ដោយៈ វ៉ៃ​កូ / ស្វាយរៀងៈ លោក គីម ផៃ តំណាង​លោកស្រី កែវ ណា​រី ម្ចាស់​សណ្ឋាគារ ណា​រី​ស្វី​ត សិ្ថ​ត​នៅ​ក្រុង​បាវិត ខេត្តស្វាយរៀង នៅ​រសៀល ថ្ងៃទី​១៣ ខែ​ឆ្នូ ឆ្នាំ ២០២១​នេះ បាន​នាំ​អំណោយ​របស់​លោកស្រី យកមកចែក ជូន​ដល់​អ្នកគ្រូ និង​ក្មួយៗ សិស្សានុសិស្ស សរុប​ចំនួន ៥០ នាក់ ដែល​កំពុង​រស់នៅក្នុង​មណ្ឌលកុមារ​កំព្រា ក្រុង​ស្វាយរៀង ខេត្ដ​ស្វាយរៀង ។

​លោក គីម ផៃ បាន​មានប្រសាសន៍​ឲ្យ​ដឹងថាៈ កន្លងមក ដោយ​មើលឃើញ​ការលំបាក របស់​អ្នកគ្រូ និង​ក្មួយៗ​សិស្សានុសិស្ស ទាំងនោះ មានការ​ខ្វះខាត ទើប​លោកស្រី បាន​យក​អំណោយ និង​ថវិកា​មួយចំនួន មក​ចែកជូន​ដល់​អ្នកគ្រូ និង​ក្មួយៗ សិស្សានុសិស្ស ទាំងអស់ នៅពេលនេះ ហើយ​អំណោយ​ទាំងអស់នេះ ពិតមែន​តែមាន​ចំនួន​តិចតួច​ក៏ដោយ តែ​វា​អាចជួយ​សម្រាល និង​បាន​រំលែក ការលំបាក​ខ្វះខាត របស់​អ្នកគ្រូ និង​ក្មួយៗ សិស្សានុសិស្ស នៅក្នុង​មណ្ឌលកុមារ​កំព្រា ខេត្តស្វាយរៀង ទាំងអស់ បាន​មួយរយៈ ខ្លី​ដែរ​។

​លោក គីម ផៃ ក៏បាន​សំណូមពរ ដល់​អ្នកគ្រូ និង​ក្មួយៗ សិស្សានុសិស្ស ទាំងអស់ ត្រូវ​ថែទាំ​សុខភាព​ឲ្យ​បានល្អ ជាពិសេស​ត្រូវ​ប្រកាន់​ខ្ចា​ប់ នូវ​វិធានការ​របស់ សុខាភិបាល (​បី​កុំ បី​ការពារ ពីរ​ចូលរួម​) ហើយ​ត្រូវមាន​អនាម័យ​ជានិច្ច ដើម្បី​ការពារ​នូវ​ជំងឺឆ្លង​កូ​វីដ​-១៩ ដែល​កំពុង​រាតត្បាត នៅលើ​ពិភពលោក ក៏ដូចជា ប្រទេស​កម្ពុជា​។

​អំណោយ​ដែល​នាំយកមក​ចែកជូន ដល់​អ្នកគ្រូ និង​ក្មួយៗ​សិស្សានុសិស្ស និង​មណ្ឌលកុមារ កំព្រា​នោះ រួមមានៈ អង្ករ​១​តោន ស្មើ​៤០​បេ​តូច ,​មី ៥ កេស​ធំ ,​ទឹកត្រី ១០ យួរ​, ទឹក​សុ​ី​អុ​ី​វ ១០​យួរ , ត្រីខកំប៉ុង​១០​យួរ​,​សារុង​, ភួយ សៀវភៅ​, ប៊ិច និង​ថវិកា បី​លាន​រៀល​៕/V