​ដោយ​:​ស​រិ​ទ្ធ​/​ភ្នំពេញ​: បុរស​ម្នាក់​បាន​រងរ​បួស​ធ្ងន់​ត្រូវបាន​បញ្ជូនទៅ​សង្គ្រោះ​នៅ​មន្ទីរពេទ្យ​ភ្លាមៗ​ខណៈ​កំពុង​ជិះ​ម៉ូតូ​តាម​ដងផ្លូវ​ត្រូវ​រថយន្ត​ធុន​ធំ​ក្រុមហ៊ុន L.M.H បើក​បុក​ពីក្រោយ និង​កិន​កាលពី​វេលា​ម៉ោង ៨:៥០ យប់​ថ្ងៃទី​៦ ខែមករា ឆ្នាំ​២០២២ នៅ​ចំណុច​ខាងកើត​ស្តុ​ប​ចូល​បឹង​តា​ម៉ា​ត តាម​បណ្តោយ​ផ្លូវ​លេខ​៣៧១ ក្នុង​សង្កាត់​ដង្កោ ខណ្ឌដង្កោ រាជធានី​ភ្នំពេញ​។​

​តាម​ប្រភពព័ត៌មាន​បានឱ្យដឹងថា មុនពេល​កើតហេតុ​គេ​បានឃើញ​បុរស​ម្នាក់​ជិះ​ម៉ូតូ​ម៉ាក​ហុងដា​ឌ្រី​ម​សង់​ស៊េរី​ឆ្នាំ​២០១៨ ពណ៌​ខ្មៅ ពាក់​ស្លាក​លេខ ពោធិ៍សាត់ ១I ៨៦៣៥ ធ្វើដំណើរ​ក្នុងទិសដៅ​ពី​លិចទៅ​កើត​ខណៈ​មកដល់​ចំណុចកើតហេតុ​ស្រាប់​តែមាន​រថយន្ត​ធុន​ធំ​របស់​ក្រុមហ៊ុន L. M. H ក្បាល​ពណ៌​ក្រហម ពាក់​ស្លាក​លេខ បន្ទាយមានជ័យ ៣A ១៦៧៩ ធ្វើដំណើរ​មកពី​ក្រោយ​ហើយ​បុក​និង​កិន​ម៉ូតូ​បណ្តាលឱ្យ​បុរស​អ្នកជិះ​ម៉ូតូ​រងរបួស​ធ្ងន់ ភ្លាមនោះ​តៃកុង​រថយន្ត​បាន​ចុះ​រត់​គេចខ្លួនបាត់​បន្សល់​ទុក​រថយន្ត​នៅ​កន្លែងកើតហេតុ​និង​បង្ក​ការកកស្ទះ​ចរាចរណ៍​យ៉ាងខ្លាំង​ផងដែរ​។

​ក្រោយ​កើត ហេតុ​ជនរងគ្រោះ​ត្រូវបាន​រថយន្ត​សង្គ្រោះ​ដឹក​ទៅ​មន្ទីរពេទ្យ​ភ្លាមៗ​ចំណែក​រថយន្ត​និង​ម៉ូតូ​ត្រូវបាន​សមត្ថកិច្ច​ធ្វើការ​វាស់វែង​យកទៅ​រក្សាទុក​រងចាំ​ដោះស្រាយ​ពេល​ក្រោយ​៕