ប្រែ​សម្រួលៈ​វាសនា​/​ឡុង​ដ៍​៖ ប្រេង​ឆៅ​នៅ​ថ្ងៃ​ចន្ទ​ទី​២៧​ធ្នូ​បាន​ធ្លាក់​ថ្លៃ​ក្រោយ​ក្រុមហ៊ុន​អាកាសចរណ៍​អាម៉េរិក​លុបចោល​ជើងហោះហើរ​រាប់ពាន់​ក្នុងអំឡុងពេល​បុណ្យ​គ្រី​សម៉ាស​ចំពេល​កូវី​ដ​១៩​បន្ត​រីក​រាល​​ដាល​ខ្លាំង​ឡើង ។​

​ជើងយន្តហោះ​ជាង​១.៣០០​ត្រូវបាន​ក្រុមហ៊ុន​អាកាសចរណ៍​អាម៉េរិក​លុប​ចោល​កាលពី​ថ្ងៃអាទិត្យ ខណៈពេល​ដែល​កូវី​ដ​១៩​បាន​កាត់បន្ថយ​បុគ្គលិក​អាកាសចរណ៍ ហើយ​នាវា​កម្សាន្ត​ធំៗ​ជាច្រើន​ត្រូវ​បញ្ឈប់​​គំរោង​ដំណើរ​កម្សាន្ត​។​

​ប្រេង​ឆៅ​នៅ​ផ្សារ​អាម៉េរិក​បាន​ធ្លាក់ចុះ​១,២​ដុល្លារ មក​នៅត្រឹម​៧២,៥៩​ដុល្លារ​ក្នុង​មួយ​បារ៉ែល ខណៈ​ប្រេង​ផ្សារ​អាស៊ី​ចុះ​៨​សេន មក​នៅត្រឹម​៧៦,០៦​ដុល្លារ​។​

​ជេ​ហ្វ​ហ្វ្រេ ហាល​លី អ្នកវិភាគ​នៅ​ក្រុម​កម្រៃជើងសារ​OANDA​បាន​និយាយថា​«​ការធ្វើដំណើរ​ថយចុះ​ស្មើ​នឹង​សកម្មភាព​សេដ្ឋកិច្ច​ធ្លាក់​ចុះ​នៅ​អាម៉េរិក និង​ស្មើនឹង​ប្រេង​ធ្លាក់​ថ្លៃ​។​ការរាំងស្ទះ​ទំនិញ​និង​សេវា​​ដោយសារតែ​កម្មករ​ជាប់​ធ្វើ​ចត្តា​ឡី​ស័ក ជាពិសេស​ក្នុង​វិស័យ​ធ្វើដំណើរ​បង្ក​ផលប៉ះពាល់​ចម្បង​តាំងពី​មុន​មក​។​វា​គ្រាន់តែ​ជា​ចលាចល​រយៈពេល​ខ្លី ខណៈ​រឿង​សេដ្ឋកិច្ច​រើប​រើ​ឡើងវិញ​នៅ​ឆ្នាំ​២០២២​នឹង​​ស្ថិតនៅ​នៅលើ​ផ្លូវ​របស់​វា​ដដែល​»​។​

​សូមបញ្ជាក់​ថា ប្រេង​បាន​ឡើងថ្លៃ​ជាង​៤៥​ភាគរយ​នៅ​ឆ្នាំនេះ ដោយសារ​តំរូវការ​ខ្ពស់​និង​ការកាត់បន្ថយ​ការផ្គត់ផ្គង់​ពី​អង្គការ​ប្រទេស​នាំចេញ​ប្រេង​(OPEC)​រួម​ជាមួយ​សម្ពន្ធមិត្ត​ដែល​គេ​ស្គាល់​ថា​OPEC+​។​

​ប្រេង​បាន​ធ្លាក់​ថ្លៃ​ជាង​១០​ភាគរយ​កាលពី​ថ្ងៃ​២៦​វិច្ឆិកា​នៅពេល​មាន​សេចក្តីរាយការណ៍​អំពី​វីរុស​កូរ៉ូ​ណាបំ​ប្លែងខ្លួន​ថ្មី​អូ​មូ​ក្រុង​បាន​លេចឡើង​លើ​លោក តែ​វា​បាន​ហក់​ឡើងវិញ​កាលពី​សប្តាហ៍​មុន​ក្រោយ​ទិន្ន​​ន័យ​ដំបូងៗ​បង្ហាញថា អូ​មូ​ក្រុង​អាច​បង្ក​ជំងឺស្រាល​ជាង​ដែល​តា​។​

​ឡែ​អូណា លីវ អ្នកវិភាគ​នៅ​ក្រុមហ៊ុន DailyFX​ដែល​មាន​មូលដ្ឋាន​នៅ​សិង្ហ​បុរី បាន​និយាយថា​«​ទោះជា​អូ​មី​ក្រុង​ឆ្លង​លឿន​ជាង​វីរុស​កូរ៉ូ​ណាបំ​ប្លែងខ្លួ​នណាៗ​ទាំងអស់ ព័ត៌មាន​ដែល​ទទួលបាន​មក​គឺថា​​មនុស្ស​ជាច្រើន​ដែល​ឆ្លង​វា​ចេញ​រោគសញ្ញា​ស្រាល​»​។​

​ឥឡូវ​ពួក​អ្នកវិនិយោគ​កំពុង​សម្លឹង​ទៅរក​កិច្ចប្រជុំ​OPEC+​នៅ​ថ្ងៃ​៤​មករា ដែល​ពេលនោះ​សម្ពន្ធភាព​អ្នក​ផលិត​ប្រេង​នេះ​នឹង​សំរេច​ថា​តើ​នឹង​បន្ត​បង្កើន​ការផលិត​ប្រេង​៤០០.០០០​ធុង​ក្នុង​មួយ​ថ្ងៃ​នៅ​ខែ​​កុម្ភៈ​តាម​ផែនការ​ដែរ​ឬ​អត់​។​OPEC+​នៅ​តែ​ប្រកាន់​ការសន្យា​ក្នុង​កិច្ចប្រជុំ​របស់ខ្លួន​លើក​មុន​ថា​នឹង​បង្កើន​ផលិតកម្ម​ប្រេង​ក្នុង​បរិមាណ​នេះ​នៅ​ដើម​ឆ្នាំ​ក្រោយ ទោះ​ជា​វត្ត​មាន​អូ​មី​ក្រុង​៕

ដល់ថ្ងៃទី៣ កូវីដ១៩រំខានការធ្វើដំណើរនៅអាម៉េរិក