ដោយៈ ប.ជ័យ / ឧត្តរមានជ័យៈ មកទល់ថ្ងៃទី១៤ ខែធ្នូ ឆ្នាំ២០២១ នេះ កសិករ នៅឧត្តរមានជ័យ បាននឹងកំពុងមមាញឹក ក្នុងការប្រមូលផលស្រូវ ។ ក្នុងនោះ ទិន្នផល ល្អជាងឆ្នាំមុនៗ បើទោះបីជា នៅកណ្តាលដៃនេះ ជើងកំពង់ តម្លៃស្រូវ បានធ្លាក់ចុះ ជាងកាលពីដើមទី នៃរដូវប្រមូលផល ក៏ដោយ។

កសិករមួយចំនួន បានប្រាប់កាលពីថ្ងៃទី១៤ ខែធ្នូថាៈ ឆ្នាំនេះ ដំណាំស្រូវរបស់ពួកខ្លួន ភាគច្រើន ទទួលបានទិន្នផល ល្អប្រសើរជាងបណ្តា ឆ្នាំមុនៗ ។ ប៉ុន្តែគួរស្តាយ ដែលតម្លៃវា នាកណ្តាលរដូវ ប្រមូលផលនេះ បានធ្លាក់ចុះបន្តិច ជាងកាលពីដើមទី ។

លោក សូត្រ ស៊ីសុខឃាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តឧត្តរមានជ័យ បានអោយដឹងថ្ងៃទី១៤ ខែធ្នូថាៈ ដំណាំស្រូវរដូវវស្សា របស់កសិករ ឆ្នាំ២០២១ នេះ ក្នុងភូមិសាស្រ្ត ក្នុងក្រុង-ស្រុកទាំង ប្រាំរបស់ខេត្ត ទទួលបានទិន្នផលល្អ (ក្នុង១ហិកតាៗ) ជាងបណ្តាឆ្នាំមុនៗ ដោយសារមានរបបរបាយទឹកភ្លៀង គ្រប់គ្រាន់ពីដើម កណ្តាល និងចុងរដូវ បូកផ្សំនឹងការប្រើពូជ ប្រើជី ការបច្ចេកទេសធ្វើ ។

ក្នុងនោះ ជំនន់ទឹកភ្លៀងចុងរដូវ មិនបង្ករឲ្យមាន ការខូចខាតដំណាំស្រូវ តែបែរជាជម្រុញ អោយដើមដងស្រូវ ប្រែជាល្អឡើង ដុះលូតលាស់ បែកគុម្ពល្អប្រសើរ ហើយហុចផ្លែផ្កា ផលធារទិន្នផលល្អ។

លោកបានបន្តថាៈ បញ្ចប់ការងារបង្កបង្កើនផល ដំណាំស្រូវរដូវវស្សា ឆ្នាំ២០២១នេះ ប្រជាកសិករ ក្នុងខេត្តឧត្តរមានជ័យ​អនុវត្តបានលើផ្ទៃដី ចំនួន ៩៧.២២០ ហិកតា ក្នុងនោះ ប្រភេទស្រូវស្រាល ២.៧៥៥ ហិកតា ស្រូវកណ្តាល ៨៨.៦៩៥ ហិកតា និងស្រូវធ្ងន់ ៥.៥៧០ ហិកតា ព្រមទាំងស្រូវចំការ ២៦០ ហិកតាផងដែរ ដោយសារមាន ប្រព័ន្ធធារាសាស្រ្ត កសិករមួយចំនួន អាចធ្វើបាន ពីរដង ក្នុង ១ឆ្នាំ ។

លោកបានបន្តថាៈ ចំពោះតម្លៃស្រូវវិញ នាចុងរដូវនេះ ហាក់ធ្លាក់បន្តិច បើធៀបនឹងដើមរដូវ នាឆ្នាំនេះ ពោលគឺ ដូចនិន្នការ នាឆ្នាំកន្លងទៅដែរ ។ ក្នុងតម្លៃស្រូវចម្រុះ ឬចាប់ឆាយ អាចលក់បានក្នុងតម្លៃ លើទីផ្សារ ថ្លៃជាង ៨០០ រៀល ក្នុង១ គ.ក្រ ។ រីឯស្រូវល្អ ឬក្រអូប គ្រាប់វែង តម្លៃជាង ១.០០០ រៀល ក្នុង១គ.ក្រ៕/V