ដោយៈមុនីរ័ត្ន/ភ្នំពេញ : គណៈកម្មាធិការ​សិទ្ធិមនុស្ស​កម្ពុជាសង្កេតឃើញថា ប៉ុន្មាន​ថ្ងៃនេះ មានការ​ផ្សព្វផ្សាយ​នូវ​ឯកសារផ្ទៃក្នុង​របស់​គណៈកម្មាធិកា​រ​សិទ្ធិមនុស្ស​កម្ពុជា អំពី​លទ្ធផល​អង្កេត​របស់​ក្រុមការងារ​ដោះស្រាយ​បណ្ដឹងរបស់​គណៈកម្មាធិការ​សិទ្ធិមនុស្ស​កម្ពុជាពាក់ព័ន្ធ​នឹង​សំណុំរឿង​វិវាទ​ដីធ្លី​នៅ​ឃុំ​កែវផុស ស្រុក​ស្ទឹងហាវ ខេត្ត​ព្រះសីហនុ តាម​បណ្តាញសារព័ត៌មាន​នានា ដែល​ផ្ដល់​ដោយ​សាមីខ្លួន ដែលជា​ភាគី​នៃ​វិវាទ​ដើម្បីដាក់បន្ទុក​លើ​ភាគី​ម្ខាង​ទៀត​ក្នុង​សំណុំ​រឿងនេះ​។​នេះ​បើ​យោងតាម​សេចក្តីប្រកាស​ព័ត៌មាន​របស់​គណៈកម្មាធិកា​រ​នេះ​នៅ​ថ្ងៃទី​២១​ខែធ្នូ​ឆ្នាំ​២០២១។

​គណៈកម្មាធិការ​សិទ្ធិមនុស្ស​កម្ពុជា​បាន​បន្តថា គណៈកម្មាធិការ​សិទ្ធិមនុស្ស​កម្ពុជា មាន​បេសកកម្ម​ក្នុងការ​ទទួល​និង​ដោះស្រាយ​បណ្ដឹង​របស់​ប្រជាពលរដ្ឋ​ពាក់ព័ន្ធ​នឹង ការរំលោភ​សិទ្ធិមនុស្ស ហើយ​លទ្ធផល​នៃ​ការអង្កេត​ស្រាវជ្រាវ​របស់​ក្រុមការងារ​ដោះស្រាយ​បណ្ដឹង​របស់ គណៈកម្មាធិការ​សិទ្ធិមនុស្ស​កម្ពុជា គ្រាន់តែ​ជា​មូលដ្ឋាន​បឋម និង​ត្រូវ​ប្រគល់ជូន​សាមីខ្លួន ដើម្បី​ប្រើប្រាស់​ជា ភស្តុតាង​បន្ថែម ដើម្បី​ការពារ​សិទ្ធិ​របស់ខ្លួន​តាមផ្លូវ​ច្បាប់ ក្នុង​ដំណើរ​នីតិវិធី​របស់​តុលាការ និង​ជូនទៅ​ស្ថាប័ន មាន​សមត្ថកិច្ច​ពាក់ព័ន្ធ​ផងដែរ ដើម្បី​ជា​មូលដ្ឋាន​ក្នុងការ​ស៊ើបអង្កេត និង​ស្រាវជ្រាវ​បន្ថែម​។​

​គណៈកម្មាធិការ​សិទ្ធិមនុស្ស​កម្ពុជា មានការ​សោកស្តាយ និង​ខកចិត្ត​ចំពោះ​សាមី​បណ្ដឹង ដែល​បាន ប្រើប្រាស់​ឯកសារ​ផ្ទៃ​ក្នុងនេះ ធ្វើការ​វាយប្រហារ និង​ដាក់​សម្ពាធ​ដល់​ភាគី​ម្ខាង​ទៀត​ក្នុង​សំណុំ​រឿងនេះ តាម បណ្ដាញសារព័ត៌មាន ជា​សាធារណៈ ដែល​ខុសពី​គោលបំណង និង​ចេតនា​ពិតប្រាកដ និង​ប៉ះពាល់​ផងដែរ ដល់​វិជ្ជាជីវៈ​ក្នុងការ​រក្សា​ការសម្ងាត់​នៃ​ការស៊ើបអង្កេត​របស់​គ​ណៈ​ក​ម្មា​ធិ​ការ​សិទ្ធិមនុស្ស​កម្ពុជា ក្នុង​បេសកកម្ម ការពារ និង​លើកស្ទួយ​សិទ្ធិមនុស្ស​៕​សរន​