​ដោយៈ ជា សីហៈ​/​ភ្នំពេញៈ លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង នេសាទ បាន​ជួបពិភាក្សា​ការងារ តាមរយ​: Zooming ជាមួយ​ក្រុម​បេសកកម្ម​ធនាគារ ពិភពលោក ដើម្បី​រាយការណ៍​ពី​វឌ្ឍនភាព​ស្តីពី​ការអនុវត្ត​គម្រោង​បែងចែក​ដី​ដើម្បី​សង្គមកិច្ច និង​ការអភិវឌ្ឍ​សេដ្ឋកិច្ច ជំហាន​ទី​៣ (Land Allocation for Social and Economic Development LASED III) និង​លទ្ធផល​នៃ​ការបំពេញ​បេសកកម្ម​។​

​លោក រដ្ឋមន្ត្រី បាន​ថ្លែងអំណរគុណ​ចំពោះ​ធនាគារពិភពលោក ដែល​បាន​សហការ​ជា​ដៃគូ​យ៉ាង​ល្អជា​មួយ​ក្រសួងកសិកម្ម រុក្ខាប្រមាញ់ និង​នេសាទ ក្នុងការ​អភិវឌ្ឍន៍​វិស័យ​កសិកម្ម តាមរយ​: ការគាំទ្រ​គម្រោង​អភិវឌ្ឍ​ជាច្រើន​ក្នុង​រយ​:​ពេល​ប៉ុន្មាន​ឆ្នាំ​ចុង​ក្រោយនេះ​។ ជាក់ស្តែង​ធនាគារពិភពលោក​បាន​គាំទ្រ​គម្រោង LASED បាន​អនុវត្ត​ចប់​២​ជំ​ហ៊ាន និង​កំពុង​បន្ត​ជាមួយ​គម្រោង LASED III ដែល​បាន​គិតគូរ​យ៉ាង​យកចិត្តទុកដាក់​លើ​ការបង្កើន​ជីវភាព​កសិករ​ដែលមាន​ជីវភាព​ខ្វះខាត ព្រមទាំង​សហគមន៍​ជនជាតិដើម​ភាគតិច ដើម្បី​ចូលរួម​កាត់បន្ថយ​អត្រា​ភាពក្រីក្រ​នៅ​កម្ពុជា និង​ការអភិវឌ្ឍន៍​ប្រកបដោយ​និរន្ត​ភាព​។​

​លោកស្រី ចំរើន មុទិតា ប្រធាន​ប្រតិភូ​បេសកកម្ម និង​ជា​អ្នកដឹកនាំ​គម្រោង LASED III របស់​ធនាគារពិភពលោក បាន​ថ្លែងអំណរគុណ​ចំពោះ លោក រដ្ឋមន្ត្រី ដែល​បាន​អនុញ្ញាតឱ្យ​លោកស្រី និង​សហការី​បាន​ជួបពិភាក្សា​ការងារ​តាមរយ​: ប្រព័ន្ធ​ពី​ចម្ងាយ ហើយ​បាន​មានប្រសាសន៍ថា តាមរយ​:​លទ្ធផល​ដែល​ក្រុម​បេសកកម្ម បាន​ជួប​ជាមួយ​ភ្នាក់ងារ​អនុវត្ត​គម្រោង របស់​ក្រសួង​រៀបចំ​ដែនដី នគរូបនីយកម្ម និង​សំណង់ និង​ក្រសួងកសិកម្ម រុក្ខាប្រមាញ់ និង​នេសាទ អស់​រយ​:​ពីរ​សប្តាហ៍​រួចមក បាន​សង្កេតឃើញថា ភ្នាក់ងារ​អនុវត្ត​ទាំងពីរ​ក្រសួង​បាន​ខិតខំ​យកចិត្តទុកដាក់​ក្នុងការ​អនុវត្ត ទោះបី ឆ្នាំ​២០២១ ជា​ឆ្នាំ​មួយ​ដែល​ពិភពលោក ក៏ដូចជា​កម្ពុជា​បាន​រង​ផលប៉ះពាល់​ពី​ការរីក​រាលដាល​នៃ​ជំងឺ​កូ​វីត ១៩​។

លោកស្រី​បាន​បន្ថែមថា បើ​ពិនិត្យ​លើ​វឌ្ឍនភាព​ជារួម អាច​វាយតម្លៃ​បាន​ថា​ការអនុវត្ត​សម្រេចបាន​ក្នុង​កម្រិត​ទាប តែបើ​ធៀប​នឹង​ស្ថានភាព​ជាក់ស្តែង​ដែល​រង​ផលប៉ះពាល់​ពី​ជំងឺ​កូ​វីត គឺ​បេសកកម្ម​ធន​គារ​ពិភពលោក​អាច​ទទួលយកបាន និង​មានការ​ពេញចិត្ត​ចំពោះ​ភាព​ខិតខំ​របស់​ក្រុមការងារ​ទាំងពីរ​ក្រសួង​។ លោកស្រី​បាន​បញ្ជាក់ថា ចំពោះ​រយ​:​ពេល​នៃ​ការអនុវត្ត​ក្នុង​ឆ្នាំ​បន្តបន្ទាប់ ធនាគារពិភពលោក នឹង​សហការ​ឱ្យបាន​កាន់តែ​ប្រសើរឡើង​ជាមួយ​ក្រុមការងា​រ​នៃ​ក្រសួង​ទាំងពីរ ដើម្បី​ជំរុញ​ការរៀបចំ​ផែនការ​សកម្មភាព ឱ្យមាន​ភាពជាក់ស្តែង​និយម បុ​រេ​សកម្ម និង​ឆ្លើយតប​ទៅនឹង​សភាព​ជាក់ស្តែង ក្នុងន័យ​ព​ន្លឿ​ន​ការងារ​អនុវត្ត​ឱ្យមាន​ប្រសិទ្ធភាព និង​ស័ក្តិ​សិទ្ធ​ភាព​។

​នា ឱកាស​នោះ លោក​រដ្ឋមន្ត្រី បាន​ផ្តាំផ្ញើ​ដល់​មន្ត្រីក្រោមឱវាទ ខិតខំ​រៀបចំ​ចាត់ចែង​ការងារ​ឱ្យបាន​ម៉ត់ចត់​បន្ថែមទៀត ដើម្បី​បង្កើនល្បឿន​នៃ​ការអនុវត្ត​គម្រោង​ឱ្យបាន​ទាន់ពេលវេលា​។ លោក​រដ្ឋមន្ត្រី ក៏បាន​ផ្តាំផ្ញើ​ដល់​ក្រុមការងារ​នៃ​ធនាគារពិភពលោក ក្នុងការ​សហការគ្នា​ឱ្យ​បានល្អ​ជាមួយ​មន្ត្រី​ពាក់ព័ន្ធ និង​ស្នើឱ្យ​ពិនិត្យមើល​ការងារ​ដែលជា​អាទិភាព ដែល​អាចជួយ​ជំរុញ​ព​ន្លឿ​ន​ការងារ​សម្រាប់​ឆ្នាំក្រោយៗ​ចាប់ផ្តើមបាន​លឿន​។

​គួររំលឹកថា គម្រោង LASED III​គឺជា​គម្រោង​មួយ​មាន រយៈពេល ពី​ឆ្នាំ ២០២០ ដល់ ឆ្នាំ ២០២៦ មាន ថវិកា ១០៧ លាន​ដុល្លារ នៅក្នុង​នោះ ៩៣​លាន​ដុល្លារ​ជា កម្ចី​ពី​ធនាគារពិភពលោក និង ១៤ លាន ថវិកាបដិភាគ​ពី​រាជរដ្ឋាភិបាល​កម្ពុជា​។
​គម្រោង​នេះ ជួយ​ខេត្ត​គោលដៅ មួយចំនួន ដូចជា ក្រចេះ ត្បូងឃ្មុំ កំពង់ធំ កំពង់ឆ្នាំង កំពង់ស្ពឺ មណ្ឌលគិរី រតនគិរី ព្រះវិហារ និង​ខេត្តស្ទឹងត្រែង ដែល​ផ្តោត​ការវិនិយោគ​លើ​ហេដ្ឋារចនាសម្ព័ន្ធ ផ្តល់​សេវា​គាំទ្រ​បច្ចេកទេស សម្រាប់​ការប្រកប​របរ​ចិញ្ចឹមជីវិត​ផ្អែកលើ​កសិកម្ម​ជា​មូលដ្ឋាន កសិករ​ទទួលផល​ស​រុ​ប ១៥.០០០ គ្រួសារ​។​