ដោយៈ ជា​សីហៈ​/​ភ្នំពេញៈ លោក ព្រុំ សុខា រដ្ឋមន្ត្រីក្រសួង​មុខងារសាធារណៈ និង​ជា​ប្រធាន​គណៈកម្មាធិការ​កែទម្រង់​រដ្ឋបាល​សាធារណៈ បាន​ដឹកនាំ​កិច្ចប្រជុំ​លើក​ទី​២ របស់​គណៈ ក​ម្មា​ធិ​ការកែទម្រង់រដ្ឋបាល​សាធារណៈ ដើម្បី​ពិនិត្យ​ពិភាក្សា​ជំរុញ​ដំណើរការ​ប្រមូល​ធាតុ​ចូល​បន្ថែម​ឈានទៅ​បញ្ចប់​ឱ្យបាន​ឆាប់​នូវ​ឯកសារ​ផ្លូវការ​ជា​កម្មវិធី​ជាតិ​កែទម្រង់រដ្ឋបាល​សាធារណៈ សំរាប់​ការអនុវត្ត​ក្នុង​រយៈពេល​ចាប់ពី​ឆ្នាំ​២០២២ ដល់​ឆ្នាំ​២០៣៥ កាលពី​ថ្ងៃទី ១៥ ខែ ធ្នូ ឆ្នាំ ២០២១ ។​

លោក ព្រុំ សុខា រដ្ឋមន្រ្តីក្រសួងមុខងារសាធារណៈ(រូបថតក្រសួងមុខងារសាធារណៈ)

​កិច្ចប្រជុំ​នេះ​បាន​ប្រព្រឹត្តទៅ តាម​ប្រព័ន្ធ​អន​ឡាញ (Zoom) ដោយមាន​ការចូលរួម​របស់​សមាជិក​គណៈកម្មាធិកា​រ​ដែលជា​តំណាង​ក្រសួង ស្ថាប័ន​ទាំងអស់​នៅ​ថ្នាក់ជាតិ និង​ប្រធាន​ក្រុមការងារ​កែទម្រង់រដ្ឋបាល​សាធារណៈ​ដែលជា​អភិបាល ឬ​តំណាង​រដ្ឋបាល​រាជធានី ខេត្ត​ទាំង​២៥ រួមទាំង​មន្ត្រី​ជំនាញ​ពាក់ព័ន្ធ​នៅ​ថ្នាក់ជាតិ និង​ថ្នាក់ ក្រោម​ជាតិ​មួយចំនួនទៀត សរុប​អ្នកចូលរួម​មាន​ចំនួន ១៥០​រូប​។​

នាឱកាស​នោះ លោក ព្រុំ សុខា បានធ្វើការ​វាយតម្លៃ​ប្រកបដោយ​សុទិដ្ឋិនិយម​ពី​វឌ្ឍនភាព​នៃ​កម្មវិធី​កែទម្រង់រដ្ឋបាល​សាធារណៈ​របស់​រាជរដ្ឋាភិបាល​កម្ពុជា​ក្រោម​ការដឹកនាំ​ដ៏​ឈ្លាសវៃ​ថ្លៃថ្លា​របស់ សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា ដែល​បាន​ដំណើរការ​ចាប់តាំងពី​ឆ្នាំ ១៩៩៣ រហូតមកដល់​បច្ចុប្បន្ន​។​

​លោក​បាន​បន្តថា កំណែទម្រង់រដ្ឋបាល​សាធារណៈ​មាន​តួនាទី​ស្នូល​ក្នុង​ការកសាង​ពង្រឹង​នីតិរដ្ឋ​នៅ​កម្ពុជា កសាង​អភិវឌ្ឍ​សមត្ថភាព​ស្ថាប័នរដ្ឋ និង​ធនធានមនុស្ស​ក្នុង​វិស័យ​សាធារណៈ ធ្វើជា​បង្អែក​រឹងមាំ​ដល់​ផ្នែក​ឯកជន និង​បង្កលក្ខណៈ​ធានា​ដល់​ប្រក្រតីភាព​នៃ​ជីវភាព​រស់នៅ​របស់​ប្រជាជន រួមចំណែក​យ៉ាងសំខាន់​ដល់​ការពង្រឹង​បុព្វហេតុ​សុខសន្តិភាព វឌ្ឍនភាព សុខុមាលភាព និង​វិបុលភាព​របស់​សង្គមជាតិ​។​

​បន្ទាប់ពី​បាន​ពិភាក្សា​សំរេច​លើ​នីតិវិធី​នៃ​ការជំរុញ​អនុម័ត​ជា​ផ្លូវការ​ឱ្យបាន​ឆាប់​នូវ​កម្មវិធី​ជាតិ​កែទម្រង់រដ្ឋបាល​សាធារណៈ សំរាប់​រយៈពេល ២០២២-២០៣៥ រួចមក កិច្ចប្រជុំ​ក៏បាន​តាមដាន​ដោយ​យកចិត្តទុកដាក់​នូវ​បទ​បង្ហាញ​ពី​ការអភិវឌ្ឍ​ប្រព័ន្ធគ្រប់គ្រង​ទិន្នន័យ​ព័ត៌មាន​មន្ត្រីរាជការ និង​តារាង​បៀវត្ស ដែល​កំពុង​អនុវត្ត​សាកល្បង​ប្រើប្រាស់​ដោយ​ជោគជ័យ នូវ​កម្មវិធី​ផ្នែក​ទន់ (Software) ថ្មី ដែល​បង្កើតឡើង​ដោយ​មន្ត្រី​ជំនាញ​បច្ចេកវិទ្យា​ព័ត៌មាន​របស់​ក្រសួង​មុខងារសាធារណៈ ហើយ​ខាងមុខនេះ​ក្រសួង​មុខងារសាធារណៈ​ក៏​នឹង​ទទួលបាន​នូវ​ជំនួយ​ម៉ាស៊ីន​ផ្នែក​រឹង (Hardware) ថ្មី​ផងដែរ​។​

​លោក រដ្ឋមន្ត្រី​ក៏បាន​គូសបញ្ជាក់​សារជាថ្មី​ពី​សារៈសំខាន់​មាន​អត្ថន័យ​ស្លាប់​រស់​នៃ​កំណែទម្រង់រដ្ឋបាល​សាធារណៈ​តាម​ប្រសាសន៍​ដឹកនាំ​ដ៏​ខ្ពង់ខ្ពស់​របស់ សម្ដេច​តេ​ជោ ហ៊ុន សែន នាយករដ្ឋមន្ត្រី​កម្ពុជា គឺ “​កែទម្រង់​រស់ មិន​កែទម្រង់​ស្លាប់​” ដោយ​សង្កត់ធ្ងន់​បន្ថែម​ទៀតថា កម្មវិធី​កំណែ ទម្រង់​ទាំងអស់​អាចអនុវត្ត​សំរេច​ជោគជ័យ​ទៅបាន​គឺ​អាស្រ័យ​ដោយ​ការចូលរួម​យ៉ាងសកម្ម​ពី​តួអង្គ​ពាក់ព័ន្ធ​ទាំង អស់ នៅ​គ្រប់ផ្នែក គ្រប់​ថ្នាក់​ទាំង​នៅ​ថ្នាក់ជាតិ និង​ថ្នាក់ ក្រោម​ជាតិ និង​ដោយមាន​ការគាំទ្រ​ពី​ប្រជាជន​និង​សង្គមជាតិ​ទាំងមូល​៕​សរន​

ក្រសួង​មុខងារសាធារណៈ​បើក​កិច្ចប្រជុំ​គណៈកម្មាធិការ​កែទម្រង់​រដ្ឋបាល​សាធារណៈ ផ្ដោត​ការជំរុញ​ដំណើរ​ការកសាង​បញ្ចប់​កម្មវិធី​ជាតិ​កែទម្រង់រដ្ឋបាល​សាធារណៈ (២០២២-២០៣៥)(រូបថតក្រសួងមុខងារសាធារណៈ)