​ដោយៈ ប​.​ជ័យ / បន្ទាយ​មាន​ជ័​យៈ នៅ​ខេត្តបន្ទាយមានជ័យ ធ្លាប់បាន​ដាំ​ដើម​រាំង​ទឹក ជាង ៦.០០០ ដើម នៅ​តំបន់​ព្រៃ​លិច​ទឹក និង​នៅ​មាត់​អាង​តំបន់​ខ្ពង់រាប ។​

​លោក ឡុ​ញ វុទ្ធី នាយ​ខ័​ណ្ឌ​រដ្ឋបាល​ជលផល បន្ទាយមានជ័យ បាន​ប្រាប់​រស្មី​កម្ពុជា កាលពី​ថ្ងៃទី​១៧ ខែធ្នូ​ថាៈ នា​បណ្តា​ឆ្នាំ​ចុង​ក្រោយនេះ រដ្ឋបាល​ជលផល ម​ន្ទូ​ី​រ​កសិកម្ម និង​អាជ្ញា​ធរមាន​សមត្ថកិច្ច បាន​ដាំ​ដើម​រាំង​ទឹក បាន ៦.៥០០ ដើម​ក្នុងនោះ បាន​ដាំ នៅ​ម្តុំ​អាង​លី សំអាន នា​ភូមិសាស្ត្រ ឃុំ​ប្រាសាទ ស្រុក​ព្រះនេត្រព្រះ ជា​តំបន់​ព្រៃ​លិច ទឹក បាន ៣.៥០០ ដើម និង​ដាំ​នៅ​មាត់​អាង​ជើងគ្រុះ នៅ​ឃុំ​បន្ទាយឆ្មារ ជា​តំបន់ ខ្ពង់រាប បាន ៣.០០០ ដើម ។​

​លោក ឡុ​ញ វុទ្ធី បាន​បន្តថាៈ នៅ​ភូមិសាស្ត្រ តំបន់​ក្រោម ឬ​តំបន់​ព្រៃ​លិច​ទឹក និង​កន្លែង​ផ្សេងទៀត ក្នុង​ខេត្តបន្ទាយមានជ័យ មិនសូវ​សម្បូរ​ដើម​រាំង​ទឹក​ទេ បើ​មាន ក៏​ជា​ប្រភេទ ទំហំ​ដើម​តូច និង​មធ្យម​។ កន្លែង​ដែល​គ្រាន់​សម្បូរ ដើម​រាំង​ទឹក មាននៅ​ស្ទឹង​កំបុត ក្នុងភូមិ​សាស្ត្រ​ឃុំ​ភ្នំ​លៀប និង​ឃុំ​ប្រាសាទ ស្រុក​ព្រះនេត្រព្រះ (​ដើម​តូច និង​មធ្យម​) និង​នៅ​តំបន់​អភិរក្ស កាំ​ព្រីង អតីត​ឡូ​តិ៍​លេខ​១ ភូមិសាស្ត្រ ខេត្តបាត់ដំបង ដែល​គ្រប់គ្រង ដោយ​ខ័​ណ្ឌ​រដ្ឋបាល​ជលផល បន្ទាយមានជ័យ ដែលមាន​ដើម​រាំង​ធំ​។​

​សូមបញ្ជាក់ថា ក្រសួងកសិកម្ម រុក្ខាប្រមាញ់ និង​នេសាទ កាលពី​ថ្ងៃទី​១៣ ខែធ្នូ ឆ្នាំ​២០២១ បានចេញ​លិខិត គោរព​ជូន សម្តេច​តេ​ជោ នាយករដ្ឋមន្ត្រី ស្នើសុំ​ជួយ​មាន វិធានការ ទប់ស្កាត់ និង​ហាមឃាត់ ការនាំចេញ ដើម​រាំង​ទឹក ទៅ​បរទេស​៕/V​