ប្រែ​សម្រួលៈ​វាសនា​៖ ជនភៀសខ្លួន​រ៉ូ​ហ៊ីង​យ៉ា​ជាង​១០០​នាក់​ដែល​បាន​រសាត់អណ្តែត​នៅលើ​ទូក​លិច​ធ្លាយ​មួយ​នៅ​ឯនាយ​ឆ្នេរ​ឥណ្ឌូនេស៊ី ត្រូវបាន​អនុញ្ញាត​ចូល​ច្រាំង​កាលពីដើម​ថ្ងៃ​សុក្រ​ទី​៣១​ធ្នូ បន្ទាប់​​ពី​អាជ្ញាធរ​ចុះ​ញ៉ម​សម្ពាធ​អន្តរជាតិ​សុំ​អោយ​ក្រុម​មនុស្ស​រួម​មាន​កុមារ​និង​ស្ត្រី​ភាគ​ច្រើន​នេះ​ស្វះស្វែង​រក​ការ​ជ្រកកោន​។​

​ក្នុង​វីដេអូ​មួយ​ដែល​ទីភ្នាក់ងារ​សារព័ត៌មាន​រ៉​យ​ទ័របាន​ឃើញ ជនភៀសខ្លួន​បាន​ចាកចេញ​ពី​ទូក​ពេល​មាន​ភ្លៀង​ធ្លាក់​ខ្លាំង​និង​បាន​ឡើង​ជិះ​រថយន្ត​ក្រុង​មួយ នៅពេល​អាជ្ញាធរ​បាញ់ថ្នាំ​សម្លាប់​មេរោគ​​លើ​ពួកគេ​។​

​អុក​ទីណា ហាហ្វា​នទី មន្ត្រី​នៅ​ស្នងការ​ជនភៀសខ្លួន​អង្គការសហប្រជាជាតិ (UNHCR)​បាន​ប្រាប់​អ្នកយកព័ត៌មាន​ថា ជនភៀសខ្លួន​១០៥​នាក់​នឹង​ត្រូវ​ដាក់​អោយ​ធ្វើ​ចត្តា​ឡី​ស័ក​១០​ទៅ​១៤​ថ្ងៃ​និង​ពិនិត្យ​​សុខភាព​។​

​ក្រុម​ជន​រ៉ូ​ហ៊ីង​យ៉ា នេះ​ត្រូវបាន​អ្នកនេសាទ​ប្រទះឃើញ​នៅ​លើ​ទូក​ឈើ​របស់​គេ​នៅ​ឯនាយ​ឆ្នេរ​ខេត្ត​អា​សេ​កាលពី​ថ្ងៃអាទិត្យ​។​អាជ្ញាធរ​ពីដំបូង​បាន​យល់ព្រម​ផ្តល់​ជំនួយ​មនុស្សធម៌​មុន​មាន​ផែនការ​រុញ​ទូក​​នេះ​ចូល​ក្នុង​សមុទ្រ​វិញ​តែ​បាន​ដូរ​ការសំរេចចិត្ត​នេះ​ក្រោយ​មាន​ការព្រមាន​អំពី​ស្ថានភាព​របស់​ទូក​និង​ការអំពាវនាវ​មកពី​UNHCR​រួម​ទាំង​ក្រុម​សិទ្ធិ​មនុស្ស​ជាច្រើន​អោយ​អនុញ្ញាត​ទូក​នេះ​ចូល​ចត​។​

​អ្នកនេសាទ​ម្នាក់​ដែល​បាន​ចូល​ទៅ​កាន់​ទូក​ពេល​វា​នៅក្នុង​សមុទ្រ បាន​និយាយថា ទូក​នេះ​ខូច​ម៉ាស៊ីន​និង​លិច​ទឹក​ចូល ហើយ​ប្រឈម​នឹង​ការ​លិច​។​លោក​ក៏​បាន​និយាយថា ជនភៀសខ្លួន​ខ្លះ​បានបង្ហាញ​​ថា​ពួកគេ​ត្រូវការ​ស្បៀង​។​

នាវា​ដឹក​ជនភៀសខ្លួន​រ៉ូ​ហ៊ីង​យ៉ា ត្រូវបាន​កងទ័ពជើងទឹក​ឥណ្ឌូនេស៊ី​អូស​ចូល​ច្រាំង​កាលពី​ព្រឹក​ថ្ងៃ​សុក្រ​

​ឥណ្ឌូនេស៊ី ជា​ហត្ថលេខី​នៃ​អនុសញ្ញា​អង្គការសហប្រជាជាតិ​ឆ្នាំ​១៩៥១​ស្តី​ពី​ជនភៀសខ្លួន​និង​ជា​ប្រទេស​ឆ្លងកាត់​មួយ​សំរាប់​ជន​ស្វះស្វែង​រក​ការ​ជ្រកកោន​នៅ​ប្រទេស​ទី​៣​។​

​រាប់​ឆ្នាំ​មក​ហើយ​ជន​អ៊ីស្លាម​រ៉ូ​ហ៊ីង​យ៉ា​មក​ពី​មី​យ៉ាន់​ម៉ា បាន​ផ្សងព្រេង​តាម​ទូក​ទៅ​កាន់​ប្រទេស​នានា​ដូចជា​ម៉ាឡេស៊ី ថៃ និង​ឥណ្ឌូនេស៊ី​នៅ​ចន្លោះ​ខែ​វិច្ឆិកា​និង​មេសា ពេល​សមុទ្រ​ស្ងប់​រលក​។​ពួក​គេ​រាប់​រយ​​នាក់​បាន​ទៅ​ដល់​ខេត្ត​អា​សេ​នៅ​ប៉ុន្មាន​ឆ្នាំ​មកនេះ តែ​ជា​ច្រើន​ទៀត​ត្រូវបាន​រុញ​ចូល​សមុទ្រ​វិញ ហើយ​ច្រើន​តែ​ចំណាយ​ពេល​រាប់​ខែ​នៅ​សមុទ្រ​៕