ដោយៈ​មុនី​រ័ត្ន​/​ភ្នំពេញៈ​អតីត​បុគ្គលិក​ក្រុមហ៊ុន​ណាហ្គា​វើ​លដ៍ (NAGA World) ដែលជា​មេដឹកនាំ​បាតុកម្ម​ខុសច្បាប់​ចំនួន​ប្រាំមួយ​នាក់ ត្រូវបាន​សមត្ថកិច្ច​ប​ញ្ជូ​ន​ទៅ​សាលាដំបូង​រាជធានី​ភ្នំពេញ​កាលពី​ថ្ងៃទី​២​និង​ថ្ងៃទី​៣​ខែមករា​ឆ្នាំ​២០២២​នេះ​ដើម្បី​ឲ្យ​ព្រះរាជអាជ្ញា​និង​ចៅក្រម​ធ្វើការ​សាកសួរ​តាម​នីតិវិធី​។ ពួក​មេដឹកនាំ​បាតុកម្ម​ខុសច្បាប់​ទាំងនេះ​ត្រូវបាន​សមត្ថកិច្ច​ចាប់ខ្លួន​កាលពី​យប់​ថ្ងៃទី​៣១ ខែធ្នូ ឆ្នាំ​២០២១ បន្ទាប់ពី​ពួកគេ​បាន​ដឹកនាំ​បាតុកម្ម​ខុសច្បាប់ និង​បាន​បង្ក​ឲ្យ​បាត់បង់​សណ្តាប់ធ្នាប់​សាធារណៈ​។​

​មនុស្ស​ទាំង​ប្រាំមួយ​នាក់​រួមមាន ៖ ១. អ្នកស្រី ឈឹម សុខន អគ្គលេខាធិការ​សហជីព ២. អ្នកស្រី ឃ្លាំង សុ​បិ​ន្ត ទីប្រឹក្សា​ជាន់ខ្ពស់ ,​ហិ រ​ញ្ញិ​ក​សហជីព​( អ្នក​កាន់​លុយ​ចំណាយ​សហជីព​) ៣. អ្នកស្រី ហៃ សុភាព (​តំណាង​ក្រុម​អ្នកចរចា​) ៤. កញ្ញា សុន ស្រី​ពេជ្រ (​តំណាង​ក្រុម​អ្នកចរចា​)៥. អ្នកស្រី រី សុវណ្ណ​ឌី ( តំណាង​ក្រុម​អ្នកចរចា​) និង​៦. អ្នកស្រី ទូច ស្រី​មាស ត្រូវបាន​ការិយាល័យ​ព្រហ្មទណ្ឌ​កម្រិត​ស្រាល នៃ​ស្នងការដ្ឋាន​រាជធានី​ភ្នំពេញ​បញ្ជូន​មកកាន់​សាលាដំបូង​រាជធានី​ភ្នំពេញ​ដើម្បី​បន្ត​នីតិវិធី​។ អ្នក​ទាំង​ប្រាំមួយ​នាក់​ត្រូវបាន​ឃាត់ខ្លួន​កាលពី​ព្រលប់​ថ្ងៃទី ៣១​ខែធ្នូ ឆ្នាំ​២០២១​។

​ចំណែក​មនុស្ស​បីនាក់​ទៀត រួមមានៈ ១. ឈ្មោះ រិ​ន ផល្លា ២. ឈ្មោះ អេង ស្រី​បូ និង​ទី​៣. ឈ្មោះ ស៊ុន ស្រីមុំ សមត្ថកិច្ច​បានធ្វើការ​អប់រំ​ណែនាំ​ឲ្យ​ត្រឡប់ទៅផ្ទះ​វិញ​។​

​អ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក សាន សុខ​សីហា បាន​មានប្រសាសន៍​បញ្ជា​ក់នៅ​ព្រឹក​ថ្ងៃទី​៣ ខែមករា នេះ​ថា កាលពី​យប់​ថ្ងៃទី​៣១ ខែធ្នូ ឆ្នាំ​២០២១ សមត្ថកិច្ច​បាន​ចាប់ខ្លួន​មេដឹកនាំ​បាតុកម្ម​ខុសច្បាប់​នៅមុខ​ក្រុមហ៊ុន​ណាហ្គា​វើ​ល សរុប​ចំនួន ៩​នាក់ ដោយ​ក្នុងនោះ​មនុស្ស​ចំនួន ៦​នាក់ ត្រូវបាន​បញ្ជូនទៅ​តុលាការ និង​មនុស្ស​ចំនួន ៣​នាក់​បានធ្វើ​ការអប់រំ​។ នេះ​បើតាម​លោក​បញ្ជាក់ប្រាប់​AMS កាលពី​ព្រឹក​ថ្ងៃទី​៣​ខែមករា​នេះ​។​

​ប្រភព​ដដែល​បន្តថា កាលពី​វេលា​ម៉ោង ១៩​យប់​ថ្ងៃទី ៣១ ខែធ្នូ ឆ្នាំ​២០២១​សមត្ថកិច្ច​នគរបាល​បានធ្វើ​ការចាប់​ឃាត់ខ្លួន​បុគ្គល​ចំនួន​ប្រាំបួន រូប ពីបទ​បានរៀបចំ​បាតុកម្ម​ដោយ​ខុសច្បាប់​នៅមុខ​ក្រុមហ៊ុន​ណាហ្គា​វើ​ល ធ្វើ​ឲ្យ​ប៉ះពាល់​ដល់​សន្តិសុខ សណ្តាប់ធ្នាប់ សាធារណៈ និង​សុវត្ថិភាព​សង្គម ។ មុននឹង​អនុវត្ត​វិធានការ​ច្បាប់​ចាប់​ឃាត់ខ្លួន​មេដឹកនាំ​បាតុកម្ម​ទាំងនេះ​រដ្ឋបាល​រាជធានី​ភ្នំពេញ​បានធ្វើការ​អំពាវនាវ​ច្រើន លើក​ច្រើនសា ឲ្យ​ពួកគេ​បញ្ឈប់​សកម្មភាព​ត​វ៉ ដោយ​ខុសច្បាប់​សំដៅ​ធ្វើយ៉ាងណា​រក្សាបាន​នូវ​សន្តិសុខ សណ្តាប់ធ្នាប់​សាធារណៈ និង សុវត្ថិភាព​សង្គម ប៉ុន្តែ​ពួក​មេដឹកនាំ​បាតុកម្ម​មិន​ស្ដាប់​តាម​ការអំពាវនាវ​រប​ស់​អាជ្ញាធរ ហើយ បន្ត​អូសបន្លាយ​បាតុកម្ម​អស់​រយៈពេល ១៣​ថ្ងៃ​មកហើយ ។​

​ការចាប់​ឃាត់ខ្លួន​បុគ្គល​ទាំង​ប្រាំបួន​រូបនេះ គឺ​អនុលោម​ទៅតាម​មាត្រា ១៩៤ និង​មាត្រា ១៩៥ ក្រមព្រហ្មទណ្ឌ​នៃ​ព្រះរាជាណាចក្រ​កម្ពុជា បច្ចុប្បន្ន​សមត្ថកិច្ច​នគ​របាល​កំពុង​អនុវត្ត នីតិវិធី​ទៅតាម​វិធានការ​ច្បាប់ ។​

​សូមជម្រាបថា អតីត​បុគ្គលិក​ក្រុម​ណាហ្គា​វើ​ល NAGA World បាន​ប្រកាន់​ជំហរ​របស់ខ្លួន​បន្ត​ការតវ៉ា​រហូត​មាន​ដំណោះស្រាយ​ពី​ក្រុមហ៊ុន​ក្រោយពី​ការចរចារ​ជាច្រើនលើក​ជាមួយ​ភាគី​ក្រុមហ៊ុន​។​ពួកគេ​ធ្វើ​កូដកម្ម​ចំនួន ១៣​ថ្ងៃ​ជាប់ៗ​គ្នា ពីថ្ងៃ​ទី​១៨ រហូតដល់​ថ្ងៃទី​៣១ ខែធ្នូ ឆ្នាំ​២០២១ ទាមទារ​លក្ខខណ្ឌ​ចំនូ​ន​ប្រាំបួន​ចំនុច​។ ទាមទារ​ឲ្យ​ក្រុមហ៊ុន គោរព​សិទ្ធិ​កម្មករ និង​ច្បាប់​ការងារ​នៅក្នុង​ប្រទេស​កម្ពុជា​។ ក្នុងនោះ​មានការ​ទាមទារ​ឲ្យ​ក្រុមហ៊ុន​ទទួលយក​ថ្នាក់ដឹកនាំ​សហជីព និង​កម្មករនិយោជិត សរុប ចំនួន​៣៦៥​នាក់ ដែល​មិន​ព្រម​ទទួលយក​សំណង​បញ្ចប់​កិច្ចសន្យាការងារ ចូល​បម្រើ​ការងារ នៅ​កន្លែង ដើម​វិញ រួមទាំង​ផ្ដល់ប្រាក់​រំលឹក​ផ្សេងៗ គិត​តាំង​ពីថ្ងៃ​បញ្ឈប់ រហូតមកដល់ ថ្ងៃ​ចូលធ្វើការ​វិញ ជាដើម​៕​សរន​