ដោយ​: ពៅ​និមល / ភ្នំពេញៈ សេចក្តីព្រាងច្បាប់ ស្តីពី​វិសោធនកម្ម​ច្បាប់ សំខាន់ៗ ចំនួន​បី ដូចជា ស្តីពី​សហគ្រាស​ពាណិជ្ជកម្ម​, ស្តីពី​វិសោធនកម្ម​ច្បាប់ ស្តីពី​វិធាន​ពាណិជ្ជកម្ម និង​បញ្ជីពាណិជ្ជកម្ម និង​ស្តីពី​ការអនុម័ត យល់ព្រម លើ​កិច្ចព្រមព្រៀង ពាណិជ្ជកម្ម​សេរី រវាង​កម្ពុជា និង​កូរ៉េ របស់​ក្រសួងពាណិជ្ជកម្ម ត្រូវបាន​រដ្ឋសភា អនុម័ត​យល់ព្រម​ទាំង​ស្រុង​។ នេះ​បើតាម​ការបញ្ជាក់ របស់លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម​។​

​ក្រសួងពាណិជ្ជកម្ម កាលពី​ល្ងាច ថ្ងៃទី​២៩ ខែធ្នូ ឆ្នាំ​២០២១ កន្លងទៅ បានលើកឡើង ថាៈ នៅក្នុង​ឱកាស​ដឹកនាំ​គណៈប្រតិភូ ក្រសួងពាណិជ្ជកម្ម ឡើង​ការពារ​សេចក្តី ព្រាង​ច្បាប់ ខាងលើនេះ ក្នុងសម័យ​ប្រជុំ​រដ្ឋសភា​លើក​ទី​៦ នីតិកាល​ទី​៦ ដែល​ដឹកនាំ ដោយ សម្តេច​អគ្គ​មហា​ពញា​ចក្រី ហេង សំរិន ប្រធានរដ្ឋសភា ។​

​លោក​រដ្ឋមន្ត្រី ប៉ាន សូរ​ស័ក្តិ បានបញ្ជាក់​ថាៈ សេចក្តីព្រាងច្បាប់​ទាំងនេះ ត្រូវបាន​ឆ្លង កាត់​ជាច្រើន​ដំណាក់កាល ក្នុងសម័យ​ប្រជុំ​ពេញអង្គ ដោយ​ធ្វើការ​ត្រួតពិនិត្យ និង​ពិភាក្សា យ៉ាង​ល្អិតល្អន់ បន្ទាប់មក សម័យប្រជុំ​រដ្ឋសភា លើក​ទី​៦ នីតិកាល​ទី​៦ ក៏បាន​អនុម័ត​យល់ព្រម ទាំងស្រុង លើ​សេចក្តីព្រាងច្បាប់ ទាំងបី​នេះ ដោយ​សម្លេង គាំទ្រ ជា​ឯកច្ឆ័ន្ទ ១០២ / ១០២ សម្លេង​។

​នៅក្នុង​ឱកាស​នោះ លោក​រដ្ឋមន្ត្រី​បាន​ថ្លែងអំណរគុណ យ៉ាង​ជ្រាលជ្រៅ ដល់ សម្តេច​ប្រធាន និង​អង្គប្រជុំ​ទាំងមូល ដែល​បានអនុម័ត​យល់ព្រម សេចក្តីព្រាងច្បាប់​នេះ ហើយ​សង្ឃឹម​យ៉ាង​មុតមាំ​ថា សេចក្តីព្រាងច្បាប់ ទាំងបី​នេះ នឹង​ធ្វើឱ្យ​ប្រសើរឡើង នូវ​តម្លាភាព និង​សង្គតិភាព ក្នុង​ក្របខណ្ឌ​គតិយុត្ត​របស់​កម្ពុជា ព្រមទាំង​លើកស្ទួយ បរិយាកាស​ធុរកិច្ច នៅ​កម្ពុជា សំដៅ​ចូលរួម​ស្តារ​សង្គម – សេដ្ឋកិច្ចកម្ពុជា ពី​វិបត្តិ​នៃ​ជំងឺ​កូ​វីដ​-១៩ និង​ផ្តល់នូវ​ប្រយោជន៍ ជា​សារ​វ័​ន្ត ដល់​សង្គមជាតិ ទាំងមូល​។​

​ជាមួយគ្នានេះ លោក​បាន​បេ្ត​ជ្ញា​ថាៈ នឹង​សហការ​ជាមួយ​ក្រសួង – ស្ថាប័ន​ពាក់ព័ន្ធ​ជាតិ -​អន្តរជាតិ ឱ្យបាន​ជិតស្និទ្ធ ដើម្បី​ជំរុញ​ការអនុវត្ត​ច្បាប់​នេះ ឱ្យមាន​ប្រសិទ្ធភាព​ខ្ពស់​។​

​សូមបញ្ជាក់ថា សេចក្តីព្រាងច្បាប់ ស្តីពី​វិសោធនកម្ម​ច្បាប់ ស្តីពី​សហគ្រាស​ពាណិជ្ជកម្ម និង​សេចក្តីព្រាងច្បាប់​វិសោធនកម្ម​ច្បាប់ ស្តីពី​វិធាន​ពាណិជ្ជកម្ម និង​បញ្ជីពាណិជ្ជកម្ម នឹង​ជួយ​សម្រួល ដល់​ការធ្វើ​ធុរកិច្ច នៅ​កម្ពុជា តាមរយៈ​ការធ្វើឱ្យ​ប្រព័ន្ធ​ស្វ័យប្រវត្តិកម្ម ដំណើរការ​ទៅបាន​រលូន មាន​តម្លាភាព និង​មាន​ស្តង់ដារ​ខ្ពស់ ស្របតាម​ការធ្វើ​ធុរកិច្ច ជា​សាកល​។​

​ដោយឡែក សេចក្តីព្រាងច្បាប់ ស្តីពី​ការអនុម័ត​យល់ព្រម លើ​កិច្ចព្រមព្រៀង ពាណិជ្ជកម្ម​សេរី រវាង​រដ្ឋាភិបាល​កម្ពុ​ជា និង​រដ្ឋាភិបាល​កូរ៉េ​វិញ នឹង​ក្លាយជា​កម្លាំង ចលករ​ដ៏​សំខាន់ ក្នុងការ​ជំរុញ​លំហូរ​ពាណិជ្ជកម្ម និង​ការវិនិយោគ រវាង​ភាគី​ទាំងពីរ ដែល​នឹង​ផ្តល់​ប្រយោជន៍ ឱ្យ​គ្នា​ទៅវិញទៅមក ផ្នែក​សេដ្ឋកិច្ច ការអភិវឌ្ឍ សុខមាលភាព ប្រជាជន និង​ការផ្សារភ្ជាប់​ធុរកិច្ច នៃ​ប្រទេស​ទាំងពីរ ឱ្យ​កាន់តែ​ប្រសើរឡើង បន្ថែមទៀត​។

កម្ពុជា ក៏​នឹង​ទទួលបាន អត្ថប្រយោជន៍​បន្ថែម ពី​កិច្ចព្រមព្រៀង​នេះ មាន​ជាអាទិ៍ ការផ្ទេរ​បច្ចេកវិទ្យា ចំណេះដឹង ចំណេះធ្វើ និង​ជំនាញ​ថ្មីៗ ពី​ការវិនិយោគ​ផ្ទាល់ របស់​បរទេស ព្រមទាំង​បង្កើត​ការងារ​ថ្មីៗ ជូន​ប្រជាជន​កម្ពុជា ផងដែរ​៕/V​