ដោយៈ​មុនី​រ័ត្ន / ភ្នំពេញៈ លោក ស សុខា អនុប្រធាន សហភាព សហព័ន្ធ យុវជន​កម្ពុជា (​ស​.​ស​.​យ​.​ក​.) ទទួលបន្ទុក ខេត្តព្រៃវែង បាត់ដំបង និង ខេត្តបន្ទាយមានជ័យ និង​ជា​តំណាង ដ៏​ខ្ពង់ខ្ពស់​លោក ហ៊ុន ម៉ា​នី ប្រធាន ស​.​ស​.​យ​.​ក​. និង​លោក សុខ លូ អភិបាល នៃ​គណៈ​អភិបាល ខេត្តបាត់ដំបង ចូលរួម​ជា​គណៈអធិបតី ពិធី​បិទ​សន្និបាត បូកសរុប​លទ្ធផល​ការងារ ឆ្នាំ​២០២១ និង​លើក​ទិសដៅ​បន្ត ឆ្នាំ​២០២២ របស់ ស​.​ស​.​យ​.​ក​. ខេត្តបាត់ដំបង នៅ​ស្នាក់ការ ស​.​ស​.​យ​.​ក​. ខេត្ត នៅ​ថ្ងៃទី​១១ ខែធ្នូ ឆ្នាំ​២០២១ នេះ ។​

​លោក ស សុខា បាន​ថ្លែងថាៈ ក្នុងនាម​លោក​ប្រធាន ហ៊ុន ម៉ា​នី និង​ខ្លួន​ខ្ញុំ​ផ្ទាល់ សូម​ថ្លែងអំណរគុណ យ៉ាង​ជ្រាលជ្រៅ ចំពោះ​ថ្នាក់ដឹកនាំ​ខេត្ត ស្រុក ក្រុង ក្រុមការងារ​ចុះជួយ និង​សមាជិក សមាជិកា ស​.​ស​.​យ​.​ក​. ខេត្តបាត់ដំបង ទាំងអស់ ដែល​បាន​លះបង់​ពេលវេលា កម្លាំងកាយ​ចិត្ត និង​ទ្រព្យធន​ផ្ទាល់ខ្លួន ក្នុង​កិច្ចការងារ​សង្គម ស្របទៅនឹង​គោលនយោបាយ របស់​រាជរដ្ឋាភិបាល ក៏ដូចជា អាជ្ញាធរខេត្ត ស្រុក ក្រុង ពិសេស​ក្នុង​កាលៈទេសៈ ដែល​ប្រទេសជាតិ បាននិងកំពុង​ប្រឈម​នឹង​ជំងឺ​កូ​វីដ​-១៩ អស់​រយៈពេល​ជិត ២ ឆ្នាំ​មកនេះ ។ ក្នុងនោះ ស្នើ​ថ្នាក់ដឹកនាំ​ខេត្ត ស្រុក ក្រុង ក្រុមការងារ​ចុះជួយ និង​សមាជិក សមាជិកា ស​.​ស​.​យ​.​ក​. ខេត្តបាត់ដំបង ទាំងអស់ សូម​បន្ត​ជួយឧបត្ថម្ភ​គាំទ្រ និង​ចូលរួម ក្នុង​យុទ្ធនាការ ប្រយុទ្ធ​នឹង​ជំងឺ​កូ​វីដ​-១៩ ដើម្បី​ឲ្យ​ប្រទេសជាតិ​យើង ឆាប់​បាន​ឆ្លង​ផុត ពី​ជំងឺ​ដ៏​កាច​សាហាវ​នេះ ។ សូម​បន្ត​ចូលរួម ផ្សព្វផ្សាយ​សារ​អប់រំ​នានា របស់​ក្រសួងសុខាភិបាល ជាពិសេស​វិធានការ ៣​ការពារ ៣​កុំ ដើម្បី​ការពារ ទប់ស្កាត់ និង​បង្ការ​ពី​ការឆ្លង​រាលដាល នៃ​ជំងឺ​កូ​វីដ​-១៩ ក៏ដូចជា វីរុស​បំប្លែង​ថ្មី​ផ្សេងទៀត បើទោះបី​កម្ពុជា​យើង បាន​ចាក់​វ៉ាក់សាំង ហើយក៏​ដោយ ។ សូម​រួមគ្នា​អនុវត្ត​វិធានការ ៣​ការពារ ៣​កុំ ឲ្យ​បាន​ខ្ជាប់ខ្ជួន ដើម្បី​ការពារ​ខ្លួន​យើង គ្រួសារ​យើង និង​សង្គមជាតិ​យើង ពី​ជំងឺ​កូ​វីដ​-១៩ ៕/V​