​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ បេក្ខជន​គាំទ្រ​ទីក្រុង​ប៉េកាំង​បានឈ្នះ​លើសលប់​ក្នុង​ការបោះឆ្នោត​នីតិប្បញ្ញត្តិ​របស់​ទីក្រុង​ហុងកុង​ដោយបាន​យកឈ្នះ​លើ​អ្នក​កណ្តាល​និង​អ្នក​ឯករាជ្យ​នៅ​ក្នុងការ​​ស្ទង់​មតិ​ជា​សាធារណៈ​លើកដំបូង​របស់​ទីក្រុង បន្ទាប់​ពី​ប្រទេស​ចិន​បាន​អនុម័ត​សេចក្តីសម្រេច​ចិត្ត​មួយ​ដើម្បី​ធានា​ថា​មានតែ “​អ្នកស្នេហាជាតិ​” ប៉ុណ្ណោះ​ទើប​អាច​គ្រប់គ្រង​ទីក្រុង​នេះ​បាន​។​

​មេដឹកនាំ​ហុងកុង​លោកស្រី ខា​រី ឡាំ និយាយ​នៅក្នុង​សន្និសីទ​សារព័ត៌មាន​មួយ​នៅ​ថ្ងៃ​ចន្ទ​នេះ​ថា លោកស្រី “​ពេញចិត្ត​” ចំពោះ​ការបោះឆ្នោត​នេះ បើទោះជា​មាន​អ្នក​ទៅ​បោះឆ្នោត​មាន​ចំនួន​តែ ៣០,២ ភាគរយ​ដែល​ជា​កម្រិត​ទាប​បំផុត​ចាប់តាំងពី​អង់គ្លេស​បាន​ប្រគល់​ហុង​កុង​ឱ្យ​ប្រទេស​ចិន​ក្នុង​ឆ្នាំ ១៩៩៧ ក៏ដោយ​។​

​លោក​ស្រី​និយាយថា​ចំនួន​អ្នក​ចុះ​ឈ្មោះ​បោះឆ្នោត​បាន​កើន​ដល់ ៩២,៥ ភាគរយ ដែល​ជា​កំណត់ត្រា​ខ្ពស់​បំផុត​ធៀប​នឹង​ការបោះឆ្នោត​ឆ្នាំ ២០១២ និង​ឆ្នាំ ២០១៦ ដែល​មាន​អ្នកបោះឆ្នោត​ចុះ​ឈ្មោះ​ប្រមាណ ៧០ ភាគរយ​។​

​លោកស្រី​បាន​បន្តថា “​សម្រាប់​អ្នក​ដែល​បាន​ចុះ​ឈ្មោះ​បោះឆ្នោត ការសម្រេចចិត្ត​ថា​តើ​ពួក​គេ​ចង់​ប្រើ​សិទ្ធិ​បោះឆ្នោត​ក្នុង​ការបោះឆ្នោត​ជាក់លាក់​ឬ​យ៉ាងណា​នោះ​គឺជា​បញ្ហា​ទាំងស្រុង​របស់​ពួកគេ​”​។​

“​នៅក្នុង​ការបោះឆ្នោត​នេះ អ្នកបោះឆ្នោត ១,៣៥ លាន​នាក់​បាន​មក​បោះឆ្នោត​។ ពួកគេ​មិន​ត្រឹមតែ​បោះ​ឱ្យ​បេក្ខជន​ជម្រើស​របស់​ពួកគេ​ឱ្យ​ជាប់​ក្នុង LegCo (​ក្រុមប្រឹក្សា​នីតិប្បញ្ញត្តិរ​បស់​ហុងកុង​) ឡើងវិញ​នោះ​ទេ ហើយ​ខ្ញុំ​គិតថា​វា​ក៏​ដោយសារ​តែ​ការគាំទ្រ​របស់​ពួកគេ​ចំពោះ​ប្រព័ន្ធ​បោះឆ្នោត​ដែល​ត្រូវបាន​កែលម្អ​ផងដែរ​”​។​

​នៅក្រោម​ច្បាប់​ថ្មី ចំនួន​សមាជិក​សភា​ដែល​ជាប់ឆ្នោត​ដោយ​ផ្ទាល់​ត្រូវបាន​កាត់បន្ថយ​ពី ៣៥ មក​នៅត្រឹម ២០ នាក់​សូម្បី​សភា​ត្រូវបាន​ពង្រីក​ពី ៧០ ទៅ ៩០ អាសនៈ​។​សមាជិក​សភា​ភាគច្រើន​ត្រូវបាន​​តែងតាំង​ដោយ​ស្ថាប័ន​ដែល​គាំទ្រ​ទីក្រុង​ប៉េកាំង ដោយ​ធានា​ថា ពួក​គេ​បង្កើត​បាន​សំឡេង​ភាគច្រើន​ក្នុង​សភា​។​

​បេក្ខជន​ទាំងអស់​ក៏​ត្រូវ​បាន​ពិនិត្យ​ដោយ​គណៈកម្មាធិការ​ដែល​គាំទ្រ​ទីក្រុង​ប៉េកាំង​យ៉ាង​ទូលំទូលាយ​ផងដែរ មុន​ពេល​ពួកគេ​អាច​ត្រូវបាន​តែងតាំង​។​

​ជំរំ​ប្រឆាំង​បាន​រិះគន់​ការបោះឆ្នោត​នេះ ដោយ​គណបក្ស​គាំទ្រ​លទ្ធិប្រជាធិបតេយ្យ​ធំជាងគេ គឺ​គណបក្ស​ប្រជាធិបតេយ្យ​មិន​បាន​ដាក់​បេក្ខជន​ឈរឈ្មោះ​ជា​លើកដំបូង​ចាប់តាំងពី​ការប្រគល់​ហុងកុង​ក្នុង​ឆ្នាំ​១៩៩៧​។​

​លោកស្រី​ឡាំ​និយាយថា លោកស្រី​រំពឹងថា​ការងារ​ជាមួយ​សមាជិក​សភា​ទាំង ៩០ រូប​នឹង​បន្ត “​គួរ​ឱ្យ​រំភើប​” ដោយសារតែ​ពួកគេ​មានមតិ​ផ្សេងគ្នា​លើ​បញ្ហា​សង្គម​ជាច្រើន​។​

​លោកស្រី​រំពឹង​ធ្វើដំណើរ​ទៅ​កាន់​ទីក្រុង​ប៉េកាំង​នៅ​ល្ងាច​ថ្ងៃ​ចន្ទ​នេះ​ដើម្បី​ផ្តល់​របាយការណ៍​ពេញលេញ​ដល់​ទីក្រុង​ប៉េកាំង​អំពី​ស្ថានភាព​នយោបាយ​និង​សេដ្ឋកិច្ច​ចុងក្រោយបង្អស់​នៅ​ហុងកុង​៕

​មេដឹកនាំ​ហុងកុង​លោកស្រី ខា​រី ឡាំ រីករាយ​នឹង​លទ្ធផល​ឆ្នោត​ហើយ​នឹង​ធ្វើដំណើរ​ទៅ​កាន់​ទីក្រុង​ប៉េកាំង​នៅ​ល្ងាច​ថ្ងៃ​ចន្ទ​