ដោយៈ មុនី​រ័ត្ន​/​ភ្នំពេញៈ កម្លាំង​សមត្ថកិច្ច​កម្ពុជា សហការ​ជាមួយ​កម្លាំង​សមត្ថកិច្ច​ចិន បាន​បើក​ប្រតិបត្តិ​ការបង្ក្រាប​ក្រុម​ឧក្រិដ្ឋ​ជួញដូរ​គ្រឿងញៀន​ឆ្លងដែន និង​រឹបអូស​គ្រឿងញៀន​ជិត​៣៥០​គីឡូក្រាម និង​ចាប់ខ្លួន​ជនជាតិ​ចិន​ចំនួន​ប្រាំបួន​នាក់ ។

​ប្រតិបត្តិ​ការបង្ក្រាប​នេះ បាន ធ្វើឡើង​នៅ​ពីរ​គោលដៅ​ផ្សេងគ្នា គឺ​នៅ​ចំណុច​វីឡា​ភ្លោះ​លេខ​២១ ផ្លូវ​លេខ R០៣ ស្តា​ផ្លា​ទី​នឹម បុរី​ប៉េង​ហូត​បឹង​ស្នោ សង្កាត់​និរោធ ខណ្ឌ​ច្បារអំពៅ និង នៅ​ភោជនីយដ្ឋាន​អី​យិន​ម៉ា​ថូ​វ សង្កាត់​បឹង​ព្រលឹត ខណ្ឌ​៧​មករា រាជធានី​ភ្នំពេញ​។ ការចុះ​បង្ក្រាប​នេះ បានធ្វើ​ឡើង​កាលពី​ថ្ងៃទី​២៤ ខែធ្នូ ឆ្នាំ​២០២១ ដោយ​អនុវត្តតាម​បញ្ជា​នាយ​ឧត្ដមសេនីយ៍ សន្តិ​បណ្ឌិត នេ​ត សាវឿន អគ្គស្នងការ​នគរបាល​ជាតិ និង​នាយ​ឧត្ដម​សេនិយ៍ ម៉ក់ ជី​តូ អគ្គ​ស្នងការរង​ទទួល​ផែន​ប្រឆាំង​បទល្មើស​គ្រឿងញៀន ក្រោម​ការបញ្ជា​ដឹកនាំ​ផ្ទាល់ របស់លោក​ឧត្ដមសេនីយ៍ឯក ឡឹ​ក វណ្ណៈ នាយក​មន្ទីរ​ប្រឆាំង​គ្រឿងញៀន ។​

​ករណី​បង្ក្រាប​នេះ ផ្ដើមចេញពី​កិច្ចសហប្រតិបត្តិការ​ជាមួយ​សមត្ថកិច្ច​ចិន​។ សមត្ថកិច្ច​កម្ពុជា ទទួលបាន​ព័ត៌មាន​ជំនាញ​ហើយ បាន​បើក​ការស៊ើបអង្កេត​អស់​រយៈពេល​ជាង​បួន​ខែ ទើប​ឈានទៅ​បង្ក្រាប​ព្រម​គ្នា​នេះ សមត្ថកិច្ច​ចិន​ក៏បាន​បង្ក្រាប​ក្រុម​ឧក្រិដ្ឋជន​ពាក់ព័ន្ធ នៅឯ​ប្រទេស​ចិន​ផងដែរ​។​

​ជា​លទ្ធផល កិច្ចប្រតិបត្តិការ​នេះ ឃាត់ខ្លួន​ជនសង្ស័យ​បាន​ប្រាំបួន​នាក់​:

១.​ឈ្មោះ HUANG RUI MING ភេទ​ប្រុស កើត​ឆ្នាំ​១៩៦៣ (​មេក្លោង​)
២.​ឈ្មោះ LI YI NAN ភេទ​ប្រុស កើត​ឆ្នាំ​១៩៨៣
៣.​ឈ្មោះ SUN LIANG ភេទ​ប្រុស កើត​ឆ្នាំ​១៩៧៩
៤.​ឈ្មោះ SUN HAI TAO ភេទ​ប្រុស កើត​ឆ្នាំ​១៩៨០
៥.​ឈ្មោះ LIU WEI CHENG ភេទ​ប្រុស កើត​ឆ្នាំ​១៩៦៩
៦.​ឈ្មោះ CHEN ZHI QUAN ភេទ​ប្រុស កើត​ឆ្នាំ​១៩៥៥
៧.​ឈ្មោះ WANG LEI ភេទ​ប្រុស កើត​ឆ្នាំ​១៩៩០
៨.​ឈ្មោះ WANG YUE ភេទ​ប្រុស កើត​ឆ្នាំ​១៩៨២
៩.​ឈ្មោះ ZHU XIAO FEI ភេទ​ប្រុស កើត​ឆ្នាំ​១៩៨២

​ការឃាត់ខ្លួន​នេះ​ក៏បាន​ចាប់យក​នូវ​វត្ថុតាង​ដូចជា គ្រឿងញៀន​ប្រភេទ មេ​តំ​ហ្វេ​តា​មីន (ICE) សរុប​រួម​ទម្ងន់ ៣៤៧​គីឡូក្រាម ៤២៧,៩៩​ក្រាម (​លាក់​ក្នុង​បំពង់​ដែក ៣៦៧​ដើម និង​៦១​កញ្ចប់​ធំ​) ជញ្ជីង​ថ្លឹង​គ្រឿងញៀន​ពីរ​គ្រឿង និង​សម្ភា​រៈវេច​ខ្ចប់​មួយចំនួន ។ ចាប់យក​ទ្រព្យសម្បត្តិ រថយន្ត​មួយគ្រឿង ម៉ាក តូយ៉ូតា អាល់​ហ្វា​ដ (TOYOTA ALPHARD) ពាក់​ស្លាក់​លេខ ភ្នំពេញ ២BE-២៩៧៣, ម៉ូតូ​មួយគ្រឿង​ម៉ាក​ហុងដា ភី​ស៊ី​អ៊ិ​ច (HONDA PCX) ពណ៌​ខ្មៅ ស្លាក​លេខ ភ្នំពេញ ១FE-៥៩៤៦, ទូរស័ព្ទដៃ ចំនួន​១០​គ្រឿង​, ប្រាក់​៣០០​ដុល្លារ​អាមេរិក​។​

​ក្រុម​ឧក្រិដ្ឋជន បានរៀបចំ​បញ្ជូន​បំពង់​ដែក​មក​កម្ពុជា ហើយ​លួច​ច្រក​គ្រឿងញៀន បំរុង​បញ្ជូន​តាមផ្លូវ​សមុទ្រ​ទៅ​ប្រទេស​ទី​៣​។ បច្ចុប្បន្ន​ជនសង្ស័យ ព្រមទាំង​វត្ថុតាង​ចាប់យក​ខាងលើ បាន​កសាង​សំណុំរឿង​បញ្ជូនទៅ​សាលាដំបូង​រាជធានី​ភ្នំពេញ ចាត់ការ​បន្ត​តាម​នីតិវិធី ៕​