ដោយៈ សៅ​វ៉ាន់ឌី / ព្រះ​វិហារៈ ប្រធានមន្ទីរ​សាធារណការ និង​ដឹកជញ្ជូន ខេត្តព្រះវិហារ បាន​អំពាវនាវ ដល់​ម្ចាស់​យានយន្ត គ្រប់​ប្រភេទ កុំ​កែច្នៃ និង​ដឹកជញ្ជូន ត្រូវគោរព​ទៅតាម​ច្បាប់​កំណត់​។ កុំ​កែច្នៃ​ខុស លក្ខណៈ​បច្ចេកទេស និង​កុំ​ដឹកជញ្ជូន លើស​ទម្ងន់ ត្រូវ​ក្រុមការងារ អនុវត្តន៍​តាមច្បាប់​។​

​លោក សំ លាង​ទ្រី ប្រធាន​មន្ទីរ​សាធារណការ និង​ដឹកជញ្ជូន ខេត្តព្រះវិហារ បានឱ្យដឹង នៅ​រសៀល ថ្ងៃទី​១៧ ខែធ្នូ ឆ្នាំ​២០២១​ថាៈ ក្រុមការងារ មន្ទីរ​សាធារណការ និង​ដឹកជញ្ជូន ខេត្តព្រះវិហារ បាន​ឃាត់​រថយន្ត មួយគ្រឿង ម៉ាក​សាំ​យ៉ុង ដែល​កែច្នៃ ខុស​លក្ខណៈ​បច្ចេកទេស កំពុង​បើកបរ លើ​ដង​ផ្លូវជាតិ​លេខ​៦២ ក្នុងភូមិ​អូរ​ពោធិ ឃុំរ​ម្មណី​យ៍ ស្រុក​រវៀង​។ ក្រុមការងារ បាន​កាត់​ទ្រុង នៅ​ហ្នឹង​កន្លែង ជាមួយ​ការ ផាកពិន័យ និង​ធ្វើ​កិច្ចសន្យា បញ្ឈប់​ការកែច្នៃ ខុសច្បាប់ តទៅទៀត​។​

​លោក​នឹង​អនុវត្តន៍ ទៅតាម​ច្បាប់ ដោយ​មិន​លើកលែង ចំពោះ​រថយន្ត ដែល​កែច្នៃ ខុស​លក្ខណៈ​បច្ចេកទេស បើកបរ​លើ​ដងផ្លូវ គឺ​ចាប់​ដកហូត​តែម្តង មិន​ឲ្យ​ធ្វើ​ចរាចរណ៍ ទៀត​ទេ​។ ចំណែក​រថយន្ត​ដឹក​លើស​ទម្ងន់​កំណត់ គឺ​ចាប់ផ្តើម​អនុវត្តន៍ ផាកពិន័យ ចាប់ពី​ថ្ងៃទី​២១ ខែធ្នូ ឆ្នាំ​២០២១ នេះ​តទៅ​។​

​លោក​បាន​បន្តថាៈ ចាប់ពី​ថ្ងៃទី​២១ ខែធ្នូ ឆ្នាំ​២០២១ តទៅ ក្រុមការងារ​ប្រចាំ នៅ​ស្ថានីយ៍​ជញ្ជីង​ថ្លឹង រថយន្ត​អូរ​ពោធិ នឹង​ចាប់ផ្តើម​ផាកពិន័យ ចំពោះ​រថយន្ត ដឹកជញ្ជូន លើស​ទម្ងន់​កំណត់ ហើយ ព្រោះ​កន្លងមក ក្រុមការងារ មិនបាន​ផាក ពិន័យ​នោះទេ ទោះ​ដឹងថា រថយន្ត​នោះ ដឹក​លើស​ទម្ងន់​ក៏ដោយ ប៉ុន្តែ​ចាប់ពី​ថ្ងៃទី​២១ ធ្នូ តទៅ នឹង​អនុវត្តន៍​ទៅតាម​ច្បាប់​ហើយ​៕/V​