង ១​ថ្ងៃៗ​។​

​វេ​ប​សាយ worldometers.info បង្ហាញថា វៀតណាម កាលពី​ថ្ងៃទី​៩ ខែធ្នូ ឆ្នាំ​២០២១ មាន​អ្នក​ឆ្លង​កូ​វីដ​១៩ ថ្មី ចំនួន ១៥៣១១​នាក់ និង​ស្លាប់​ថ្មី ២៥៦​នាក់​។ គិត​ត្រឹម​ថ្ងៃទី​៩​ធ្នូ វៀតណាម មាន​អ្នក​ឆ្លង​កូ​វីដ សរុប ១ ៣៦៧ ៤៣៣​នាក់ និង​ស្លាប់​សរុប ២៧១៨៦​នាក់​។

​ចំណែក នៅ​ប្រទេស​ថៃ កាលពី​ថ្ងៃទី​៩ ខែធ្នូ ឆ្នាំ​២០២១ ថៃ​មាន​អ្នក​ឆ្លង​កូ​វីដ​ថ្មី ៤២០៣​នាក់ និង​ស្លាប់ ៤៩​នាក់​។ គិត​ត្រឹម​ថ្ងៃទី​៩ ខែធ្នូ នៅ​ប្រទេស​ថៃ មាន​ករណី​ឆ្លង​កូ​វីដ សរុប ២ ១៥៦ ៥៨៧​នាក់ និង​ស្លាប់​សរុប ២១ ០៨២​នាក់​។

​ដោយឡែក នៅ​ឡាវ នា​ថ្ងៃទី​៩ ខែធ្នូ មាន​ករណី​ឆ្លង​កូ​វីដ​១៩ ចំនួន ១២១២​នាក់ និង​ស្លាប់ ៥​នាក់​។ នៅ​ឡាវ សរុប​អ្នក​ឆ្លង​កូ​វីដ មា​ចំនួន ៨៤ ៥០៣​នាក់ និង​ស្លាប់​សរុប ២២៤​នាក់​។

​ងាក​មក​មើល​ស្ថានភាព​កូ​វីដ​១៩ នៅ​កម្ពុជា​យើង​វិញ គឺ​ចាប់តាំងពី​ខែតុលា ចំនួន​អ្នក​ឆ្លង​កូ​វីដ​១៩ បាន​ថយចុះ​ជា​រៀងរាល់ថ្ងៃ ហើយ​មកដល់​ថ្ងៃទី​៩ ខែធ្នូ ឆ្នាំ​២០២១ នៅ​កម្ពុជា មាន​ករណី​ឆ្លង​កូ​វីដ​១៩ នៅ​ទូទាំងប្រទេស តែ ១២​នាក់​ប៉ុណ្ណោះ និង​ស្លាប់ ៣​នាក់​។ គិត​ត្រឹម​ថ្ងៃទី​៩ ខែធ្នូ នៅ​ទូទាំងប្រទេស​កម្ពុជា​យើង មាន​ករណី​ឆ្លង​កូ​វីដ​១៩ សរុប​ចំនួន ១២០ ៣១២​នាក់​។ ក្នុងនោះ ករណី​ជាសះស្បើយ សរុប​ចំនួន ១១៦ ៦៦៨​នាក់ និង​ករណី​ស្លាប់​សរុប មាន​ចំនួន ២៩៧៤​នាក់​។​

​យ៉ាងណាក៏ដោយ ទោះជា​កម្ពុជា​យើង រក្សាបាន​ពិន្ទុ​ល្អ​ជាង​ប្រទេសជិតខាង ក្នុងការ​គ្រប់គ្រង និង​ទប់ស្កាត់​ការឆ្លង​កូ​វីដ​១៩ ក៏ពិតមែន តែ​មិនយូរ​មិនឆាប់​ទេ លទ្ធភាព​នៃ​ការឆ្លង​រាលដាល​កូ​វីដ ពិសេស​អូ​មី​ក្រុង ក៏​នឹង​មកដល់​កម្ពុជា បើសិនជា​យើង​ម្នាក់ៗ ភ្លេចខ្លួន ខ្វះ​វិធាន​ការការពារ និង​ទប់ស្កាត់​។ ចូរ​កុំភ្លេចថា កូ​វីដ​ឆ្លងតាម​មនុស្ស ហើយ​មនុស្ស អ្នកធ្វើដំណើរ និង​អ្នក​ជួបជុំ ដោយសារតែ​ប្រទេស​យើង បើក​ដំណើរការ​ឡើងវិញ​លើ​គ្រប់​វិស័យ ចាប់តាំងពី​ថ្ងៃទី​១ ខែវិច្ឆិកា ឆ្នាំ​២០២១ ហើយ​កាន់តែ​ពេញលេញ​គ្រប់​វិស័យ​ទាំងអស់ នៅ​ថ្ងៃទី​៣០​វិច្ឆិកា ដោយ​បើក​រង្គសាល ខារ៉ាអូខេ និង​ឌី​ស្កូ​តែ​ក​។​

​នាពេលនេះ ការជួបជុំ​ក្រៅ​ផ្ទះ រួមទាំង​ការជួបជុំ​ផឹកស៊ី​តាម​ហាង តាម​ទីសាធារណៈ និង​ទីកន្លែង​ឯកជន ក៏​បន្ត​គ្រប់​ទីកន្លែង នៅ​ទូទាំងប្រទេស ពិសេស​ក្រុម​យុវវ័យ​។ តែ​ក៏​សូម​កុំភ្លេចថា កូ​វីដ មិនទាន់​ទៅណា​ឆ្ងាយ​ពី​យើង​ទេ​។ កូ​វីដ ពិសេស​មេរោគ​បំប្លែង​ថ្មី អូ​មី​ក្រុង ដែល​ឆ្លង​លឿន ក៏​មកដល់​ប្រទេស​ថៃ ដែល​ជាប់​ព្រំដែន​កម្ពុជា​ហើយ​។ ប៉ុន្តែ​កម្ពុជា​យើង បើកចំហរ​ព្រំដែន តែ​អនុវត្ត​វិធានការ​ទប់ស្កាត់ និង​ត្រួតពិនិត្យ​តាម​វិធាន​នានា ដែល​បាន​ដាក់ចេញ​។ ដូច្នេះ​ក្រៅពី​វិធានការ​របស់​អាជ្ញាធរ​សមត្ថកិច្ច គឺមាន​តែ​យើង​ម្នាក់ៗ ត្រូវ​ចូលរួម​ទប់ស្កាត់ និង​ការពារ​រៀងៗ​ខ្លួន​។ សូម​បន្ត​ខ្លាចញញើត​កូ​វីដ​តទៅទៀត ព្រោះ​កុំភ្លេចថា ទោះជា​ចាក់​វ៉ាក់សាំង ២​ដូ​ស ឬក៏ ៣​ដូ​ស​ហើយក៏​ដោយ ក៏​នៅតែ​ឆ្លង ហើយក៏​នៅតែ​ឈឺ និង​ស្លាប់ ដោយសារ​កូ​វីដ​រៀងរាល់ថ្ងៃ​៕​សរន​