​ដោយៈ ប​.​ជ័យ / បន្ទាយ​មាន​ជ័​យៈ ដូច​រៀងរាល់ឆ្នាំ​ដែរ នៅ​ថ្ងៃទី​៣១ ខែធ្នូ ឆ្នាំ ២០២១ នេះ នគរបាល​វរៈ​ការពារ​ព្រំដែន​គោក នៃ​ផែន​ការងារ​ព្រំដែន​, នគរបាល​ចរាចរណ៍​ផ្លូវគោក នៃ​ផែន​សណ្តាប់ធ្នាប់ ស្នងការដ្ឋាន​នគរបាល ខេត្តបន្ទាយមានជ័យ អធិការដ្ឋាន​ក្រុង កងរាជអាវុធហត្ថ ក្រុង​ប៉ោយប៉ែត សង្កាត់​ផ្សារកណ្តាល ព្រមទាំង​អ្នកពាក់ព័ន្ធ បាន​ស្រុះស្រួល មូលមតិ​គ្នា ធ្វើ​ពិធី បណ្តេញ ឧបទ្រពចង្រៃ គ្រោះកាច គ្រោះមហន្តរាយ ហើយ​បួងសួង​សុំ​នាំមក​នូវ សេចក្តីសុខ សេចក្តីចម្រើន ជោគជ័យ មាន​លាភ មានយស សិរី​សួស្តី ពិសេស សូម​មាន​សុវត្ថិភាព​ចរាចរណ៍​ផ្លូវគោក នៅ​ឆ្នាំ ២០២២ នេះ​តទៅ ។

​ពិធី​នោះ បានធ្វើ​នៅ​ផ្លូវជាតិ​លេខ​៥ ត្រង់​ខ្ទម​អាសនៈ​លោកយាយ​ម៉ៅ ដើម​ពោធិ៍ ភូមិ​អណ្តូង​ថ្ម​មាស សង្កាត់​ផ្សារកណ្តាល ក្រុង​ប៉ោយប៉ែត ខេត្តបន្ទាយមានជ័យ ដោយមាន​ការអញ្ជើញ​ដឹកនាំ ពី​លោក​ឧ​ត្ត​ម​សេនីយ៍​ត្រី អ៊ុ សុផល ស្នងការរង​ទទួល ផែន​ការងារ​ព្រំដែន នៃ​ស្នងការដ្ឋាន​ខេត្តបន្ទាយមានជ័យ លោក គាត ហ៊ុល អភិបាលក្រុង និង​ចូលរួម​ដោយ​លោក វរសេនីយ៍ សៅ សារឿន អធិការនគរបាល ក្រុង​ប៉ោយប៉ែត លោក​ស្រិល អិន ចៅសង្កាត់​ផ្សារកណ្តាល និង​មន្ត្រីរាជការ កងកម្លាំង ពលរដ្ឋ ។​

​យោង​លោក​អាចារ្យ​ខេត្ត ប្រាក់ សុ​ភ័ត និង​លោក​ឩ​ត្ត​ម​សេនីយ៍​ត្រី​អ៊ុ សុផល បានអោយដឹងថា​: ក្នុង​ពិធី​នោះ​មាន​កិច្ច​បួងសួង​សុំ​ម្ចាស់​ទឺ​ក​ម្ចាស់​ដី សុំ​បារមី​លោកយាយ​ម៉ៅ ដើម​ពោធិ៍ ។​ពិធី​នមសការ សមាទានសីល ។​

​ពិធី​និមន្ត​ព្រះគ្រូ ប៉ុក ចំរើន ព្រះ​អនុគណ​ក្រុង​ប៉ោយប៉ែត និង​ជា​ចៅអធិការ​វត្ត​ស្ទឹង​បត់ និង​ព្រះសង្ឃ ៤៩ អង្គ រាប់បាត្រ ប្រគេន​ទេយ្យវត្ថុ បច្ច័យ​។ កិច្ច​ចូល​រូប ឡើង​មេមត់ និង​ការថ្វាយ​ផ្កា​ភ្ញី គ្រឿង​សក្ការ​: ការថ្វាយ​ភ្លេង និង​ការ​ច្រៀង​រាំ អុជ​ធូប​ទៀន ការព្រម​លែង​សត្វ​ជាដើម ។​

​យោង​លោក​វរសេនីយ៍ សួន នី​ប៉ូ នាយរង​ការិយាល័យ​នគរបាល​ចរាចរណ៍​ផ្លូវគោក នៃ​ស្នងការដ្ឋាន​នគរបាល ខេត្តបន្ទាយមានជ័យ បាន​ប្រាប់​រស្មី​កម្ពុជា​ដឹង នៅ​ថ្ងៃទី​៣១ ខែធ្នូ ឆ្នាំ​២០២១ ថាៈ សភាពការណ៍​គ្រោះថ្នាក់​ចរាចរណ៍ ១១​ខែ ឆ្នាំ​២០២១ នៅ​ទូទាំង ខេត្តបន្ទាយមានជ័យ មាន ៨៦ ករណី ប្រភេទ​ធ្ងន់ ៨៤ ករណី ។ ក្នុងនោះ នៅ​ស្រុក​មង្គល​បូរី ច្រើនជាងគេ បន្ទាប់មក នៅ​ក្រុង​ប៉ោយប៉ែត ក្រុង​សិរីសោភ័ណ ព្រះនេត្រព្រះ ។ ឯ​មូលហេតុ​នៃ​គ្រោះថ្នាក់ បង្ក​មកពី​មនុស្ស ៨៣ ករណី កត្តា​យាន យន្ត ២ ករណី និង​ភ្លៀង ១ ករណី ។​

​លោក សួន នី​ប៉ូ បាន​បន្តថាៈ ការខូចខាត គឺ​ផ្នែក​មនុស្ស ស្លាប់ ៦៨ នាក់​/​ស្រី​១៣​នាក់ របួសធ្ងន់ ៥៦ នាក់ ស្រី​១៨​នាក់ របួសស្រាល ៣២ នាក់ ស្រី​១២​នាក់​។ ឯ​ផ្នែក សម្ភារៈ ម៉ូតូ​ខូច​ធ្ងន់ ៤០ គ្រឿង ស្រាល​២៩​គ្រឿង រថយន្ត​តូច ខូច​ធ្ងន់ ១៧ គ្រឿង ស្រាល ២៣ គ្រឿង រថយន្ត​ធំ ខូច​ធ្ងន់ ៦ គ្រឿង ស្រាល ១៨​គ្រឿង យាន​ផ្សេងៗ ១៤ គ្រឿង ។ បើ​ប្រៀបធៀប​នឹង​ឆ្នាំ​២០២០ កន្លងមក ឃើញថា ឆ្នាំ​២០២១ កើតឡើង ៨៦ លើ ៨១ កើនឡើង ៥ ករណី ឬ ៦% ៕/V​