ដោយៈ​មុនី​រ័ត្ន​,​ទេ​ពក​ង្រី​/​ភ្នំពេញៈ​មន្ត្រី​នគរបាលជាតិ​ពីររូប​នៃ​ស្នងការដ្ឋាន​នគរបាល​ខេត្តកំពង់ឆ្នាំង​ដែលជា​ប់​ពាក់​ព​ន្ធ័​នឹង​ការកាន់កាប់​ព្រៃ​លិច​ទឹក ត្រូវបាន​ឃាត់ខ្លួន​ជា​ផ្លូវការ​ដោយ​អង្គភាព​ប្រឆាំង​អំពើពុករលួយ​។​។​ជនជាប់សង្ស័យ​គឺ ឧ​ត្ត​ម​សេនីយ៍​ត្រី ស៊ុំ សុជាតិ ជា​ស្នងការរង​នគរបាល​ខេត្ត និង វរសេនីយ៍ឯក កែវ ណា​រុន ប្រធានការិយាល័យ អន្តរាគមន៍​និង​តម្រួត​បទបញ្ជា​នៃ​ស្នងការដ្ឋាន​នគរបាល​ខេត្តកំពង់ឆ្នាំង​។​អ្នក​ទាំងពីរ​ត្រូវបាន​នាំខ្លួន​មកកាន់​អង្គភាព​ប្រឆាំង​អំពើពុករលួយ​កាលពី​ព្រឹក​ថ្ងៃទី​១៦​ខែធ្នូ​ឆ្នាំ​២០២១​។​

​យោងតាម​សេចក្តីប្រកាស​ព័ត៌មាន​ដាច់ដោយឡែក​ពីគ្នា​របស់​អ្នកនាំពាក្យ​អង្គភាព​ប្រឆាំង​អំពើពុករលួយ (​អ​.​ប​.​ព​.)នៅរាត្រីថ្ងៃទី១៦ខែធ្នូ​បាន​ឲ្យ​ដឹង ថា ក្រោយពី​បាន ធ្វើការ​ស្តាប់​ចម្លើយ ឈ្មោះ ស៊ុំ សុជាតិ ភេទ​ប្រុស អាយុ ៥១​ឆ្នាំ​រួចមក​អង្គភាព​ប្រឆាំង​អំពើពុករលួយ បាន​ពិនិត្យឃើញថា ជន សង្ស័យ​ខាងលើ បាន​ជាប់​ពាក់​ព​ន្ធ័​នឹង​ការកាន់កាប់ និង​បាន​លក់​ព្រៃ​លិច​ទឹក​តំបន់​៣ ក្នុងស្រុក​កំពង់លែង​ខេត្តកំពង់ឆ្នាំង​។​ដូចនេះ​អង្គភាព​ប្រឆាំង​អំពើពុករលួយ​សម្រេច​ឃាត់ខ្លួន​ជនសង្ស័យ​ខាងលើ​នៅ​ថ្ងៃទី ១៦ ខែធ្នូ ឆ្នាំ​២០២១ នៅវេលា ម៉ោង​២០ និង​៤៥​នាទី ដើម្បី​បន្ត​នីតិវិធី​ច្បាប់​។​

​សេចក្តីប្រកាស​មួយទៀត​បាន​និយាយថា​ក្រោយពី​បាន ឮ​ធ្វើការ​ស្តាប់​ចម្លើយ ឈ្មោះ កែវ ណា​រុន ភេទ​ប្រុស អាយុ ៥៩​ឆ្នាំ​រួចមក​អង្គភាព​ប្រឆាំង​អំពើពុករលួយ​បាន​ពិនិត្យឃើញថា ជនសង្ស័យ​ខាងលើ បាន​ជាប់​ពាក់​ព​ន្ធ័ នឹង​ការកាន់កាប់​ព្រៃ​លិច​ទឹក​តំបន់​៣ ក្នុងស្រុក​កំពង់លែង ខេត្តកំពង់ឆ្នាំង​។ ដូចនេះ អង្គភាព ប្រឆាំង​អំពើពុករលួយ សម្រេច​ឃាត់ខ្លួន​ជនសង្ស័យ​ខាងលើ​នៅ​ថ្ងៃទី ១៦ ខែធ្នូ ឆ្នាំ​២០២១ វេលា​ម៉ោង ២០​និង​៥០​នាទី ដើម្បី​បន្ត​នីតិវិធី​ច្បាប់​។​
​សូមបញ្ជាក់ថា មន្ត្រីនគរបាល​ទាំងពីរ​រូបនេះ​ត្រូវបាន​នាំខ្លួន​មកកាន់​អង្គភាព​ប្រឆាំង​អំពើពុករលួយ​កាលពី​ព្រឹក​ថ្ងៃទី​១៦ខែធ្នូ​ដើម្បី​សាកសួរ​ពាក់ព័ន្ធ​នឹង​ការកាប់​រាន​ព្រៃ​លិច​ទឹក​នៅ​ស្រុក​កំពង់លែង ខេត្តកំពង់ឆ្នាំង​៕​សរន​