ដោយៈ សុផល / ភ្នំពេញៈ ថ្នាក់ដឹកនាំ និង​ក្រុមការងារ​ជំនាញ​បច្ចេកទេស នៃ​ក្រសួង​សាធារណការ និង​ដឹកជញ្ជូន បាន​ប្រជុំ​ពិនិត្យ និង​ពិភាក្សា​លើ សេចក្តីព្រាង​អនុក្រឹត្យ ស្តីពី​ការគ្រប់គ្រង​ដី ចំណី​ផ្លូវដែក នា​ថ្ងៃទី​២៨ ខែធ្នូ ឆ្នាំ​២០២១ នៅ​ទីស្ដីការក្រសួង​។​

​អនុក្រឹត្យ​នេះ មាន​គោលបំណង​គ្រប់គ្រង និង​លុបបំបាត់​បាតុភាព ការទន្ទ្រាន​យក​ដី ចំណី​ផ្លូវដែក ទៅធ្វើ​ការកសាង​សំណង់ ឬ​ដាំ​ដំណាំ​ផ្សេងៗ សំដៅ​ទប់ស្កាត់​ឧបទ្ទវហេតុ គ្រោះថ្នាក់​ចរាចរណ៍ និង​ការរក្សា សណ្តាប់ធ្នាប់​សង្គម ដែល​តែងតែ​កើតមាន នៅតាម​បណ្ដាញ​ផ្លូវដែក ក៏ដូចជា កាត់បន្ថយ​ឧបសគ្គ​នានា ដែល​រាំងស្ទះ​ដល់ ការអភិវឌ្ឍ​ផ្លូវដែក​។​

​អនុក្រឹត្យ​នេះ ក៏​ជួយ​កាត់បន្ថយ រាល់​ការចំណាយ​របស់​រដ្ឋ ទៅលើ​ការដោះស្រាយ ផលប៉ះពាល់​ផ្ទះសំបែង ប្រជាពលរដ្ឋ ដែល​តាំង​ទីលំនៅ តាម​បណ្ដាញ​ផ្លូវដែក បង្កលក្ខណៈ​ងាយស្រួល ដល់​សមត្ថកិច្ច​ពាក់ព័ន្ធ ក្នុងការ​ផ្ដល់​ភាពស្របច្បាប់ ដល់​ប្រជាពលរដ្ឋ ដែលមាន​កម្មសិទ្ធិ នៅតាម​បណ្ដាញ​ផ្លូវ និង​ធានា​ការអភិវឌ្ឍ វិស័យ​ហេដ្ឋារចនាសម្ព័ន្ធ​រូបវន្ត ប្រកបដោយ​និរន្តរភាព នៅ​កម្ពុជា​។​

​លោក ប៉ាល់ ចន្ទ​តារា រដ្ឋលេខាធិការ ក្រសួង​សាធារណការ និង​ដឹកជញ្ជូន ដែល​បាន​ដឹកនាំ កិច្ចប្រជុំ​នេះ បាន​មានប្រសាសន៍​ឱ្យដឹងថាៈ អង្គប្រជុំ បាន​ពិភាក្សា និង​ឯកភាព ទៅលើ​ខ្លឹមសារ និង​ចំណុច​សំខាន់ៗ​មួយចំនួន ដូចជា​ចំណងជើង អនុក្រឹត្យ ការរៀបចំ​ឡើងវិញ ទម្រង់​នៃ​អនុក្រឹត្យ និង​ចំណងជើង នៃ​ជំពូក​នីមួយៗ ដែល​រួមមានៈ ជំពូក​ទី​១ ស្ដីពី​បទបញ្ញត្តិ​ទូទៅ , ជំពូក​ទី​២ ស្ដីអំពី​សមត្ថកិច្ច​គ្រប់​គ្រង ផ្លូវដែក , ជំពូក​ទី​៣ ស្ដីអំពី​ការសង់​សង់​ផ្លូវ​ឆ្លងកាត់​ផ្លូវដែក , ជំពូក​ទី​៤ ស្តីពី​ការកំណត់ ដី​ចំណី​ផ្លូវដែក , ជំពូក​ទី​៥ ស្ដីពី​វិធានការ​សុវត្ថិភាព​ផ្លូវ​ឆ្លងកាត់ និង​កិច្ចការពារ​ដី ចំណី​ផ្លូវដែក , ជំពូក​ទី​៦ ស្ដីពី​ប្រភពធនធាន , ជំពូក​ទី​៧ ស្តីពី​ទោស​ប្បញ្ញត្តិ និង​ជំពូក​ទី​៨ ស្តីពី​អន្តរ​ប្បញ្ញត្តិ​។​

​អង្គប្រជុំ ក៏បាន​ជជែក​ពិភាក្សា​ផងដែរ នូវ​និយមន័យ​និង​ការប្រើ​ពាក្យ​បច្ចេកទេស មួយចំនួន​ដូចជា សម្ភារៈ​យាន​ផ្លូវដែក យាន​ផ្លូវដែក រថភ្លើង​។​ល​។​

​លោក​រដ្ឋលេខាធិការ ប្រធាន​អង្គប្រជុំ បាន​ណែនាំ​ឱ្យ​ក្រុមការងារ​ជំនាញ របស់​ក្រសួង យក​ខ្លឹមសារ ដែល​បាន​ឯកភាព ខាងលើ ទៅ​រៀបចំ​ជា​មាត្រា និង​ខ្លឹមសារ​លម្អិត ដើម្បី​លើកយក​មក​ពិភាក្សា នៅក្នុង​កិច្ចប្រជុំ សប្ដាហ៍​ក្រោយ​ទៀត​៕/V​