​ដោយ​: ពៅ​និមល / ភ្នំពេញៈ បើក​ទំព័រ​នៃ​ដើមឆ្នាំ ២០២២ នេះ ការ​លក់រាយ​ប្រេង ឥន្ធនៈ​បាន​ហក់​ឡើង​មកវិញ ដោយ​ក្នុងនោះ សម្រាប់​ប្រេងសាំង​ធម្មតា​ឡើងថ្លៃ ចំនួន ១០០ រៀល ក្នុង​១​លីត្រ​។ រីឯ​ប្រេងម៉ាស៊ូត​ឡើងថ្លៃ ៥០​រៀល ក្នុង​១​លីត្រ ខណៈដែល ២​សប្តាហ៍ ចុងឆ្នាំ​២០២១ ការ​លក់រាយ​ប្រេងឥន្ធនៈ ធ្លាក់​ថ្លៃ ១០០ រៀល​ក្នុង​១​លីត្រ ដូចគ្នា​។​

​ក្រសួងពាណិជ្ជកម្ម នៅក្នុង​សេចក្តីជូនដំណឹង ស្តីពី​ថ្លៃ​លក់រាយ​ប្រេងឥន្ធនៈ នៅតាម​ស្ថានីយ ដែល​រស្មី​កម្ពុជា ទទួលបាន​នៅ​ព្រឹក​ថ្ងៃទី​៣ ខែមករា​នេះ បាន​ឲ្យ​ដឹងថាៈ ចាប់ពី​ថ្ងៃទី​១ ដល់​ថ្ងៃទី​១៥ ខែមករា ឆ្នាំ​២០២២ ប្រេងសាំង​ធម្មតា ត្រូវ​ដាក់លក់ ក្នុងតម្លៃ ៤ ២០០ រៀល ក្នុង​១​លីត្រ​។ ដោយឡែក ប្រេងម៉ាស៊ូត តម្លៃ ៣ ៨០០​រៀល នៅក្នុង​១​លីត្រ​។​

​ក្រសួង​បាន​ឲ្យ​ដឹង​ទៀតថាៈ ផ្អែក​តាម​តម្លៃ​មធ្យម​ប្រេងឥន្ធនៈ លើ​ទីផ្សារ​អន្តរជាតិ ថ្លៃ​លក់រាយ​ប្រេងឥន្ធនៈ​ក្នុង​រយៈពេល​ដូចគ្នា​ខាងលើ នឹងត្រូវ​លក់ ៤ ៣៦០ រៀល ក្នុង​១​លីត្រ សម្រាប់​ប្រេងសាំង​ធម្មតា EA92 និង ៣ ៩៦០​រៀល សម្រាប់​ប្រេង ម៉ា​ស៊ូ​ត ក្នុង ១​លីត្រ​។

​ជាមួយគ្នានេះ ដើម្បី​ជួយ​សម្រួល ដល់​ជីវភាព​របស់​ប្រជាជន និង​ដោយមាន​ការរួម ចំណែក ពី​ក្រុមហ៊ុន​ចែកចាយ​ប្រេងឥន្ធនៈ នៅ​កម្ពុជា សម្តេចនាយក​រដ្ឋមន្ត្រី នៅតែ​បន្ត និង​សម្រេច​បញ្ចុះតម្លៃ លក់រាយ​ប្រេងឥន្ធនៈ នៅ​កម្ពុជា ចំនួន ៤ សេន​ដុល្លារ​ដដែល នៅក្នុង​១​លីត្រ​។​

​ពាក់ព័ន្ធ​ការកំណត់ថ្លៃ​លក់រាយ ប្រេងឥន្ធនៈ​នៅ​កម្ពុជា​នេះដែរ ក្រសួងពាណិជ្ជកម្ម ក៏​នៅតែ​រក្សា​អំណះអំណាង​ថា គឺ​ក្រសួង​គ្រាន់ តែ​ស្រង់តម្លៃ​ឡើង​-​ចុះ នៃ​ប្រេង​តាម ទីផ្សារ​អន្តរជាតិ មក​គណនា តាម​ប្រកាស ដូច​មាន ក្នុង​ឯកសារ​តែប៉ុណ្ណោះ​៕/V​-PC